សេចក្ដីរាយការណ៍ ពីមន្ត្រីគយក្នុងខេត្តព្រះសីហនុ មួយចំនួនបានឲ្យដឹងថា បន្ទាប់ពីលោក នុប សំអាន ទទួលបាន តំណែងជាប្រធាន ការិ យា ល័យគយប្រចាំច្រកទំនប់រលក រួចមកគឺលោក នុប សំអាន បានឃុបឃិត ឲ្យឈ្មួញនាំចូលទំនិញគេចពន្ធ ទំនិញខុសច្បាប់កាន់តែច្រើន ឡើងៗ។ ក្នុងមួយថ្ងៃៗមានទូក ជាច្រើនគ្រឿងចូលផ្ទេរទំនិញដាក់ រថយន្តនៅច្រកទំនប់រលក ហើយ ដឹកជញ្ជូនចេញយ៉ាង រលូនដោយពុំមានការត្រួតពិនិត្យឲ្យបានត្រឹមត្រូវនោះទេ ព្រោះលោក នុប សំអាន បានជួយសម្របសម្រួលដល់ក្រុមឈ្មួញរួចទៅហើយ។ ចំណែកមន្ត្រីគយចល័តក្នុងខេត្តព្រះសីហនុ ក៏ដូចជាមន្ត្រីគយចល័តលើផ្លូវជាតិលេខ៤ ទំនងជាទទួលបានផលប្រយោជន៍ពីលោក នុប សំអាន ផងដែរទើបឃុបឃិតឲ្យឈ្មួញដឹកជញ្ជូនទំនិញគេចពន្ធ និងទំនិញខុសច្បាប់ចូលមករាជធានីភ្នំពេញ យ៉ាងសុខស្រួល។ អាចនិយាយបានថា ក្រោយពេលទទួលបានតំណែងជាប្រធានការិយាល័យគយច្រកទំនប់រលក រួចមកគឺលោក នុប សំអាន និងបក្ខពួកកំពុងប្រព្រឹត្តអំពើពុករលួយយ៉ាងពេញបន្ទុក ដូច្នេះលោក អូន ព័ន្ធមុនីរ័ត្ន រដ្ឋមន្ត្រីក្រសួងហិរញ្ញវត្ថុ ក៏ដូចជាលោក គុណ ញឹម គួរចាត់វិធានការទប់ស្កាត់ជាបន្ទាន់។
តាមប្រភពពីមន្ត្រីគយនិងភ្នាក់ងារគយនៅក្នុងខេត្តព្រះសីហនុ មួយចំនួនបានឲ្យដឹងថា មេគយច្រកទំនប់រលក ដែលទើបចូលកាន់តំណែងកាលពីពេលថ្មីៗនេះគឺលោក នុប សំអាន កំពុងសាងស្នាដៃក្នុងការប្រព្រឹត្តអំពើពុករលួយដោយគ្មានញញើតអ្វីទាំងអស់។ ប្រភពបានឲ្យដឹងទៀតថាលោក នុប សំអាន ប្រធានការិយាល័យគយច្រកទំនប់រលក កំពុងឃុបឃិតឲ្យឈ្មួញនាំចូលទំនិញគេចពន្ធនិងទំនិញបង់ពន្ធមិនគ្រប់ ក៏ដូចជាទំនិញខុសច្បាប់យ៉ាងពេញបន្ទុកដើម្បីជាថ្នូរនឹងផលប្រយោជន៍។
មន្ត្រីគយក្នុងខេត្តព្រះសីហនុ ខ្លះបានបង្ហើបឲ្យដឹងថា ដោយសារលោក នុប សំអានចំណាយដើមទុនយ៉ាងច្រើនក្នុងការទទួលបានតំណែងជាប្រធានការិយាល័យគយច្រកទំនប់រលក ទើបខំប្រឹងប្រព្រឹត្តអំពើពុករលួយប្រមូលលុយស្រង់ដើម ។
មន្ត្រីនៅច្រកផែទំនប់រលក ឬផែ សូ ជុងហួរ ក្នុងសង្កាត់លេខ១ ក្រុងព្រះសីហនុ បានឲ្យដឹងថា កំពង់ផែនេះគឺជាកន្លែងដែលឈ្មួញនាំចូលទំនិញគេចពន្ធ និងទំនិញខុសច្បាប់ជាច្រើនប្រភេទស្រេចតែអំពើចិត្តព្រោះលោក នុប សំអាន គិតតែពីរឿងប្រមូលលុយដាក់ហោប៉ៅ។ ទំនិញគេចពន្ធច្រើនប្រភេទដែលឈ្មួញខិលខូចនាំចូលតាមច្រកនេះមានដូចជា ម៉ូតូទំនើបៗ គ្រឿងអេឡិចត្រូនិក ស្រាថ្លៃៗ គ្រឿងសំអាង និងទូរស័ព្ទដៃទំនើបៗទៀតផង។ លោក នុប សំអាន ប្រធានការិយាល័យគយច្រកទំនប់រលក មិនត្រឹមតែមិនចាត់វិធានការបង្ក្រាបក្រុមឈ្មួញនាំចូលទំនិញគេចពន្ធ និងទំនិញខុសច្បាប់នោះទេគឺបែរជាឃុបឃិតសម្របសម្រួលដើម្បីជាថ្នូរនឹងផលប្រយោជន៍ផ្ទាល់ខ្លួន។ ប្រការនេះបានធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក គុណ ញឹម ដែលជាមេគយធំមិនគួរមើលរំលងបញ្ហានេះឡើយ។បឋម
Recent Comments