ប្រជាពលរដ្ឋនៅក្នុងស្រុកជាំក្សាន្ត ក៏ដូចជាស្រុកឆែប ស្រុកជ័យសែន ស្រុកត្បែងមានជ័យ និង ស្រុករវៀង ខេត្ត ព្រះវិហារ បានលើកឡើងថា ប្រសិនបើលោក អ៊ុន ចាន់ដា អភិបាលខេត្តព្រះ វិហារ មានឆន្ទៈការពារ ព្រៃឈើពិត មែន នោះ គឺត្រូវចាត់វិធានការ ទប់ស្កាត់បទល្មើសកាប់ឈើខុស ច្បាប់នៅក្នុងព្រៃព្រះរកា និងព្រៃឡង់ជាបន្ទាន់ ។ ដោយហេតុថា បច្ចុប្បន្នមានឈ្មួញធំៗនិងក្រុមជនល្មើសមួយចំនួនបន្តសកម្មភាពកាប់ឈើនិងដឹកជញ្ជូនឈើចេញពីព្រៃព្រះរកា និងព្រៃឡង់ ក្នុងខេត្តព្រះវិហារ យ៉ាងរាលដាលហើយសូម្បីតែដើមច្បោះជ័រដែលជាមុខរបរប្រពៃណីរបស់ជនជាតិដើមភាគតិច ក៏រងការបំផ្លាញយ៉ាងមហន្តរាយផងដែរ។ លើសនេះទៅទៀតលោក វេង សាខុន រដ្ឋមន្ត្រីក្រសួងកសិកម្ម និងលោក អ៊ុង សំអាត ប្រធានរដ្ឋបាលព្រៃឈើនៃក្រសួងកសិកម្ម គួរចាត់វិធានការទប់ស្កាត់បទល្មើសបំផ្លាញព្រៃឈើក្នុងខេត្តព្រះវិហារ ជាបន្ទាន់ព្រោះបច្ចុប្បន្នបទល្មើសកាប់ឈើនិងដឹកជញ្ជូនឈើខុសច្បាប់ចេញពីព្រៃព្រះរកានិងព្រៃឡង់ នៅតែកើតឡើងយ៉ាងរាលដាលហើយក្រុមហ៊ុនដួងស្រួច ក៏កំពុងបន្តកាប់ឈើក្នុងស្រុកជាំក្សាន្ត ខេត្តព្រះវិហារ យ៉ាងអនាធិបតេយ្យដែរ។
ក្រសួងកសិកម្មរុក្ខាប្រមាញ់និងនេសាទ ដែលមានលោក វេង សាខុន ជារដ្ឋមន្ត្រីបានចេញលិខិតឲ្យបញ្ឈប់សកម្មភាពប្រមូលផលអនុផលព្រៃឈើរបស់ក្រុមហ៊ុនដួងស្រួចគ្រុប ដែលមានសិទ្ធិប្រមូលផលអនុផលព្រៃឈើក្នុងដីសម្បទានសង្គមកិច្ចនៅឃុំរំដោះស្រែ ស្រុកជាំក្សាន្ត ខេត្តព្រះវិហារ ទំហំ១៥៤៥ហិកតា។ លិខិតរបស់ក្រសួងកសិកម្ម គឺជាការយល់ព្រមតាមសំណើរបស់រដ្ឋបាលខេត្តព្រះវិហារ ដែលមានលោក អ៊ុន ចាន់ដា ជាអភិបាលខេត្ត ព្រោះនៅក្នុងទីតាំងដីសម្បទានសង្គមកិច្ចរបស់ក្រុមហ៊ុនដួងស្រួចគ្រុប គ្មាននៅសល់ឈើសម្រាប់កាប់ធ្វើអាជីវកម្មតទៅទៀតទេ។
ទាក់ទងបញ្ហាខាងលើនេះសកម្មជនព្រៃឈើនិងមន្ត្រីអង្គការក្រៅរដ្ឋាភិបាល បានលើកឡើងថា ចំណាត់ការរបស់ក្រសួងកសិកម្មក្នុងការបញ្ឈប់សកម្មភាពប្រមូលផលនិងអនុផលព្រៃឈើនៅឃុំរំដោះស្រែ ស្រុកជាំក្សាន្ត ខេត្តព្រះវិហារ គឺជារឿងយឺតពេលទៅហើយ។ ទន្ទឹមនឹងនេះប្រភពពីប្រជាពលរដ្ឋនៅក្នុងឃុំរំដោះស្រែ ស្រុកជាំក្សាន្ត ខេត្តព្រះវិហារ បានឲ្យដឹងថា កន្លងមកក្រុមហ៊ុនដួងស្រួចមិនត្រឹមតែកាប់ឈើក្នុងទីតាំងដីសម្បទានរបស់ខ្លួនប៉ុណ្ណោះទេ គឺថែមទាំងបំពានកាប់ឈើនិងដឹកជញ្ជូនឈើពីតំបន់ផ្សេងៗចូលក្នុងទីតាំងដីសម្បទានសង្គមកិច្ចដើម្បីឲ្យក្លាយជាឈើមានច្បាប់ទៀតផង។ សកម្មជនព្រៃឈើក្នុងខេត្តព្រះវិហារ បានលើកឡើងថា ក្រុមហ៊ុនដួងស្រួច បំពានកាប់ឈើនៅក្នុងព្រៃការពារ ព្រៃអភិរក្សជាច្រើនកន្លែងក្នុងស្រុកជាំក្សាន្ត ហើយក្រុមហ៊ុននេះមានខ្នងបង្អែកជាមន្ត្រីយោធាជាន់ខ្ពស់ទើបហ៊ានធ្វើអ្វីៗតាមអំពើចិត្ត។(នៅមានតភាគ)
Recent Comments