មន្ត្រីអង្គការក្រៅរដ្ឋាភិបាល និងសកម្មជនព្រៃឈើក្នុង ខេត្តមណ្ឌលគិរី បានឲ្យដឹងថា ក្នុងចំណោមឈ្មួញ ដែលសម្រុក ដឹកជញ្ជូនឈើចេញ ទៅស្រុកយួនតាមច្រកដាក់ដាំ គឺឈ្មួញឈ្មោះ គួយ សុឃុន ដែលជាប្អូន ប្រុសលោក ស្វាយ សំអ៊ាង អភិបាលខេត្តមណ្ឌលគិរី កំពុងធ្វើសកម្មភាពខ្លាំងក្លាជាងគេ។ សូម្បីតែលោក ឡោ សុខា ស្នងការនគរបាលខេត្តមណ្ឌលគិរី ក៏មិនហ៊ានប៉ះពាល់ឈ្មួញឈ្មោះ គួយ សុឃុន ដែលជាមន្ត្រីនគរបាលនិងជាប្អូនប្រុសលោក ស្វាយ សំអ៊ាង នោះដែរព្រោះមានការយោគយល់ដល់លោក ស្វាយ សំអ៊ាង អភិបាលខេត្តមណ្ឌលគិរី។ ដូច្នេះហើយទើបមានការអំពាវនាវឲ្យថ្នាក់ដឹកនាំក្រសួងមហាផ្ទៃ និងលោក នេត សាវឿន អគ្គស្នងការនគរបាលជាតិ ពិនិត្យមើលទង្វើមិនប្រក្រតីរបស់លោក ស្វាយ សំអ៊ាង អភិបាលខេត្តមណ្ឌលគិរី ជាបន្ទាន់ព្រោះលោក ស្វាយ សំអ៊ាង គឺជាបង្អែករបស់ឈ្មួញដែលល្បីខាងដឹកជញ្ជូនឈើចេញទៅស្រុកយួន។ ជាងនេះទៅទៀតករណីមន្ត្រីនគរបាលឈ្មោះ គួយ សុឃុន ក្លាយជាឈ្មួញដឹកជញ្ជូនឈើចេញទៅស្រុកយួន តាមច្រកដាក់ដាំ យ៉ាងគឃ្លើនគឺកំពុងធ្វើឲ្យប៉ះពាល់ដល់កេរ្តិ៍ឈ្មោះស្ថាប័ននគរបាលជាតិទាំងមូលផងដែរ។
ប្រភពពីសមត្ថកិច្ចពាក់ព័ន្ធក្នុងខេត្តមណ្ឌលគិរី បានឲ្យដឹងថា បច្ចុប្បន្នលោក គួយ សុឃុន ជាមន្ត្រីនគរបាលនិងជាប្អូនប្រុសរបស់លោក ស្វាយ សំអ៊ាង អភិបាលខេត្តមណ្ឌលគិរី នៅតែបន្តសកម្មភាពដឹកជញ្ជូនឈើចេញទៅស្រុកយួនដដែល ។ ប្រភពបានឲ្យដឹងទៀតថា ការដែលឈ្មួញឈ្មោះ គួយ សុឃុន ហ៊ានធ្វើអ្វីៗតាមអំពើចិត្តគឺដោយសារអាងមានលោក ស្វាយ សំអ៊ាង ជាខ្នងបង្អែកដ៏រឹងមាំចាំជួយការពារគ្រប់ពេលវេលា ហើយមានការឃុបឃិតបើកដៃពីសំណាក់លោក យូ សុធា មេនគរបាលអន្តោប្រវេសន៍ច្រកទ្វេភាគីដាក់ដាំ ផងដែរ។ បើតាមប្រភពពីមន្ត្រីនៅច្រកដាក់ដាំ មួយចំនួនបានឲ្យដឹងថា មួយរយៈកន្លងទៅនេះឈ្មួញឈ្មោះ គួយ សុឃុន ដែលជាប្អូនប្រុសរបស់លោក ស្វាយ សំអ៊ាង បានប្រើប្រាស់រថយន្តប្រភេទសាំយ៉ុង ចំនួន៥គ្រឿងសម្រាប់ដឹកជញ្ជូនឈើចេញទៅស្រុកយួនយ៉ាងរលូន។
ប្រភពពីមន្ត្រីនគរបាលនៅក្នុងស្នងការដ្ឋាននគរបាលខេត្តមណ្ឌលគិរី មួយចំនួនបានឲ្យដឹងថា ចាប់តាំងពីយប់ថ្ងៃទី២០ ខែសីហា ឆ្នាំ២០១៨ ឈ្មួញឈ្មោះ គួយ សុឃុន បានដឹកជញ្ជូនឈើចេញទៅស្រុកយួនតាមច្រកដាក់ដាំ ជាបន្តបន្ទាប់ព្រោះគ្មានមន្ត្រីរដ្ឋបាលព្រៃឈើ មន្ត្រីបរិស្ថាន ឬសមត្ថកិច្ចពាក់ព័ន្ធណាហ៊ានប៉ះពាល់ឡើយ។ ប្រភពបានឲ្យដឹងទៀតថា លោក យូ សុធា មេនគរបាលអន្តោប្រវេសន៍ច្រកដាក់ដាំ និងលោក សៀក មុន្នី ប្រធានសា្នក់ការច្រកដាក់ដាំ ស្រុកអូររាំង ខេត្តមណ្ឌលគិរី គឺជាអ្នកសម្របសម្រួលឲ្យឈ្មួញឈ្មោះ គួយ សុឃុន ដឹកជញ្ជូនឈើចេញទៅស្រុកយួនយ៉ាងរលូន។ ប្រការនេះហើយដែលកំពុងធ្វើឲ្យព្រៃឈើនៅក្នុងស្រុកកោះញែក ស្រុកកែវសីមា ស្រុកអូររាំង និងស្រុកពេជ្រាដា កំពុងប្រឈមនឹងការបំផ្លាញយ៉ាងមហន្តរាយ។(មានត)
Recent Comments