ថ្មីៗនេះមន្ត្រីរាជការនិងប្រជាពលរដ្ឋ ក្នុងស្រុកប្រាសាទបាគង បានអំពាវនាវឲ្យលោក ស៊ុយ សែម រដ្ឋមន្ត្រីក្រសួងរ៉ែនិងថាមពល ពិនិត្យមើលឡើងវិញចំពោះ អាជីវកម្មរណ្ដៅដីរបស់ ឈ្មួញឈ្មោះ អូន មន្នី ក្នុងភូមិស្វាយជ័យ ឃុំត្រពាំងធំ ស្រុកប្រា សាទបា គង ជាបន្ទាន់។ ដោយហេតុថាការដែលឈ្មួញ ឈ្មោះ អូន មន្នី ហ៊ានជីកកាយរណ្ដៅ ដីខុសច្បាប់និងដឹក ជញ្ជូនអាចម៍ ដីធ្វើអា ជីវកម្មយ៉ាងពេញបន្ទុក គឺអាចមានការឃុបឃិតបើកដៃពីសំណាក់ប្រធានមន្ទីររ៉ែនិងថាមពលខេត្តសៀមរាប ក៏ដូចជាមន្ត្រីអាជ្ញាធរស្រុក និងមន្ត្រីអាជ្ញាធរខេត្តផងដែរ។ បើមិនដូច្នេះទេគឺឈ្មួញឈ្មោះ អូន មន្នី មិនអាចជីករណ្ដៅដីដែលមានជម្រៅពី១០ម៉ែត្រទៅ២០ម៉ែត្រដែលជាការបំពានច្បាប់យ៉ាងគឃ្លើននោះឡើយ។
ប្រភពពីមន្ត្រីមន្ទីររ៉ែនិងថាមពលខេត្តសៀមរាប បានបង្ហើបឲ្យដឹងថា ការដែលឈ្មួញឈ្មោះ អូន មន្នី និងឈ្មោះ ម៉េង ប៉ូគាង ជីករណ្ដៅដីខុសច្បាប់ក្នុងឃុំត្រពាំងធំ ស្រុកប្រាសាទបាគង យ៉ាងគឃ្លើនគឺមានការឃុបឃិតបើកដៃពីសំណាក់លោក មាស ជូរ៉ានី ដែលគិតតែពីរឿងផលប្រយោជន៍ផ្ទាល់ខ្លួន។ ប្រសិនបើគ្មានការបើកដៃពីសំណាក់លោក មាស ជូរ៉ានី ប្រធានមន្ទីររ៉ែនិងថាមពលខេត្តសៀមរាបទេនោះ គឺឈ្មួញឈ្មោះ អូន មន្នី និងឈ្មោះ ម៉េង ប៉ូគាង មិនហ៊ានធ្វើអ្វីៗស្រេចតែអំពើចិត្តឡើយ។ ជាងនេះទៅទៀតមន្ត្រីអាជ្ញាធរស្រុកប្រាសាទបាគង និងមន្ត្រីអាជ្ញាធរខេត្តសៀមរាប ក៏អាចទទួលផលប្រយោជន៍ពីឈ្មួញ២នាក់ខាងលើនោះដែរ ទើបមិនចាត់វិធានការទប់ស្កាត់នៅពេលឈ្មួញបំពានលើច្បាប់អនុញ្ញាតរបស់មន្ទីរពាក់ព័ន្ធ។
តាមការអះអាងរបស់ប្រជាពលរដ្ឋក្នុងឃុំត្រពាំងធំ ស្រុកប្រាសាទបាគង បានឲ្យដឹងថាឈ្មួញឈ្មោះ អូន មន្នី កំពុងបន្តអាជីវកម្មកាយរណ្ដៅដីដែលមានទំហំធំនិងមានជម្រៅជ្រៅដោយមិនខ្វល់ពីផលប៉ះពាល់ដល់ការរស់នៅរបស់ប្រជាពលរដ្ឋក្នុងមូលដ្ឋាននោះទេ។ តាមច្បាប់កំណត់គឺឈ្មួញឈ្មោះ អូន មន្នី អាចជីករណ្ដៅដីត្រឹមជម្រៅ៥ម៉ែត្រប៉ុណ្ណោះ ប៉ុន្តែជាក់ស្ដែងឈ្មួញរូបនេះជីករណ្ដៅដីដែលមានជម្រៅពី១០ទៅ២០ម៉ែត្រជិតដល់ក្បាលប្រេត ហើយមន្ត្រីអាជ្ញាធរឃុំ មន្ត្រីអាជ្ញាធរស្រុក និងមន្ត្រីអាជ្ញាធរខេត្តសៀមរាប បែរជាសម្ងំស្ងៀមធ្វើមិនដឹងមិនឮអ្វីទាំងអស់។ ចំណែកប្រធានមន្ទីររ៉ែនិងថាមពលខេត្តសៀមរាប ត្រូវគេសង្ស័យថាជាអ្នកទទួលផលប្រយោជន៍យ៉ាងច្រើនពីឈ្មួញឈ្មោះ អូន មន្នី ដែលជីករណ្ដៅដីក្នុងភូមិស្វាយជ័យ ឃុំត្រពាំងធំ ស្រុកប្រាសាទបាគង ទើបមិនចាត់វិធានការពិនិត្យបទដ្ឋានបច្ចេកទេសក្នុងការជីករណ្ដៅដីរបស់ឈ្មួញដែលគិតគូរតែពីប្រយោជន៍ផ្ទាល់ខ្លួន។
តំណាងពលរដ្ឋនៅភូមិស្វាយជ័យ បានឲ្យដឹងថា ក្នុងមូលដ្ឋានពួកគាត់ឈ្មួញជីករណ្ដៅដីទំហំធំៗជ្រៅៗ២កន្លែងដែលកំពុងធ្វើឲ្យប៉ះពាល់ដល់ការរស់នៅរបស់ពួកគាត់ ហើយរណ្ដៅដីទាំងនោះមានជម្រៅពី១០ទៅ២០ម៉ែត្រឯណោះ។ បញ្ហានេះប្រជាពលរដ្ឋព្រួយបារម្ភយ៉ាងខ្លាំងដោយខ្លាចកូនចៅតូចៗរបស់ពួកគាត់និងសត្វគោ ក្របី ធ្លាក់ចូលទៅក្នុងរណ្ដៅដីរបស់ឈ្មួញឈ្មោះ អូន មន្នី ព្រោះឈ្មួញរូបនេះមិនបានធ្វើរបងព័ទ្ធជុំវិញរណ្ដៅរបស់ខ្លួនឲ្យស្របតាមច្បាប់អាជីវកម្មនោះឡើយ។ ដូច្នេះលោក ឃឹម ប៊ុនសុង អភិបាលខេត្តសៀមរាប និងលោក ស៊ុយ សែម រដ្ឋមន្ត្រីក្រសួងរ៉ែនិងថាមពល គួរពិនិត្យមើលភាពមិនប្រក្រតីនៃអាជីវកម្មរណ្ដៅដីក្នុងស្រុកប្រាសាទបាគងជាបន្ទាន់ ហើយគួរចាត់វិធានការទប់ស្កាត់ប្រកបដោយប្រសិទ្ធភាព ៕
Recent Comments