ប្រភពពីសកម្មជនព្រៃឈើ និងមន្ត្រីអង្គការក្រៅរដ្ឋាភិបាល ក្នុងខេត្តមណ្ឌលគិរី បាន ឲ្យដឹងថា លោក ជុយ សុឃាង នាយផ្នែករដ្ឋបាល ព្រៃឈើស្រែខ្ទុម លោក ឌិន ប៊ុនធឿន នាយកតំបន់អភិរក្សជីវៈចម្រុះ កែវសីមា និងលោក ស្រ៊ុន ឈួន នាយសង្កាត់រដ្ឋបាលព្រៃឈើស្រែព្រះ គឺជាអ្នកឃុបឃិតឲ្យឈ្មួញចូលកាប់ឈើនិងដឹកជញ្ជូនឈើចេញពីតំបន់អភិរក្សជីវៈចម្រុះកែវសីមា យ៉ាងអនាធិបតេយ្យ។ ឈ្មួញ២នាក់ឈ្មោះ ញ៉ាញ់ និងឈ្មោះ ស្រីលីន គឺជាអ្នកដឹកជញ្ជូនឈើចេញពីស្រុកកែវសីមា ចូលទៅស្រុកយួនតាមច្រកង៉ាំដី យ៉ាងពេញបន្ទុកហើយឈើមួយចំនួនត្រូវគេប្រមូលទិញមកពីស្រុកអូររាំង និងស្រុកកោះញែក ផងដែរ។ ឈ្មួញឈ្មោះ ញ៉ាញ់ និងឈ្មោះ ស្រីលីន ត្រូវបានគេដឹងថាជាអ្នករត់ការប៉ាវផ្ដាច់ច្រកង៉ាំដី ក្នុងការដឹកជញ្ជូនឈើទៅស្រុកយួនព្រោះឈ្មួញ២នាក់នេះបង់លុយតាមការកំណត់របស់មន្ត្រីជំនាញនិងសមត្ថកិច្ចពាក់ព័ន្ធមិនឲ្យទើសចិត្តម្ដងណាឡើយ។
ប្រភពពីមន្ត្រីអាជ្ញាធរនិងសមត្ថកិច្ចមូលដ្ឋានក្នុងស្រុកកែវសីមា បានឲ្យដឹងថា បច្ចុប្បន្នមានឈ្មួញ២នាក់ឈ្មោះ ញ៉ាញ់ និងឈ្មោះ ស្រីលីន កំពុងសម្រុកដឹកឈើចេញពីតំបន់អភិរក្សជីវៈចម្រុះកែវសីមា និងពីតំបន់ផ្សេងៗទៀតចេញទៅស្រុកយួនយ៉ាងគគ្រឹកគគ្រេងដោយសារមានការឃុបឃិតបើកដៃពីសំណាក់មន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធជាច្រើនស្ថាប័ន។ លោក ស្វាយ សំអ៊ាង អភិបាលខេត្តមណ្ឌលគិរី លោកឧត្តមសេនីយ៍ត្រី ឡោ សុខា ស្នងការនគរបាលខេត្តមណ្ឌលគិរី និងលោក អ៊ុំ វណ្ណសុភ័គ នាយខណ្ឌរដ្ឋបាលព្រៃឈើខេត្តមណ្ឌលគិរី បានរក្សាភាពស្ងៀមស្ងាត់ក្នុងខណៈដែលឈ្មួញបន្តសម្រុកដឹកឈើចេញទៅស្រុកយួនដោយគ្មានញញើតអ្វីទាំងអស់។ ដូច្នេះហើយទើបមានការអំពាវនាវឲ្យលោក វេង សាខុន រដ្ឋមន្ត្រីក្រសួងកសិកម្ម និងលោក អ៊ុង សំអាត ប្រធានរដ្ឋបាលព្រៃឈើនៃក្រសួងកសិកម្ម ពិនិត្យមើលសកម្មភាពឈ្មួញដឹកជញ្ជូនឈើចេញពីខេត្តមណ្ឌលគិរី យ៉ាងគគ្រឹកគគ្រេងនោះខ្លះផង។
តាមរយៈការឃុបឃិតបើកដៃឲ្យឈ្មួញឈ្មោះ ញ៉ាញ់ និងឈ្មួញឈ្មោះ ស្រីលីន ដឹកជញ្ជូនឈើចេញទៅស្រុកយួនតាមច្រកង៉ាំដី យ៉ាងពេញបន្ទុកគឺលោក ជុយ សុឃាង នាយផ្នែករដ្ឋបាលព្រៃឈើស្រែខ្ទុម លោក ឌិន ប៊ុនធឿន នាយកតំបន់អភិរក្សជីវៈចម្រុះកែវសីមា និងលោក ស្រ៊ុន ឈួន នាយសង្កាត់រដ្ឋបាលព្រៃឈើស្រែព្រះ អាចប្រមូលលុយតាមរបៀបពុករលួយបានយ៉ាងច្រើន។ ហេតុនេះហើយទើបឈ្មួញឈ្មោះ ញ៉ាញ់ និងឈ្មួញឈ្មោះ ស្រីលីន នៅតែអាចដឹកជញ្ជូនឈើចេញទៅស្រុកយួនដោយគ្មានការរំខានព្រោះសូម្បីតែលោក ឡោ សុខា ស្នងការនគរបាលខេត្តមណ្ឌលគិរី និងលោក ស្វាយ សំអ៊ាង អភិបាលខេត្តមណ្ឌលគិរី ក៏រក្សាភាពស្ងៀមស្ងាត់ដើម្បីផលប្រយោជន៍ដែរ។ ប្រភពខ្លះបានឲ្យដឹងថា លោក កែវ សុភ័គ ប្រធានមន្ទីរបរិស្ថានខេត្តមណ្ឌលគិរី គឺជាអ្នកបើកដៃឲ្យលោក ឌិន ប៊ុនធឿន នាយកតំបន់អភិរក្សជីវៈចម្រុះកែវសីមា ឃុបឃិតឲ្យឈ្មួញកាប់ឈើនិងដឹកជញ្ជូនឈើខុសច្បាប់ចេញពីតំបន់អភិរក្សយ៉ាងពេញបន្ទុក។ បឋម
Recent Comments