ប្រភពដែលស្និទ្ធនឹងលោក សាំង ណន មេគយចល័តប្រចាំប៉ុស្ដិ៍ជជុះ ចំណុចភូមិកូនដំរី សង្កាត់និមិត្ត ក្រុងប៉ោយប៉ែត បាន ឲ្យដឹងថា ប្រសិនបើគ្មានការឃុបឃិត បើកដៃពីសំណាក់មេគយធំៗ ក្នុងខេត្តបន្ទាយមានជ័យ ទេនោះគឺ លោក សាំង ណន មិនហ៊ានធ្វើអ្វីៗតាមអំពើចិត្តឡើយ។ កន្លងមកមានឈ្មួញមួយចំនួនត្រូវបានលោក សាំង ណន ប្រើល្បិចគាបយកលុយតាមរបៀងពុករលួយហើយលោក សាំង ណន តែងប្រើប្រាស់ឈ្មោះមន្ត្រីគយធំៗក្នុងខេត្តបន្ទាយមានជ័យ ដើម្បីបិទបាំងអំពើពុករលួយនិងទង្វើមិនប្រក្រតីរបស់ខ្លួន។ បច្ចុប្បន្នអ្នករត់តាក់ស៊ី អ្នកបើករថយន្តឈ្នួលដឹកជញ្ជូនទំនិញបន្លែផ្លែឈើពីច្រកប៉ោយប៉ែត ចូលមកខេត្តបន្ទាយមានជ័យ កំពុងប្រឈមនឹងការលំបាកយ៉ាងខ្លាំងព្រោះត្រូវលោក សាំង ណន និងបក្ខពួកគាបយកលុយតាមរបៀបពុករលួយ ដោយគ្មានញញើតអ្វីទាំងអស់។ ដូច្នេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលធ្លាប់ប្ដេជ្ញាចិត្តលុបបំបាត់អំពើពុករលួយនៅតាមដងផ្លូវ មិនគួរបណ្ដោយឲ្យលោក សាំង ណន មេគយចល័តចំណុចភូមិកូនដំរី សង្កាត់និមិត្ត ក្រុងប៉ោយប៉ែត ធ្វើអ្វីៗតាមអំពើចិត្តត។
ប្រភពពីក្រុមឈ្មួញនិងអាជីវករដឹកជញ្ជូនទំនិញឆ្លងកាត់ផ្លូវជាតិលេខ៥ ចំណុចភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានឲ្យដឹងថា បច្ចុប្បន្នមន្ត្រីគយចល័តឈ្មោះ សាំង ណន ប្រើអំណាចគាបយកលុយពីពួកគេតាមអំពើចិត្ត។ ប្រភពបានឲ្យដឹងទៀតថា បើទោះបីឈ្មួញនិងអាជីករនាំចូលទំនិញបង់ពន្ធត្រឹមត្រូវនៅច្រកព្រំដែនរួចហើយក៏ដោយ ក៏ចៀសមិនផុតពីបង់លុយក្បាលរថយន្តឬលុយលើតុក្រោមតុឲ្យលោក សាំង ណន ដែលជាមេគយចល័តនៅប៉ុស្ដិ៍ជជុះក្នុងភូមិកូនដំរី សង្កាត់និមិត្ត នោះទេ។ តាមការបង្ហើបពីមន្ត្រីគយនិងភ្នាក់ងារគយក្នុងខេត្តបន្ទាយមានជ័យ មួយចំនួនបានឲ្យដឹងថា ការដែលលោក សាំង ណន អាចធ្វើអ្វីៗតាមអំពើចិត្តគឺមានការឃុបឃិតបើកដៃពីសំណាក់មេគយធំៗក្នុងខេត្តបន្ទាយមានជ័យ ផងដែរទើបអ្វីៗអាចប្រព្រឹត្តទៅដោយរលូន។
ប្រភពពីអ្នករកស៊ីដឹកជញ្ជូនទំនិញឆ្លងកាត់ផ្លូវជាតិលេខ៥ ភូមិកូនដំរី សង្កាត់និមិត្ត ក្រុងប៉ោយប៉ែត បានឲ្យដឹងថា សូម្បីតែរថយន្តតាក់ស៊ី រថយន្តឈ្នួលដឹកបន្លែផ្លែឈើ ក៏ត្រូវលោក សាំង ណន និងបក្ខពួកគាបយកលុយស្រេចតែអំពើចិត្តដែរ។ ជាងនេះទៅទៀតសម្រាប់រថយន្តក្រុងដឹកជញ្ជូនអ្នកដំណើរដែលមានផ្ទុកទំនិញបន្តិចបន្តួចពីប៉ោយប៉ែត ចូលមករាជធានីភ្នំពេញ ក៏ចៀសមិនផុតពីបង់លុយតាមការកំណត់របស់លោក សាំង ណន នោះឡើយដោយក្នុងរថយន្តមួយគ្រឿងត្រូវបង់លុយចាប់ពី១៥ម៉ឺនរៀលទៅ២០ម៉ឺនរៀល ហើយម្ចាស់រថយន្តក្រុងមិនអាចតវ៉ាបានទេ។ ហេតុនេះហើយទើបមានការអំពាវនាវឲ្យថ្នាក់ដឹកនាំក្រសួងសេដ្ឋកិច្ចនិងហិរញ្ញវត្ថុ ក៏ដូចជាមេគយធំៗក្នុងអគ្គនាយកដ្ឋានគយនិងរដ្ឋាករ ចាត់វិធានការទប់ស្កាត់អំពើពុករលួយរបស់លោក សាំង ណន មេគយចល័តនៅចំណុចភូមិកូនដំរី ជាបន្ទាន់។បឋម
Recent Comments