ប្រភពព័ត៌មានពី ប្រជាពលរដ្ឋរស់នៅតាមតំបន់ ព្រំដែនក្នុងស្រុកអូរយ៉ាដាវ បានឲ្យដឹងថា រយៈពេលប្រមាណ១សប្ដាហ៍ កន្លងទៅនេះក្រោយ ពេលឈ្មួញយួនលួចធ្វើផ្លូវឆ្លង ចូលទឹកដីយួនរួចមក គឺសកម្មភាពដឹកជញ្ជូន ឈើប្រភេទ សុក្រំនិងឈើឈ្លីក ចេញទៅស្រុកយួន កំពុងកើត ឡើងយ៉ាងពេញបន្ទុកតែម្តង។ តាមរយៈការបើក ដៃឲ្យឈ្មួញយួន ចូលមកប្រមូលទិញឈើនិងដឹកជញ្ជូនឈើចេញទៅស្រុកយួនតាមច្រករបៀងលេខ១៩ ច្រករបៀងភ្នំក្រហម គឺលោក ងួន សុវណ្ណា មេបញ្ជាការនគរបាលវរការពារព្រំដែនលេខ៦២៣ និងលោក អ៊ុក សុធី មេបញ្ជាការយោធាវរការពារព្រំដែនលេខ១០២ ក៏ដូចជាមន្ត្រីរដ្ឋបាលព្រៃឈើប្រចាំតំបន់នេះអាចប្រមូលលុយបានយ៉ាងច្រើន។ សកម្មភាពឈ្មួញដឹកជញ្ជូនឈើចេញទៅស្រុកយួនតាមច្រករបៀងលេខ១៩ ច្រករបៀងភ្នំក្រហម កំពុងធ្វើឲ្យព្រៃឈើដែលនៅសេសសល់ក្នុងខេត្តរតនគិរី ត្រូវប្រឈមនឹងសេចក្ដីវិនាស ព្រោះលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី និងសមត្ថកិច្ចពាក់ព័ន្ធដទៃទៀតកំពុងរក្សាភាពស្ងៀមស្ងាត់។
ប្រភពពីមន្ត្រីអាជ្ញាធរនិងសមត្ថកិច្ចមូលដ្ឋានក្នុងស្រុកអូរយ៉ាដាវ ខេត្តរតនគិរី បានឲ្យដឹងថា មួយរយៈពេលចុងក្រោយនេះឈ្មួញច្រើននាក់បានសម្រុកដឹកឈើចេញទៅស្រុកយួនតាមច្រករបៀងលេខ១៩ ច្រករបៀងភ្នំក្រហម ស្រុកអូរយ៉ាដាវ យ៉ាងពេញបន្ទុកជាពិសេសគឺនៅពេលយប់។ ប្រភពបានឲ្យដឹងទៀតថា ក្នុងមួយយប់ៗមានរថយន្តឡង់គ្រឺស័រកែច្នៃតទ្រុង១០ទៅ១៥គ្រឿង និងម៉ូតូរាប់រយគ្រឿងសម្រុកដឹកជញ្ជូនឈើប្រភេទសុក្រំ ឈើឈ្លីក ចេញទៅស្រុកយួនឆ្លងកាត់ច្រករបៀងលេខ១៩ ច្រកភ្នំក្រហម ដោយគ្មានមន្ត្រីរដ្ឋបាលព្រៃឈើឬសមត្ថកិច្ចពាក់ព័ន្ធណាចាត់វិធានការបង្ក្រាបនោះទេ។ ច្រករបៀងខាងលើនោះគ្រប់គ្រងដោយនគរបាលវរការពារព្រំដែនលេខ៦២៣ ដែលមានលោក ងួន សុវណ្ណា ជាមេបញ្ជាការ និងយោធាវរការពារព្រំដែនលេខ១០២ ដែលមានលោក អ៊ុក សុធី ជាមេបញ្ជាការ។
ប្រជាសហគមន៍ការពារព្រៃឈើនៅតំបន់ព្រំដែនក្នុងឃុំប៉ក់ញ៉ៃ ស្រុកអូរយ៉ាដាវ បានឲ្យដឹងថា ប្រសិនបើគ្មានការឃុបឃិតបើកដៃពីសំណាក់លោក ងួន សុវណ្ណា មេបញ្ជាការនគរបាលវរការពារព្រំដែនលេខ៦២៣ និងលោក អ៊ុក សុធី មេបញ្ជាការយោធាវរការពារព្រំដែនលេខ១០២ ទេនោះគឺគ្មានឈ្មួញណាអាចដឹកជញ្ជូនឈើចេញទៅស្រុកយួនតាមច្រករបៀងលេខ១៩ ច្រករបៀងភ្នំក្រហមបានឡើយ។ មន្ត្រីអាជ្ញាធរមូលដ្ឋានក៏បានឲ្យដឹងដែរថា មានជនជាតិយួនចូលមកប្រមូលទិញឈើនិងដឹកជញ្ជូនឈើចេញទៅស្រុកយួនយ៉ាងពេញបន្ទុកដោយមានសមត្ថកិច្ចនិងមន្ត្រីពាក់ព័ន្ធជាអ្នកជួយសម្របសម្រួលដើម្បីជាថ្នូរនឹងផលប្រយោជន៍។ មន្ត្រីនគរបាលម្នាក់ឈ្មោះ ចាន់ ដារ៉ា ត្រូវបានគេដឹងថា ជាអ្នកឃុបឃិតធ្វើជាខ្នងបង្អែកឲ្យឈ្មួញយួនចូលមកធ្វើផ្លូវឆ្លងចូលទឹកដីយួនដើម្បីងាយស្រួលក្នុងការដឹកជញ្ជូនឈើពីទឹកដីខ្មែរចូលទឹកដីយួនយ៉ាងរលូនតែម្តង។បឋម
Recent Comments