ឧត្តរមានជ័យ ៖ តាមសេចក្តីរាយការណ៌ពីមន្ដ្រីតូចតាចនៅក្នុងច្រកទ្វារអន្តរជាតិអូរស្មាច់ ខេត្តឧត្ដរមានជ័យ បានបង្ហើបឲ្យដឹងថា: ដោយសារតែអាងអំណាចដ៍រឹងមាំនៅក្នុងអគ្គនាយកដ្ឋានអន្តោប្រវេសន៍ក្រសួងមហាផ្ទៃ ទើបលោកឧត្តមសេនីយ៍ត្រី ខូង ទីន មេនគរបាលអន្តោប្រវេសន៍ច្រកអូរស្មាច់ ប្រើអំណាចប្រព្រឹត្តអំពើពុករលួយយ៉ាងពេញបន្ទុក។
ប្រភពខ្លះបានបង្ហើបឲ្យដឹងថា ពេលដែលលោក ខូង ទីន គ្មានវត្តមានបំពេញការងារនៅច្រកទ្វារអន្តរជាតិអូរស្មាច់ គឺលោក ខូង ទីន បានបណ្ដោយឲ្យលោក ជា ព្រឿង ដែលជានាយរងនគរបាលអន្តោប្រវេសន៍ច្រកអូរស្មាច់ ធ្វើអ្វីៗតាមអំពើចិត្តហើយមានការបែងចែកផលប្រយោជន៍យ៉ាងសុខស្រួល។ ដូច្នេះហើយទើបមានសេចក្ដីអំពាវនាវឲ្យលោក នេត សាវឿន អគ្គស្នងការនគរបាលជាតិ ចាត់វិធានការទប់ស្កាត់អំពើពុករលួយរបស់លោក ខូង ទីន និងបក្ខពួកជាបន្ទាន់ដើម្បីកុំឲ្យពួកគេប្រើតួនាទីនិងអំណាចប្រព្រឹត្តអំពើពុករលួយយ៉ាងក្រអឺតក្រទមបន្តទៀត។
សូមបញ្ជាក់ថា មួយរយៈពេលចុងក្រោយនេះរឿងអាស្រូវពុករលួយតាមច្រើនរូបភាពរបស់លោក ខូង ទីន មេនគរបាលអន្តោប្រវេសន៍ច្រកទ្វារអន្តរជាតិអូរស្មាច់ ក្រុងសំរោង ខេត្តឧត្ដរមានជ័យ ត្រូវបានបើកកកាយជាបន្តបន្ទាប់ ជាពិសេសពាក់ព័ន្ធទៅនឹងការបើកដៃឲ្យលោក ជា ព្រឿង នាយរងប៉ុស្ដិ៍នគរបាលអន្តោប្រវេសន៍ច្រកអូរស្មាច់ គាបយកលុយពីពលរដ្ឋខ្មែរដែលធ្លាប់បានឆ្លងដែនចូលទឹកដីសៀម។ នៅពេលដែលរឿងអាស្រូវរបស់ខ្លួនត្រូវបានលាតត្រដាងជាបន្តបន្ទាប់ស្រាប់តែឧត្តមសេនីយ៍ត្រី ខូង ទីន មេប៉ុស្ដិ៍នគរបាលអន្តោប្រវេសន៍ច្រកអូរស្មាច់ ខំរកវិធីបិទបាំងរឿងអាស្រូវរបស់ខ្លួន ហើយអំពាវនាវឲ្យថ្នាក់លើជួយរកយុត្តិធម៌ឲ្យខ្លួនទៅវិញ។ ជាងនេះទៅទៀតលោក ខូង ទីន បានបើកការវាយប្រហារទៅលើបណ្ដាញផ្សព្វផ្សាយព័ត៌មានដែលយករឿងអាស្រូវច្រើនបែបច្រើនយ៉ាងរបស់គាត់មកចុះផ្សាយថា ជាអ្នកកំពុងព័ទ្ធទាញចំណីពីមាត់ទឹកទៅវិញ។
ប្រភពពីមន្ត្រីពាក់ព័ន្ធនៅច្រកអូរស្មាច់ បានបង្ហើបឲ្យដឹងថា រយៈពេលប៉ុន្មានសប្ដាហ៍ចុងក្រោយនេះលោក ខូង ទីន មេនគរបាលអន្តោប្រវេសន៍ច្រកអូរស្មាច់ ហាក់ដូចជាភ័យស្លន់ស្លោយ៉ាងខ្លាំងបន្ទាប់ពីបណ្ដាញព័ត៌មាននានាបានផ្សព្វផ្សាយរឿងអាស្រូវរបស់គាត់ជាសាធារណៈ។ ជាពិសេសក្រោយពេលនាយឧត្តមសេនីយ៍ គៀត ច័ន្ទថារិទ្ធ ឡើងកាន់តំណែងជាអគ្គនាយកនៃអគ្គនាយកដ្ឋាននគរបាលអន្តោប្រវេសន៍ក្រសួងមហាផ្ទៃ គឺលោក ខូង ទីន ប្រឹងប្រែងគ្រប់វិធីដើម្បីទប់តំណែងរបស់ខ្លួនបន្តទៀត។ ហេតុនេះហើយទើបលោក ខូង ទីន ខំប្រឹងបិទបាំងអំពើពុករលួយនិងទង្វើមិនប្រក្រតីរបស់ខ្លួន ព្រមទាំងបក្ខពួកយ៉ាងគឃ្លើនហើយបើកការវាយប្រហារទៅលើអ្នកសារព័ត៌មានយ៉ាងកំរោលទៅវិញ។
គួរបញ្ជាក់ដែលថាស្និទ្ធនឹងលោក ខូង ទីន បានឲ្យដឹងថា បច្ចុប្បន្នលោក ខូង ទីន និងបក្ខពួកឈ្មោះ ជា ព្រឿង ព្រមទាំងមន្ត្រីក្រោមឱវាទនៅតែប្រព្រឹត្តអំពើពុករលួយយ៉ាងគឃ្លើនដដែល ជាពិសេសការគាបយកលុយពីពលរដ្ឋដែលធ្វើប័ណ្ណឆ្លងដែនចូលទឹកដីសៀមលើសសៀវភៅបន្ទុកមិនទាន់ត្រូវបានបញ្ឈប់នៅឡើយទេ។ ទន្ទឹមនឹងនេះលោក ខូង ទីន បានឃុបឃិតជាមួយសមត្ថកិច្ចគយនិងសមត្ថកិច្ចពាក់ព័ន្ធផ្សេងៗទៀតក្នុងការបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកទ្វារអន្តរជាតិកាន់តែច្រើនឡើងៗ។ ដូច្នេះលោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋាននគរបាលអន្តោប្រវេសន៍ក្រសួងមហាផ្ទៃ ក៏ដូចជានាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរបណ្ដែតបណ្ដោយឲ្យលោក ខូង ទីន និងបក្ខពួកធ្វើអ្វីៗតាមអំពើចិត្តឡើយ។
ដោយសារថាអំពើពុករលួយនិងទង្វើមិនប្រក្រតីផ្សព្វបែបយ៉ាងរបស់លោក ខូង ទីន និងលោក ជា ព្រឿង ព្រមទាំងបក្ខពួកកំពុងរងការរិះគន់យ៉ាងខ្លាំងក្លាពីប្រជាពលរដ្ឋ ហើយក៏កំពុងធ្វើឲ្យប៉ះពាល់ដល់កេរ្តិ៍ឈ្មោះស្ថាប័ននគរបាលជាតិនោះផងដែរ ៕
Recent Comments