មន្ត្រីសាលាខេត្តព្រះវិហារ មួយចំនួនក៏បានបង្ហើបឲ្យដឹងដែរថា លោក អ៊ុន ចាន់ដា អភិបាលខេត្ត ព្រះវិហារ ស្នើសុំទៅ ក្រសួងកសិកម្មដើម្បីបញ្ឈប់ ក្រុមហ៊ុនដួងស្រួច ក្នុងការធ្វើសកម្មភាពប្រមូល ផលអនុផលព្រៃឈើក្នុង ដីសម្ប ទាន សង្គមកិច្ចនៅឃុំរំដោះស្រែ ស្រុកជាំក្សាន្ត ខេត្តព្រះវិហារ។ នៅថ្ងៃទី២២ ខែមករា ឆ្នាំ២០១៨ ទើបលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ចេញលិខិតបញ្ឈប់សកម្មភាពប្រមូលផលអនុផលព្រៃឈើរបស់ក្រុមហ៊ុនដួងស្រួច តាមសំណើររបស់រដ្ឋបាលខេត្តព្រះវិហារ ចុះថ្ងៃទី១០ ខែសីហា ឆ្នាំ២០១៧។ ប៉ុន្តែលិខិតរបស់លោក វេង សាខុន គឺជាលិខិតដែលយឺតពេលព្រោះក្រុមហ៊ុនដួងស្រួច បានកាប់ឈើនៅក្នុងបរិវេណដីសម្បទាន សង្គមកិច្ច និងបំពានកាប់ឈើនៅតំបន់ក្បែរៗនោះវិនាសហិនហោចអស់ទៅហើយគ្មាននៅសល់ឈើទៀតទេ។
ប្រភពពីមន្ត្រីមន្ទីរកសិកម្មខេត្តព្រះវិហារ បានលើកឡើងថា កាលពីថ្ងៃទី២២ ខែមករា ឆ្នាំ២០១៨ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ បានចេញលិខិតបញ្ឈប់សកម្មភាពក្រុមហ៊ុនដួងស្រួច ក្នុងការប្រមូលផលអនុផលព្រៃឈើនៅលើដីសម្បទានសង្គមកិច្ចក្នុងស្រុកជាំក្សាន្ត។ ក៏ប៉ុន្តែលិខិតដែលចុះហត្ថលេខាដោយលោក វេង សាខុន រដ្ឋមន្ត្រីក្រសួងកសិកម្ម គឺជាលិខិតដែលយឺតពេលព្រោះក្រុមហ៊ុនដួងស្រួច បានបំផ្លាញព្រៃឈើក្នុងស្រុកជាំក្សាន្ត ខេត្តព្រះវិហារ ឡើងរលត់រលាយអស់ទៅហើយ។ មិនតែប៉ុណ្ណោះក្រុមហ៊ុនដួងស្រួច ដែលមានមន្ត្រីយោធាជាន់ខ្ពស់នៅពីក្រោយខ្នងត្រូវបានប្រភពខ្លះបញ្ជាក់ថា មានជាប់ពាក់ព័ន្ធបទល្មើសកាប់ឈើនៅក្នុងស្រុកឆែប ស្រុកជ័យសែន និងស្រុកត្បែងមានជ័យ ខេត្តព្រះវិហារផងដែរ។
មន្ត្រីអង្គការក្រៅរដ្ឋាភិបាល ក៏ដូចជាសកម្មជនព្រៃឈើនិងប្រជាពលរដ្ឋក្នុងខេត្តព្រះវិហារ បានលើកឡើងថា លោក អ៊ុន ចាន់ដា អភិបាលខេត្តព្រះវិហារ ក៏ដូចជាប្រធានមន្ទីរបរិស្ថានខេត្ត ប្រធានមន្ទីរកសិកម្មខេត្ត និងមេរដ្ឋបាលព្រៃឈើខេត្តព្រះវិហារ មិនសូវយកចិត្តទុកដាក់ក្នុងការទប់ស្កាត់បទល្មើសព្រៃឈើនោះទេ។ ប្រជាសហគមន៍ការពារព្រៃឈើក្នុងស្រុកជាំក្សាន្ត ស្រុកឆែប ស្រុកត្បែងមានជ័យ និងស្រុកជ័យសែន បានឲ្យដឹងថា បច្ចុប្បន្នព្រៃព្រះរកា កំពុងរងការបំផ្លាញយ៉ាងពេញបន្ទុក ហើយមិនឃើញលោក អ៊ុន ចាន់ដា និងប្រធានមន្ទីរពាក់ព័ន្ធចាត់វិធានការទប់ស្កាត់ឲ្យបានទាន់ពេលវេលានោះទេ។ ដូច្នេះលោក វេង សាខុន រដ្ឋមន្ត្រីក្រសួងកសិកម្ម និងលោក សាយ សំអាល់ រដ្ឋមន្ត្រីក្រសួងបរិស្ថាន គួរពិនិត្យមើលបញ្ហាខាងលើនេះផង ព្រោះបច្ចុប្បន្នព្រៃព្រះរកា និងព្រៃឡង់ក្នុងខេត្តព្រះវិហារ កំពុងកើតមានបទល្មើសកាប់ឈើដឹកជញ្ជូនឈើយ៉ាងពេញបន្ទុក ហើយមន្ត្រីបរិស្ថាន និងមន្ត្រីរដ្ឋបាលព្រៃឈើគ្រប់លំដាប់ថ្នាក់ គឺជាអ្នកឃុបឃិតឲ្យបទល្មើសជាថ្នូរនឹងផលប្រយោជន៍ផ្ទាល់ខ្លួន។(មានតភាគ)
Recent Comments