ប្រភពពីសកម្មជនព្រៃឈើ និងមន្ត្រីអង្គការក្រៅរដ្ឋាភិបាលក៏ ដូចជាមន្ត្រីរាជការក្នុងខេត្តមណ្ឌលគិរី បានឲ្យដឹងថា លោក ទិន ស៊ីន មេបញ្ជាការនគរបាល វរការពារព្រំដែនលេខ៣០៣ គឺជាមេខ្លោងមានជំនាញក្នុង រឿងរត់ការបើកផ្លូវឲ្យក្រុមឈ្មួញ ដឹកជញ្ជូនឈើចេញទៅស្រុកយួន ។ ទន្ទឹមនឹងនេះមានអ្នកជាប់ពាក់ព័ន្ធជាច្រើននាក់ទៀត ក្នុងនោះក៏មានសាច់ញាតិរបស់លោក ស្វាយ សំអ៊ាង អភិបាលខេត្តមណ្ឌលគិរី ផងដែរទើបអ្វីៗអាចប្រព្រឹត្តទៅដោយរលូន ហើយក្រុមឈ្មួញអាចដឹកជញ្ជូនឈើទៅដល់គោលដៅយ៉ាងស្រួលៗតែម្តង។ លើសនេះទៅទៀតមានមន្ត្រីយោធាការពារព្រំដែនពាក់ស័ក្ដិ៥ ឈ្មោះ សុផាត សេរីវុទ្ធី ឃុបឃិតសម្របសម្រួលឲ្យឈ្មួញដឹកជញ្ជូនឈើចេញទៅស្រុកយួនតាមច្រកដាក់ដាំ។
តាមការបង្ហើបពីមន្ត្រីយោធាក្នុងខេត្តមណ្ឌលគិរី បានឲ្យដឹងថា ថ្មីៗកន្លងទៅនេះលោក ទិន ស៊ីន មេបញ្ជាការនគរបាលវរការពារព្រំដែនលេខ៣០៣ បានជិះរថយន្តឡិចស៊ីស៥៧០ ពណ៌ខ្មៅ ពាក់ស្លាកលេខ៩៩(រថយន្តស្លាកលេខប្រទេសឡាវ) ជាមួយថៅកែឈើជនជាតិយួនដើម្បីរត់ការបើកផ្លូវឲ្យឈ្មួញយួនប្រមូលទិញឈើនិងដឹកជញ្ជូនឈើចេញទៅស្រុកយួន ។ ប្រភពបានឲ្យដឹងទៀតថា ថៅកែជនជាតិយួនឈ្មោះ ទិន និងឈ្មោះ ហួង តែងតែអួតអាងជាសាធារណៈថា ពួកគេមិនព្រួយបារម្ភពីការបង្ក្រាបនោះទេព្រោះលោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី គឺជាខ្នងបង្អែករបស់ពួកគេ?។ ឈ្មួញយួនឈ្មោះ ទិន និងឈ្មួញ ហួង បានអួតអាងប្រាប់សមត្ថកិច្ចខ្មែរក្នុងស្រុកអូររាំង ថាពួកគេចំណាយលុយរហូតដល់១លានដុល្លារ?ដើម្បីអាចដឹកឈើចេញពីខេត្តមណ្ឌលគិរី តាមអ្វីដែលបានគ្រោងទុក។
ប្រភពពីសមត្ថកិច្ចនគរបាលក្នុងស្នងការដ្ឋាននគរបាលខេត្តមណ្ឌលគិរី មួយចំនួនបានឲ្យដឹងថា បច្ចុប្បន្ននេះក្រុមឈ្មួញជាជនជាតិខ្មែរនិងជនជាតិយួនច្រើននាក់នៅតែបន្តប្រមូលទិញឈើក្នុងខេត្តមណ្ឌលគិរី ហើយដឹកជញ្ជូនចេញទៅស្រុកយួនតាមច្រកទ្វេភាគីដាក់ដាំ ស្រុកអូររាំង យ៉ាងរលូន។ ប្រភពបានឲ្យដឹងទៀតថា បច្ចុប្បន្នមានថៅកែជនជាតិយួន២នាក់ឈ្មោះ ទិន និងឈ្មួញ ហួង បានចំណាយលុយរាប់សែនដុល្លារឲ្យលោក ទិន ស៊ីន មេបញ្ជាការនគរបាលវរការពារព្រំដែនលេខ៣០៣ ជាអ្នកចាត់ចែងរត់ការបើកផ្លូវឲ្យពួកគេអាចដឹកជញ្ជូនឈើពីខេត្តមណ្ឌលគិរី ចេញទៅស្រុកយួនដោយគ្មានឧបសគ្គ។ ប្រការនេះហើយទើបគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការបង្ក្រាបក្រុមឈ្មួញជនជាតិខ្មែរនិងជនជាតិយួនដែលសម្រុកដឹកជញ្ជូនឈើចេញទៅស្រុកយួនតាមច្រកដាក់ដាំ យ៉ាងពេញបន្ទុក។(បឋម)
Recent Comments