ប្រភពពីមន្ត្រីនគរបាលក្រុងប៉ោយប៉ែត បានឲ្យដឹងថា បច្ចុប្បន្ននេះច្រករបៀង ដើមគ ដែលមើលខុស ត្រូវដោយលោក ឈិន ឈៀង មេបញ្ជាការរងអង្គភាព នគរបាលវរការពារព្រំដែនលេខ៨៩១ បានឃុបឃិតឲ្យឈ្មួញនាំ ចូលទំនិញ គេចពន្ធនិងទំនិញខុសច្បាប់ជាច្រើនប្រភេទ ហើយក៏មានការឃុបឃិតជាមួយ សមត្ថកិច្ចសៀមតាម ព្រំដែនផងដែរ។ ទន្ទឹមនឹងនេះឈ្មួញមួយចំនួនបានលួចនាំចេញទំនិញពីស្រុកខ្មែរចេញទៅស្រុកយួនតាមច្រករបៀងដើមគ ហើយឈ្មួញឈ្មោះ ខ្និន ហៅក្អូន ដែលជាប្អូនប្រុសរបស់ចែដាវ គឺជាឈ្មួញដែលនាំចូលនាំចេញទំនិញតាមច្រករបៀងដើមគ យ៉ាងពេញបន្ទុក។ ការដែលឈ្មួញឈ្មោះ ខ្និន ហៅក្អូន អាចធ្វើអ្វីៗតាមអំពើចិត្តគឺមានការឃុបឃិតបើកដៃសម្របសម្រួលពីសំណាក់លោក ហាំ វណ្ណៈ ក៏ដូចជាលោក ឈិន ឈៀង ផងដែរព្រោះពួកគេបែងចែកផលប្រយោជន៍គ្នាយ៉ាងទៀងទាត់។
ប្រភពពីប្រជាពលរដ្ឋរស់នៅក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានឲ្យដឹងថា សមត្ថកិច្ចនគរបាលប្រចាំច្រករបៀងដើមគ ក្នុងភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត នៅតែបើកឲ្យឈ្មួញនាំចូលទំនិញគេចពន្ធ ទំនិញខុសច្បាប់យ៉ាងពេញបន្ទុកដោយគ្មានញញើតអ្វីទាំងអស់។ មន្ត្រីអាជ្ញាធរមូលដ្ឋានក្នុងសង្កាត់ប៉ោយប៉ែត បានឲ្យដឹងថា លោក ហាំ វណ្ណៈ មេបញ្ជាការនគរបាលវរការពារព្រំដែនលេខ៨៩១ មិនញញើតទៅនឹងបទបញ្ជារបស់ថ្នាក់ដឹកនាំក្រសួងមហាផ្ទៃ ដែលតម្រូវឲ្យបិទច្រករបៀងតាមព្រំដែនខ្មែរ-សៀមទាំងអស់នោះទេ។ បើតាមមន្ត្រីនគរបាលក្នុងស្នងការដ្ឋាននគរបាលខេត្តបន្ទាយមានជ័យ បានឲ្យដឹងថា ការដែលលោក ហាំ វណ្ណៈ មេបញ្ជាការនគរបាលវរការពារព្រំដែនលេខ៨៩១ ហ៊ានធ្វើអ្វីៗតាមអំពើចិត្តគឺមានការឃុបឃិតបើកដៃពីសំណាក់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ផងដែរទើបអ្វីៗអាចប្រព្រឹត្តទៅដោយរលូន។
មន្ត្រីអាជ្ញាធរនិងសមត្ថកិច្ចមូលដ្ឋានក្នុងសង្កាត់ប៉ោយប៉ែត បានឲ្យដឹងថា មួយរយៈកន្លងទៅនេះសមត្ថកិច្ចនគរបាលអង្គភាពវរការពារព្រំដែនលេខ៨៩១ ក្រោមការគ្រប់គ្រងរបស់លោក ហាំ វណ្ណៈ នៅតែបើកឲ្យឈ្មួញនាំចូលទំនិញគេចពន្ធ និងទំនិញខុសច្បាប់ចូលតាមច្រករបៀងដើមគ យ៉ាងគឃ្លើន។ ជាងនេះទៅទៀតនៅច្រករបៀងដើមគ ដែលគ្រប់គ្រងដោយលោក ឈិន ឈៀង ជាមនុស្សជំនិតរបស់លោក ហាំ វណ្ណៈ ក៏មានឃុបឃិតឲ្យពលករខ្មែរឆ្លងដែនខុសច្បាប់ចូលទៅរកការងារធ្វើលើទឹកដីសៀមផងដែរ គឺជាការបំពានលើបទបញ្ជារបស់ថ្នាក់ដឹកនាំក្រសួងមហាផ្ទៃ យ៉ាងក្រអឺតក្រទម។ លោក ឈិន ឈៀងត្រូវបានគេដឹងថា ជាអ្នកគ្រប់គ្រងច្រករបៀងដើមគ ហើយជាអ្នកប្រមូលលុយយកទៅចែកគ្នាធ្វើមានធ្វើបានជាមួយលោក ហាំ វណ្ណៈ យ៉ាងសុខស្រួលគ្មានញញើតអ្វីឡើយ។
ចំណែកលោក អាត់ ខែម ស្នងការនគរបាលខេត្តបន្ទាយមានជ័យ ដែលល្បីល្បាញខាងប្រព្រឹត្តអំពើពុករលួយជាយូរមកហើយនោះ ត្រូវប្រភពខ្លះសង្ស័យថា ទទួលបានផលប្រយោជន៍ពីលោក ហាំ វណ្ណៈ និងលោក ឈិន ឈៀង ជាប្រចាំទើបមិនចាត់វិធានការបិទច្រករបៀងដើមគ ឲ្យស្របទៅតាមបទបញ្ជារបស់ថ្នាក់ដឹកនាំក្រសួងមហាផ្ទៃ។បឋម
Recent Comments