មន្ត្រីរាជការក្នុងមន្ទីរកសិកម្មខេត្តកំពង់ឆ្នាំង បានលើកឡើងទៀតថា ករណីកើតមាន បទល្មើសនេសាទពេញផ្ទៃបឹង នេសាទក្នុងខេត្ត កំពង់ឆ្នាំង ហើយលោក សោម ភារុណ នាយខណ្ឌរដ្ឋបាល ជលផលខេត្តកំពង់ឆ្នាំង មិនបង្ក្រាបគឺមានការឃុបឃិត បើកដៃពីសំណាក់លោក ងិន ហ៊ុន ផងដែរ។ ហេតុនេះហើយទើប បច្ចុប្បន្នបទល្មើសនេសាទប្រើឧបករណ៍ខុសច្បាប់ ក្នុងតំបន់បឹងទន្លេសាប នៃស្រុកបរិបូរណ៍ ក្រុងកំពង់ឆ្នាំង ស្រុកកំពង់លែង ស្រុកជលគិរី និងស្រុកកំពង់ត្រឡាច កំពុងកើតឡើងយ៉ាងរាលដាល ហើយលោក ងិន ហ៊ុន និងលោក សោម ភារុណ កំពុងសម្ងំប្រមូលផលប្រយោជន៍យ៉ាងសុខស្រួល។ ដូច្នេះថ្នាក់ដឹកនាំក្រសួងកសិកម្ម គួរពិនិត្យមើលបញ្ហាខាងលើនេះផង ក្នុងខណៈដែលលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង និងបក្ខពួកកំពុងឃុបឃិតគ្នាប្រព្រឹត្តអំពើពុករលួយតាមច្រើនរូបភាពគ្មានញញើតអ្វីទេ។
មកដល់ពេលនេះអំពើពុករលួយរបស់លោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង ត្រូវបានបើកកកាយជាបន្តបន្ទាប់ដូច្នេះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ មិនគួរទុកឲ្យលោក ងិន ហ៊ុន និងបក្ខពួកបន្តប្រព្រឹត្តអំពើពុករលួយតទៅទៀតនោះទេ។ តាមប្រភពពីក្រុមអាជីវករកាប់ជ្រូក គោ ក្របី ដែលមានទីសត្តឃាតនៅក្រុងកំពង់ឆ្នាំង និងតាមបណ្ដាស្រុកនានាបានឲ្យដឹងថា លោក ងិន ហ៊ុន កំពុងប្រើអំណាចនិងតួនាទីប្រព្រឹត្តអំពើពុករលួយយ៉ាងងងើលដោយគ្មានខ្លាចក្រែងអ្វីឡើយ។ បញ្ហានេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរបើកការស៊ើបអង្កេតផងដែរ ព្រោះលោក ងិន ហ៊ុន និងបក្ខពួកឃុបឃិតគ្នាប្រព្រឹត្តអំពើពុករលួយប្រមូលលុយធ្វើមានធ្វើបានផ្ទាល់ខ្លួនអស់រយៈពេលច្រើនឆ្នាំមកហើយ។
ក្រុមអាជីវករម្ចាស់ទីសត្តឃាតជ្រូក គោ ក្របី នៅក្រុងកំពង់ឆ្នាំង និងតាមបណ្ដាស្រុកនានាបានលើកឡើងថា មានមន្ត្រីពេទ្យសត្វគាបសង្កត់ឲ្យពួកគាត់បង់លុយប្រចាំខែទៅឲ្យលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង ក្រោមហេតុផលបង់ពន្ធដារ។ ប្រភពបានឲ្យដឹងទៀតថា ប្រសិនបើពួកគាត់មិនព្រមបង់លុយឲ្យលោក ងិន ហ៊ុន តាមរយៈក្រុមពេទ្យសត្វទេនោះ នឹងត្រូវគេគំរាមកំហែងមិនអនុញ្ញាតឲ្យបន្តរកស៊ីទៀតទេ ឬមិនចេញប៉ាតង់ឲ្យជាដើម។ ហេតុនេះហើយទើបពួកគាត់សុខចិត្តបង់លុយឲ្យលោក ងិន ហ៊ុន តាមការកំណត់របស់មន្ត្រីពេទ្យសត្វដែលបានគំរាមកំហែងដល់ទីសត្តឃាត ដើម្បីអាចបន្តអាជីវកម្មដោយគ្មានការរំខាន។
តាមការអះអាងរបស់ក្រុមអាជីវករម្ចាស់ទីតាំងសត្តឃាតមួយចំនួនបានឲ្យដឹងថា នៅពេលពួកគាត់ត្រូវការធ្វើប័ណ្ណប៉ាតង់យកទៅប្រកបអាជីវកម្ម គឺលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង មិនធ្វើឲ្យដោយងាយៗទេ ដោយយកលេសថាថ្នាក់ខេត្តធ្វើមិនទាន់។ ប៉ុន្តែប្រសិនបើអាជីវករណាចំណាយលុយច្រើន គឺធ្វើប័ណ្ណប៉ាតង់បានយ៉ាងលឿនសម្រាប់យកទៅប្រើប្រាស់តាមសេចក្ដីត្រូវការ។ ជាងនេះទៅទៀតលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង បានទារលុយពីអាជីវករម្ចាស់ទីសត្តឃាតទូទាំងខេត្តកំពង់ឆ្នាំង ច្រើនជាងតម្លៃធម្មតាពី៣០ទៅ៤០ភាគរយ គឺលើសពីការកំណត់ក្នុងច្បាប់៣០ទៅ៤០ភាគរយដោយគ្មានញញើតអ្វីឡើយ។
អំពើពុករលួយរបស់លោក ងិន ហ៊ុន មានពាក់ព័ន្ធទៅនឹងបទល្មើសនេសាទប្រើឧបករណ៍ខុសច្បាប់ ក៏ដូចជាបទល្មើសដឹកជញ្ជូនឈើខុសច្បាប់នៅក្នុងខេត្តកំពង់ឆ្នាំងផងដែរ ហើយតាមរយៈអំពើពុករលួយនេះ គឺលោក ងិន ហ៊ុន អាចប្រមូលលុយបានយ៉ាងច្រើនសម្រាប់យកទៅធ្វើមានធ្វើបានផ្ទាល់ខ្លួន។ ប្រភពពីមន្ត្រីរាជការក្នុងមន្ទីរកសិកម្មខេត្តកំពង់ឆ្នាំង មួយចំនួនបានឲ្យដឹងថា ការដែលមេរដ្ឋបាលព្រៃឈើខេត្តកំពង់ឆ្នាំង មិនបង្ក្រាបក្រុមឈ្មួញដឹកជញ្ជូនឈើខុសច្បាប់ គឺមានការឃុបឃិតបើកដៃពីសំណាក់លោក ងិន ហ៊ុន ហើយមានការបែងចែកផលប្រយោជន៍យ៉ាងសុខស្រួល។ បឋម
Recent Comments