លោក ទា-គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាប ផឹកស៊ីស្រវឹងធ្លាក់ភ្នែក បើករថយន្ត រេពេញផ្លូវដូចពស់វែកវង្វេងព្រៃ ជ្រុលទៅបុកស្រ្តីម្នាក់បណ្តាលឱ្យរងរបួសជាទម្ងន់ រួចបើកឡានទាំងបែកកង់រតគេច(ស្មានថាជនរងគ្រោះស្លាប់) រហូតដល់ស្តុបកោះកេរ្តិ៍ ទៅមុខលែងរួច ទើបប៉ូលីសព័ទ្ធចាប់បាន ធ្វើឲ្យមានការភ្ញាក់ផ្អើលដល់ប្រជាពលរដ្ឋដែល កំពុងធ្វើដំណើរតាមដងផ្លូវស្មានថា ប៉ូលីសដេញចាប់ចោរប្លន់។
រឿងរាវដ៏កម្រហើយសែនរន្ធត់នេះបានកើតឡើងកាលពីវេលា ម៉ោង ៣និង៤០នាទី ថ្ងៃទី២៣ ខែមីនា ឆ្នាំ ២០១៤ ស្ថិតនៅចំនុចភ្លើងស្តុបខាងលិចស្តាតចាស់ឈៀងខាងជើងសារមន្ទីរ ជាតិអង្គរ ស្ថិតនៅក្នុង ភូមិ ស្វាយដង្គំ សង្កាត់ ស្វាយដង្គំ ក្រុងសៀមរាប។
បើយោងតាមប្រភពពីកន្លែងកើតហេតុបានឲ្យដឹងថា មុនដំបូងពួកគេឃើញរថយន្តម៉ាកឡង់រ៉ូវែ (RANGE ROVER) ពណ៌ខ្មៅ ពាក់ស្លាកលេខ ភ្នំពេញ 2Y-1112 បើកបរក្នុងល្បឿនលឿនដូចឡានប្រណាំងរេពេញផ្លូវពីលិចមកកើត ហើយរេចង្កូតទៅបុក ជាមួយម៉ូតូមួយគ្រឿងម៉ាកវ៉េវ ពណ៌ក្រហមលាយខ្មៅ ពាក់ស្លាកលេខ បន្ទាយមានជ័យ 1A-0883 ធ្វើដំណើរពីកើត មកលិចបញ្ច្រាសទិសដៅគ្នា បណ្តាលឱ្យស្រ្តីម្នាក់រងរបួសជាទម្ងន់សន្លប់ស្តូកស្តឹង ហើយបានបងប្អូនបញ្ជូនយក ទៅគ្លីនិកឯកជនដើម្បីជួយសង្គ្រោះ បន្ទាន់។
ប្រភពដដែលបានបន្តថា ស្រ្តីរងគ្រោះដែលត្រូវរថយន្តមេព្រៃបុកអោយរបួសធ្ងន់សន្លប់បាត់ ស្មារតីនោះមានឈ្មោះ ហៃ-ហន អាយុ២៤ឆ្នាំ រស់នៅភូមិគោកស្នួល ឃុំពួក ស្រុកពួក ខេត្តសៀមរាប ជាបុគ្គលិកសណ្ឋាគារមួយកន្លែងនៅក្នុងក្រុងសៀមរាប។
មន្ត្រីរដ្ឋបាលព្រៃឈើមួយរូបសុំមិនបញ្ចេញឈ្មោះ លូចប្រាប់អ្នកកាសែតថា លោក ទា-គឹមសុទ្ធ តែងតែមានកម្មវិធីស្ទើររាល់ថ្ងៃ គ្មានថ្ងៃទំនេរម្តងណាឡើយ។ ដោយសារតែចំណូលលុយច្រើនពីបទល្មើសផ្សេងៗក្នុងខេត្ត ពិសេសមានមិត្តភ័គ្រច្រើនសុទ្ធតែជាប្រធានក្រុមហ៊ុនដឹកឈើខុស ច្បាប់មានដូចជា ក្រុមហ៊ុនសុខសំណាង ក្រុមហ៊ុនសំរោងរ័បប័រ និងក្រុមហ៊ុនក្រញូង បេង ធ្នង់ គគី សុក្រំ ឈើលេខ២ជាដើម ច្រើនណាស់រាប់មិនអស់ទេ……។ល។
លោកមន្ត្រីរដ្ឋបាលព្រៃឈើដដែលខាងលើបានបន្តថា ដូច្នេះហើយបានជាមេមានកម្មវិធីផឹកស៊ីមិនចេះចប់ ហើយសូម្បីតែមានរឿងប៉ុណ្នឹងហើយនូវតែលោកនាយខ័ណ្ឌ មិនខ្លាច ព្រោះគាត់មានមន្ត្រីប៉េអឹមមួយចំនួនចាំជួយគាត់ ហើយខ្លាំងជាងនេះទៅទៀតលោក ទា-គឹមសុទ្ធ បានបញ្ចូនបេសកជនពិសេសរបស់លោកឈ្មោះ ម៉ែន-វុធី្ធ ហៅ ធីឡយ ដែលជាជំនួយការផ្ទាល់របស់លោក ទា-គឹមសុទ្ធ និងជាអ្នកប្រមូលលុយសេដ្ឋកិច្ចពីបទល្មើសព្រៃឈើកំបាំងមុខនានា ក្នុងខេត្តសៀមរាប និងជាអ្នកដោះស្រាយកម្មវិធីគ្រោះថ្នាក់ចរាចរណ៍ទៀតផង។ ហើយលោក ម៉ែន-វុធ្ធី ហៅ ធីឡយ ក៏ធ្លាប់បាន គំរាមប្តឹងអ្នកកាសែតជាច្រើនដង ច្រើននាក់រួចមកហើយ។ បើអ្នកកាសែត ណាហ៊ានចុះរឿងអាស្រូវគេរពីគាត់ និងមេរបស់គាត់ គឺគាត់នឹងគំរាមប្តឹងភ្លាម។
បើតាមសម្តីលោក វិរៈសេនីយ៍ត្រី ឡែម សុវណ្ណ នាយរងការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាល ខេត្ត បានប្រាប់ថា ពាក់ព័ន្ធ និងគ្រោះថ្នាក់ចរាចរណ៍ខាងលើនេះ មន្ត្រីរបស់លោកបាន យករថយន្តអ្នកបង្ករហេតុ និងម៉ូតូជនរងគ្រោះមករក្សានៅគោលដៅស្ពានថ្មរួចហើយដើម្បីដោះ ស្រាយទៅតាមផ្លូវច្បាប់។
សូមបញ្ជាក់ថា ហេតុការណ៍គ្រោះថ្នាក់ចរាចរណ៍ខាងលើនេះមានការភ្ញាក់ផ្អើលពេញ ក្រុមសៀមរាប បណ្តាលអោយពលរដ្ឋរងចាំមើលថាតើច្បាប់ចាត់ការយ៉ាងណាទៅលើអ្នក មានលុយមានអំណាចដូចជាលោក ទា-គឹមសុទ្ធនាយខណ្ឌរដ្ឋបាលព្រៃឈើខាងលើនេះ។
អ្នកយកព័ត៌មានយើងពុំអាចសុំការបំភ្លឺពីលោក ទា-គឹមសុទ្ធបានទេនៅរសៀលថ្ងៃទី២៤នេះ ព្រោះទូរស័ព្ទមិនចូល៕
Recent Comments