ប្រភពពីមន្ត្រីនគរបាល នៅក្នុងស្នងការដ្ឋាននគរបាលខេត្ត បន្ទាយមានជ័យ មួយចំនួនបាន បង្ហើបឲ្យដឹងថា ក្រុម នគរ បាលប្រឆាំងបទល្មើសសេដ្ឋកិច្ច ខេត្តបន្ទាយមានជ័យ ដែល ជាមនុស្សស្និទ្ធនឹងលោក អាត់ ខែម នៅតែអាច បង្កើត កុងត្រូលជជុះប្រមូលលុយពីឈ្មួញ យ៉ាងពេញបន្ទុកដូចមុនដដែល។ ហេតុនេះហើយទើបមន្ត្រីនគរបាលក្នុងស្នងការដ្ឋាននគរបាលខេត្តបន្ទាយមានជ័យ អំពាវនាវយ៉ាងទទូចឲ្យលោក នេត សាវឿន អគ្គស្នងការនគរបាលជាតិ ពិនិត្យមើលអំពើពុករលួយ និងភាពអសកម្មរបស់លោក អាត់ ខែម ស្នងការនគរបាលខេត្តបន្ទាយមានជ័យខ្លះផង។ ដោយសារថាបច្ចុប្បន្ននៅក្នុងក្រុងប៉ោយប៉ែត និងក្រុងសិរីសោភ័ណ កំពុងកើតមានល្បែងស៊ីសងយ៉ាងអនាធិបតេយ្យនិងកើតមានបទល្មើសជួញដូរចែកចាយប្រើប្រាស់គ្រឿងញៀន ក៏ដូចជាអំពើចោរកម្មរាលដាលកាន់តែខ្លាំងឡើងៗ ហើយលោក អាត់ ខែម មិនចាត់វិធានការបង្ក្រាបបទល្មើសដើម្បីពង្រឹងសន្តិសុខសង្គមឲ្យស្របតាមគោលនយោបាយភូមិ-ឃុំមានសុវត្ថិភាពទាំង៩ចំណុចនោះទេ។
កន្លងមករឿងអាស្រូវពុករលួយរបស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ត្រូវបានមន្ត្រីក្រោមឱវាទបើកកកាយជាបន្តបន្ទាប់ឲ្យថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដឹងឮនិងចាត់វិធានការទប់ស្កាត់។ ក៏ប៉ុន្តែនៅពេលដែលរឿងអាស្រូវពុករលួយរបស់លោក អាត់ ខែម ស្នងការនគរបាលខេត្តបន្ទាយមានជ័យ ត្រូវបានបើកកកាយជាបន្តបន្ទាប់ បែរជាថ្នាក់ដឹកនាំក្រសួងមហាផ្ទៃ ចេញមុខជួយបិទបាំងអំពើពុករលួយរបស់លោក អាត់ ខែម យ៉ាងស្រួល ។ ប្រការនេះហើយទើបលោក អាត់ ខែម នៅតែបណ្ដោយឲ្យមន្ត្រីនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តបន្ទាយមានជ័យ ដែលជាក្រុមមនុស្សស្និទ្ធនឹងខ្លួនបន្តបង្កើតកុងត្រូលជជុះប្រមូលលុយពីក្រុមឈ្មួញដឹកជញ្ជូនទំនិញពីទឹកដីសៀម ឆ្លងកាត់ខេត្បបន្ទាយមានជ័យ ដោយគ្មានញញើតអ្វីទាំងអស់។
ឥឡូវនេះប្រភពពីសមត្ថកិច្ចនិងមន្ត្រីអាជ្ញាធរមូលដ្ឋានក្នុងស្រុកអូរជ្រៅ ខេត្តបន្ទាយមានជ័យ បានឲ្យដឹងថា ច្រករបៀងអូរបីជាន់ ឃុំអូរបីជាន់ ស្រុកអូរជ្រៅ នៅតែកើតមានករណីឈ្មួញនាំចូលទំនិញគេចពន្ធ ទំនិញខុសច្បាប់ ជ្រូករស់ មាន់រស់ និងគោ ពីទឹកដីសៀមចូលទឹកដីខ្មែរយ៉ាងពេញបន្ទុកដដែល។ ប្រការនេះបានបង្ហាញថា លោក អាត់ ខែម ស្នងការនគរបាលខេត្តបន្ទាយមានជ័យ និងលោក សួន បវរ អភិបាលខេត្តបន្ទាយមានជ័យ មិនអនុវត្តន៍តាមបទបញ្ជារបស់ថ្នាក់ដឹកនាំក្រសួងមហាផ្ទៃ ក្នុងការបិទច្រករបៀងទាំងអស់តាមព្រំដែនខ្មែរ-សៀមនោះទេ។ ជាងនេះទៅទៀតនៅច្រករបៀងចម្ការគ ឃុំស្លក្រាម ស្រុកស្វាយចេក ខេត្តបន្ទាយមានជ័យ ក៏មានករណីឈ្មួញនាំចូលទំនិញគេចពន្ធ ទំនិញខុសច្បាប់ ម៉ូតូគេចពន្ធ និងរថយន្តចង្កូតស្ដាំយ៉ាងពេញបន្ទុកដដែល ហើយមានជាប់ពាក់ព័ន្ធទៅនឹងកូនប្រុសលោក អាត់ ខែម ម្នាក់ទៀតផង។បឋម
Recent Comments