ប្រជាសហគមន៍ការពារព្រៃឈើ ក្នុងស្រុកកែវសីមា ក៏ដូច ជាមន្ត្រីអង្គការក្រៅរដ្ឋាភិបាល ក្នុងខេត្តមណ្ឌលគិរី បានឲ្យដឹង ថា កាលពីយប់ថ្ងៃ ទី២៤ ខែសីហា ឆ្នាំ២០១៨ មានរថយន្តនិងម៉ូតូជាច្រើនគ្រឿង ដឹកជញ្ជូនឈើចេញ ពីតំបន់អភិ រក្សជីវៈចម្រុះ កែវសីមា ដែលគ្រប់គ្រងដោយលោក ឌិន ប៊ុនធឿន ដែលជា អ្នកទទួលបន្ទុកការពារព្រៃ ឈើក្នុងតំបន់នេះ។ ប្រភពបានឲ្យដឹងទៀតថា ប្រសិនបើគ្មានការឃុបឃិតបើកដៃពីសំណាក់លោក ឌិន ប៊ុនធឿន នាយកតំបន់អភិរក្សជីវៈចម្រុះកែវសីមា ទេនោះគឺក្រុមឈ្មួញនិងក្រុមជនល្មើសមិនអាចចូលកាប់ឈើបានឡើយ ហើយអ្វីដែលគួរឲ្យកត់សម្គាល់នោះ គឺលោក ឌិន ប៊ុនធឿន បានចាត់តាំងឲ្យកូនចៅក្រោមឱវាទចាំប្រមូលលុយពីក្រុមឈ្មួញយ៉ាងសុខស្រួលផងដែរ។ មន្ត្រីអង្គការក្រៅរដ្ឋាភិបាលបានឲ្យដឹងថា គ្រប់ច្រកចេញពីតំបន់អភិរក្សជីវៈចម្រុះកែវសីមា និងផ្លូវសាលាស្រុកកែវសីមាចាស់ គឺលោក ឌិន ប៊ុនធឿន បានចាត់តាំងឲ្យកូនចៅឈ្មោះ ឌុច រ៉ាដូច ចាំប្រមូលលុយពីក្រុមឈ្មួញដឹកជញ្ជូនឈើជាប្រចាំ។
ប្រភពពីប្រជាសហគមន៍ការពារព្រៃឈើនៅស្រុកកែវសីមា ខេត្តមណ្ឌលគិរី បានឲ្យដឹងថា បច្ចុប្បន្នឈ្មួញជាច្រើននាក់កំពុងសម្រុកកាប់ឈើនិងដឹកជញ្ជូនឈើចេញពីតំបន់អភិរក្សជីវៈចម្រុះកែវសីមា តាមរថយន្តកែច្នៃនិងតាមម៉ូតូយ៉ាងគគ្រឹកគគ្រេង ព្រោះគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ។ ប្រភពបានឲ្យដឹងទៀតថា លោក ឌិន ប៊ុនធឿន នាយកតំបន់អភិរក្សជីវៈចម្រុះកែវសីមា និងបក្ខពួកគឺជាអ្នកឃុបឃិតឲ្យក្រុមឈ្មួញ ក្រុមជនល្មើសកាប់ឈើ ដឹកជញ្ជូនឈើខុសច្បាប់យ៉ាងរាលដាលដើម្បីជាថ្នូរនឹងផលប្រយោជន៍។ លើសនេះទៅទៀតការដែលលោក ឌិន ប៊ុនធឿន ហ៊ានធ្វើអ្វីៗតាមអំពើចិត្តរបស់ខ្លួន គឺមានការឃុបឃិតបើកដៃពីសំណាក់លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី ដែលល្បីល្បាញខាងប្រព្រឹត្តអំពើពុករលួយជាយូរមកហើយ ។
ជុំវិបញ្ហាខាងលើនេះប្រជាពលរដ្ឋក្នុងស្រុកកែវសីមា ខេត្តមណ្ឌលគិរី បានអំពាវនាវឲ្យលោក សាយ សំអាល់ រដ្ឋមន្ត្រីក្រសួងបរិស្ថាន ចាត់វិធានការទប់ស្កាត់បទល្មើសបំផ្លាញព្រៃឈើនៅក្នុងតំបន់អភិរក្សជីវៈចម្រុះកែវសីមា ជាបន្ទាន់ហើយគួរចាត់វិធានការលើមន្ត្រីបរិស្ថាន ដែលជាប់ពាក់ព័ន្ធអំពើពុករលួយ ផងដែរ។ ដោយហេតុថារយៈពេលប្រមាណ១ខែកន្លងទៅនេះលោក ឌិន ប៊ុនធឿន នាយកតំបន់អភិរក្សជីវៈចម្រុះកែវសីមា បានឃុបឃិតបើកដៃឲ្យឈ្មួញនិងក្រុមជនល្មើសកាប់ឈើ ដឹកជញ្ជូនឈើតាមរថយន្តនិងតាមម៉ូតូចេញពីតំបន់អភិរក្សជីវៈចម្រុះកែវសីមា ចូលទៅស្រុកស្នួល ខេត្តក្រចេះ ។ ប្រជាសហគមន៍ការពារព្រៃឈើនៅក្នុងស្រុកកែវសីមា បានបញ្ជាក់ទៀតថា ប្រសិនបើគ្មានការឃុបឃិតបើកដៃពីសំណាក់លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរី ទេនោះគឺលោក ឌិន ប៊ុនធឿន នាយកតំបន់អភិរក្សជីវៈចម្រុះកែវសីមា មិនហ៊ានធ្វើអ្វីៗស្រេចតែអំពើចិត្តដូចសព្វថ្ងៃនេះទេ គឺទាល់តែមានការឃុបឃិតជាប្រព័ន្ធទើបអ្វីៗអាចប្រព្រឹត្តទៅដោយរលូន។(មានត)
Recent Comments