អំពើអាក្រក់ដែលលោក គឹម ប៊ុនណា និងបក្ខពួកកំពុងតែប្រព្រឹត្តយ៉ាងគឃ្លើននោះ គឺការគាបសង្កត់យកលុយ ពីឈ្មួញតូច តាច អាជីវករ និងពលរដ្ឋដែល ដឹកជញ្ជូនទំនិញឆ្លងកាត់ផ្លូវជាតិលេខ៦ ពីខេត្តសៀមរាប ចូលខេត្តកំពង់ធំ និងពីខេត្តកំពង់ ធំ ចូល ខេត្តសៀមរាប បើទោះបីរថយន្តផ្ទុក ទំនិញមិនលើសទម្ងន់ហើយគោរពតាមបទដ្ឋាន បច្ចេកទេសយ៉ាងណាក៏ ដោយ។ ប៉ុន្តែលោក គឹម ប៊ុនណា និងបរិវារមិនហ៊ានប៉ះពាល់ឈ្មួញប្រើប្រាស់រថយន្តធំៗដឹកជញ្ជូនទំនិញ ដឹកអាចម៍ដី ដឹកខ្សាច់ ដឹកថ្ម ដែលផ្ទុកលើសចំណុះ មិនគោរពតាមលក្ខណៈបច្ចេកទេសធ្វើឲ្យខូចផ្លូវជាបន្តបន្ទាប់នោះទេ។ ការដែលលោក គឹម ប៊ុនណា ប្រធានសា្ថនីយ៍ជញ្ជីងថ្លឹងរថយន្តលើផ្លូវជាតិលេខ៦ ហ៊ានធ្វើអ្វីៗតាមអំពើចិត្ត គឺមានការឃុបឃិតបើកដៃពីថ្នាក់លើផងដែរ ទើបគេហ៊ានប្រព្រឹត្តអំពើពុករលួយយ៉ាងកំរោល។ ដូច្នេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលធ្លាប់ប្ដេជ្ញាលុបបំបាត់អំពើពុករលួយនៅលើដងផ្លូវនោះ មិនគួរមើលរំលងអំពើពុករលួយរបស់លោក គឹម ប៊ុនណា និងបក្ខពួកបរិវារឡើយ ព្រោះលោក គឹម ប៊ុនណា និងបរិវារកំពុងប្រើតួនាទីនិងអំណាចប្រព្រឹត្តអំពើពុករលួយលើដងផ្លូវ។
រឿងអាស្រូវពុករលួយរបស់លោក គឹម ប៊ុនណា ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៦ ក្នុងឃុំរលួសកើត ស្រុកប្រាសាទបាគង ខេត្តសៀមរាប ត្រូវបានលាតត្រដាងជាសាធារណៈកាលពីពេលថ្មីៗនេះ។ ដូច្នេះលោក ស៊ុន ចាន់ថុល ដែលជារដ្ឋមន្ត្រីក្រសួងសាធារណការនិងដឹកជញ្ជូន មិនគួរបណ្ដែតបណ្ដោយមន្ត្រីក្រោមឱវាទប្រើតួនាទីនិងអំណាចប្រព្រឹត្តអំពើពុករលួយយ៉ាងពេញបន្ទុកតទៅទៀតទេ។ ប្រសិនបើលោក ស៊ុន ចាន់ថុល នៅតែបណ្ដែតបណ្ដោយតទៅទៀតនោះ មានន័យថាលោក ស៊ុន ចាន់ថុល គឺជាអ្នកឃុបឃិតបើកដៃឲ្យលោក គឹម ប៊ុនណា ធ្វើអ្វីៗតាមអំពើចិត្តហើយមានការបែងចែកផលប្រយោជន៍យ៉ាងសុខស្រួលតែម្តង។
ក្រុមឈ្មួញរកស៊ីដឹកជញ្ជូនទំនិញឆ្លងកាត់ផ្លូវជាតិលេខ៦ ក៏ដូចជាពលរដ្ឋដែលរកស៊ីដឹកដី ដឹកខ្សាច់ ដឹកថ្ម បានឲ្យដឹងថាលោក គឹម ប៊ុនណា ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៦ ត្រង់ចំណុចភូមិអូរចិញ្ចៀន ឃុំរលួសកើត ស្រុកប្រាសាទបាគង ខេត្តសៀមរាប កំពុងប្រើអំណាចប្រមូលលុយតាមរបៀបពុករលួយ ។ ប្រភពបានឲ្យដឹងទៀតថា ទោះបីពួកគាត់ដឹកជញ្ជូនទំនិញ ដឹកដី ដឹកខ្សាច់ ដឹកថ្ម មិនលើសទម្ងន់ក៏ដោយ ក៏ត្រូវមន្ត្រីប្រចាំស្ថានីយ៍ជញ្ជីងថ្លឹងរថយន្តក្រោមការគ្រប់គ្រងរបស់លោក គឹម ប៊ុនណា គាបយកលុយតាមរបៀបពុករលួយយ៉ាងកំរោលដែរ។ ហេតុនេះហើយទើបក្រុមឈ្មួញ ក្រុមអាជីវករ និងប្រជាពលរដ្ឋអំពាវនាវឲ្យលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ចាត់វិធានការទប់ស្កាត់អំពើពុករលួយរបស់លោក គឹម ប៊ុនណា និងបក្ខពួកជាបន្ទាន់។
ឈ្មួញតូចៗដឹកជញ្ជូនទំនិញឆ្លងកាត់ស្ថានីយ៍ជញ្ជីងថ្លឹងរថយន្តខាងលើ បានឲ្យដឹងថា បើទោះបីរថយន្តពួកគាត់ដឹកជញ្ជូនទំនិញមិនលើសទម្ងន់ ក៏ចៀសមិនផុតពីត្រូវក្រុមលោក គឹម ប៊ុនណា ប្រើលេសគាបយកលុយតាមរបៀបពុករលួយនោះទេ។ ចំណែកឈ្មួញធំៗដែលដឹកទំនិញតាមរថយន្តធំៗលើសចំណុះស្ទើរស្រុតផ្លូវជាតិលេខ៦ទៅហើយ ប៉ុន្តែមិនឃើញលោក គឹម ប៊ុនណា និងបក្ខពួកហ៊ានប៉ះពាល់ឈ្មួញទាំងនោះទេ។ ប្រការនេះហើយទើបប្រជាពលរដ្ឋនិងឈ្មួញតូចតាចបើកកកាយរឿងអាស្រូវពុករលួយរបស់លោក គឹម ប៊ុនណា ប្រធានស្ថានីយ៍ជញ្ជីងថ្លឹងរថយន្តលើផ្លូវជាតិលេខ៦ ក្នុងភូមិអូរចិញ្ចៀន ឃុំរលួសកើត ស្រុកប្រាសាទបាគង ជាសាធារណៈតែម្តង។ បច្ចុប្បន្នលោក គឹម ប៊ុនណា ត្រូវគេដាក់រហស្សនាមថាជាប្រធានស្ថានីយ៍ជញ្ជីងថ្លឹងរថយន្តមុខលុយដែលប្រព្រឹត្តអំពើពុករលួយដល់ឆ្អឹង។បឋម
Recent Comments