ប្រភពពីសមត្ថកិច្ច ពាក់ព័ន្ធមួយចំនួនបានឲ្យដឹងថា លោក ប៉ាន់ មរកត ប្រធានមន្ទីរបរិស្ថាន ខេត្តពោធិ៍សាត់ ក៏ដូចជាមន្ត្រី អាជ្ញាធរខេត្តពោធិ៍សាត់ មិនយកចិត្តទុកដាក់ទប់ស្កាត់ សកម្មភាពកាប់ឈើនិងឹដឹក ជញ្ជូនឈើចេញពីព្រៃ យ៉ាងអនា ធិបតេយ្យនោះទេ។ ប្រភពពីមន្ត្រីអាជ្ញាធរមូលដ្ឋាន ក្នុងស្រុកវាលវែង និងស្រុកភ្នំក្រវាញ បានឲ្យដឹងថា បច្ចុប្បន្ន ឈ្មួញដឹកជញ្ជូនឈើ ល្បីល្បាញប្រចាំខេត្តកំពង់ស្ពឺ ឈ្មោះ ស៊ី ស និងឈ្មោះ វាសនា ផាន់ថានា ហៅស្នា នៅតែកាប់ឈើអារច្រៀកឈើនៅតំបន់អូរត្រាវ តំបន់អម្ពិល ខេត្តពោធិ៍សាត់ ហើយដឹកជញ្ជូនតាមរថយន្តបង្កុង និងរថយន្តម៉ាករ៉េវ ព្រមទាំងគោយន្តកន្ត្រៃចូលទៅទឹកដីខេត្តកំពង់ស្ពឺ យ៉ាងពេញបន្ទុកតែម្តង។ មន្ត្រីពាក់ព័ន្ធបានឲ្យដឹងថា មួយរយៈចុងក្រោយនេះឈ្មួញឈ្មោះ ស៊ី ស រស់នៅក្នុងខេត្តកំពង់ស្ពឺ ធ្វើសកម្មភាពដឹកជញ្ជូនឈើចេញពីខេត្តពោធិ៍សាត់ ចូលខេត្តកំពង់ស្ពឺ កាន់តែខ្លាំងជាងមុនទៅទៀតព្រោះគ្មានមន្ត្រីជំនាញឬសមត្ថកិច្ចណាប៉ះពាល់ឈ្មួញម្នាក់នេះឡើយ។
សេចក្ដីរាយការណ៍ពីប្រជាពលរដ្ឋនិងមន្ត្រីអាជ្ញាធរមូលដ្ឋានក្នុងស្រុកវាលវែង និងស្រុកភ្នំក្រវាញ ខេត្តពោធិ៍សាត់ បានឲ្យដឹងថារហូតមកដល់ពេលនេះបទល្មើសកាប់ឈើនិងដឹកជញ្ជូនឈើចេញពីតំបន់ដែនជម្រកសត្វព្រៃភ្នំសំកុស ដែនជម្រកសត្វព្រៃភ្នំឱរ៉ាល់ និងតំបន់អភិរក្សជួរភ្នំក្រវាញភាគកណ្ដាលនៅតែកើតឡើងយ៉ាងពេញបន្ទុក។ តាមប្រភពពីមន្ត្រីរាជការនៅក្នុងមន្ទីរបរិស្ថានខេត្តពោធិ៍សាត់ មួយចំនួនបានឲ្យដឹងថា លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ និងមន្ត្រីក្រោមឱវាទមួយចំនួនកំពុងឃុបឃិតគ្នាបើកដៃឲ្យឈ្មួញបំផ្លាញព្រៃឈើនៅក្នុងតំបន់ព្រៃការពារនិងព្រៃអភិរក្សដើម្បីជាថ្នូរនឹងផលប្រយោជន៍យ៉ាងសុខស្រួល។ ហេតុនេះហើយទើបឈ្មួញមួយចំនួននៅតែអាចកាប់ឈើនិងប្រមូលទិញឈើពីស្រុកវាលវែង និងស្រុកភ្នំក្រវាញ ដឹកជញ្ជូនឆ្លងកាត់ខេត្តកំពង់ស្ពឺ ចេញទៅស្រុកយួនតាមច្រកព្រំដែនក្នុងខេត្តកំពត និងខេត្តតាកែវ យ៉ាងរលូន។
មន្ត្រីបរិស្ថានប្រចាំតំបន់អភិរក្សព្រៃឈើក្នុងស្រុកវាលវែង និងស្រុកភ្នំក្រវាញ ខេត្តពោធិ៍សាត់ ត្រូវបានប្រជាពលរដ្ឋនិងមន្ត្រីអង្គការក្រៅរដ្ឋាភិបាលលើកឡើងថា គឺជាអ្នកឃុបឃិតឲ្យឈ្មួញឈ្មោះ ស៊ី ស និងឈ្មួញឈ្មោះ ស្នា បន្តកាប់ឈើនិងដឹកជញ្ជូនឈើចេញពីទឹកដីខេត្តពោធិ៍សាត់ ចូលខេត្តកំពង់ស្ពឺ យ៉ាងគគ្រឹកគគ្រេង។ ការដែលមន្ត្រីបរិស្ថានប្រចាំតំបន់អភិរក្សជួរភ្នំក្រវាញភាគកណ្ដាល តំបន់ដែនជម្រកសត្វព្រៃភ្នំសំកុស និងតំបន់ដែនជម្រកសត្វព្រៃភ្នំឱរ៉ាល់ស្រេចតែអំពើចិត្ត គឺមានការឃុបឃិតបើកដៃពីសំណាក់លោក ប៉ាន់ មរកត ប្រធានមន្ទីរបរិស្ថានខេត្តពោធិ៍សាត់ ផងដែរ។ បញ្ហានេះជារឿងដែលលោក សាយ សំអាល់ រដ្ឋមន្ត្រី្កក្រសួងបរិស្ថាន មិនគួរមើលរំលងភាពអសកម្មនិងអំពើពុករលួយរបស់ប្រធានមន្ទីរបរិស្ថានខេត្តពោធិ៍សាត់ ព្រមទាំងមន្ត្រីក្រោមឱវាទនោះឡើយ។ បឋម
Recent Comments