តំណាងប្រជាពល រដ្ឋក្នុងភូមិអង្គតាឡឹក ឃុំសំបូរ ស្រុកសំរោងទង ខេត្តកំពង់ស្ពឺ បានឲ្យដឹងទៀតថា ក្រុមហ៊ុន ភឺន ផល្លា មកទិញដីចម្ការ ក្នុងមូលដ្ឋានពួកគាត់ ហើយបានយកគ្រឿងច ក្រជាច្រើនគ្រឿងមកកាយរ ណ្ដៅដីធ្វើអា ជីវកម្ម ដែលមានទទឹង៥០ម៉ែត្រនិងបណ្ដោយ ៥០០ម៉ែត្រ ហើយបច្ចុប្បន្នរណ្ដៅ ដីនោះមានជម្រៅពី១២ ទៅ១៥ម៉ែត្រ។ តាម ច្បាប់កំណត់គឺឈ្មួញអាចជីករណ្ដៅដីបានត្រឹមជម្រៅ៥ម៉ែត្រទៅ៦ម៉ែត្រប៉ុណ្ណោះ ប៉ុន្តែជាក់ស្ដែងក្រុមហ៊ុន ភឺន ផល្លា ជីករណ្ដៅដីដែលមានជម្រៅពី១២ទៅ១៥ម៉ែត្ររួចទៅហើយដោយមិនឃើញមានការត្រួតពិនិត្យពីសំណាក់មន្ត្រីមន្ទីររ៉ែនិងថាមពលខេត្តកំពង់ស្ពឺនៅឡើយទេ។ ជាងនេះទៅទៀតរណ្ដៅដីក្រុមហ៊ុន ភឺន ផល្លា គឺជីកត្រង់ពីលើចុះក្រោមគ្មានជើងទេរដើម្បីការពារការបាក់ស្រុតដីចូលទៅក្នុងរណ្ដៅដីនោះឡើយ។ បញ្ហានេះធ្វើឲ្យប្រជាពលរដ្ឋក្នុងភូមិអង្គតាឡឹក ព្រួយបារម្ភក្លាយបាក់ដីស្រែចម្ការពួកគាត់ចូលទៅក្នុងរណ្ដៅដីនោះ ហើយក៏អាចបង្កគ្រោះថ្នាក់ដល់ក្មេងៗដែលឃ្វាលគោក្របី ហើយសត្វពាហនៈក៏អាចធ្លាក់ចូលក្នុងរណ្ដៅដីនោះដែរ។
ប្រភពពីប្រជាពលរដ្ឋរស់នៅភូមិអង្គតាឡឹក ឃុំសំបូរ ស្រុកប្រាសាទបាគង បានឲ្យដឹងថា កាលពីថ្ងៃទី៣០ ខែមករា ឆ្នាំ២០១៨ ក្រុមហ៊ុន ភឺន ផល្លា បានយកគ្រឿងចក្រមកជីកកកាយជារណ្ដៅដីក្នុងមូលដ្ឋានពួកគាត់មានជម្រៅយ៉ាងជ្រៅ ហើយគ្មានមន្ត្រីអាជ្ញាធរឬមន្ត្រីមន្ទីរពាក់ព័ន្ធចាត់វិធានការទប់ស្កាត់នោះទេ។ ហេតុនេះហើយទើបប្រជាពលរដ្ឋអំពាវនាវឲ្យលោក វ៉ី សំណាង អភិបាលខេត្តកំពង់ស្ពឺ និងលោក ស៊ុយ សែម រដ្ឋមន្ត្រីក្រសួងរ៉ែនិងថាមពល ចាត់វិធានការទប់ស្កាត់ជាបនន្ទាន់។ ប្រជាពលរដ្ឋបានលើកឡើងទៀតថា អាជីវកម្មរណ្ដៅដីរបស់ក្រុមហ៊ុន ភឺន ផល្លា មិនអនុវត្តន៍តាមបទដ្ឋានបច្ចេកទេសទេ ហើយការដែលក្រុមហ៊ុននេះហ៊ានធ្វើអ្វីៗតាមអំពើចិត្ត គឺអាចមានការឃុបឃិតបើកដៃពីសំណាក់ប្រធានមន្ទីររ៉ែនិងថាមពលខេត្តកំពង់ស្ពឺ ផងដែរ។
ការដែលមន្ត្រីអាជ្ញាធរមូលដ្ឋានថ្នាក់ឃុំ ថ្នាក់ស្រុក និងមន្ត្រីមន្ទីររ៉ែនិងថាមពលខេត្តកំពង់ស្ពឺ រក្សាភាពស្ងៀមស្ងាត់ទុកឲ្យក្រុមហ៊ុន ភឺន ផល្លា ជម្រៅដល់ក្បាលប្រេតគឺត្រូវមជ្ឈដ្ឋាននានាសង្ស័យថា អាចជាប់ពាក់ព័ន្ធទៅនឹងអំពើពើពុករលួយ។ ក្នុងនោះប្រធានមន្ទីររ៉ែនិងថាមពលខេត្តកំពង់ស្ពឺ ជាអ្នកទទួលខុសត្រូវធំជាងគេក្នុងការបណ្ដោយឲ្យក្រុមហ៊ុន ភឺន ផល្លា ជីករណ្ដៅដីខុសលក្ខណៈបច្ចេកទេសនៅក្នុងភូមិអង្គតាឡឹក ឃុំសំបូរ ស្រុកសំរោងទង ខេត្តកំពង់ស្ពឺ។ ដូច្នេះលោក ស៊ុយ សែម រដ្ឋមន្ត្រីក្រសួងរ៉ែនិងថាមពល ក៏ដូចជាលោក វ៉ី សំណាង អភិបាលខេត្តកំពង់ស្ពឺ មិនគួរបណ្ដែតបណ្ដោយឲ្យក្រុមហ៊ុន ភឺន ផល្លា ធ្វើអ្វីៗស្រេចតែអំពើចិត្តតទៅទៀតឡើយ ព្រោះអីសូម្បីតែរថយន្តដឹកអាចម៍ដីរបស់ក្រុមហ៊ុន ភឺន ផល្លា ក៏កំពុងបង្កផលប៉ះពាល់ដល់ការរស់នៅរបស់ប្រជាពលរដ្ឋក្នុងមូលដ្ឋានដែរ៕
Recent Comments