សេចក្ដីរាយការណ៍ពីប្រជានេសាទ នៅក្នុងស្រុកក្រគរ និងស្រុកកណ្ដៀង បានឲ្យដឹងថារយៈពេលប្រមាណ២ ខែចុងក្រោយ នេះបទល្មើសនេសាទ ប្រភេទរបាំងអួនក្រឡាញឹក និងអូសអួនក្រឡាញឹក ហៅថាប កំពុងកើតឡើងរាប់ពាន់ ខ្សែធ្វើឲ្យធនធានមច្ឆជាតិត្រូវប្រឈមនឹងសេចក្ដីវិនាស។ តាមរយៈ បទល្មើសនេសាទប្រើឧបករណ៍ខុស ច្បាប់កើតឡើងយ៉ាងរាលដាលនោះ គឺលោក ស្វាយ សំអាត ដែលមានលោក ភុំ វិមល ជាខ្នងបង្អែកអាចប្រមូលលុយបានយ៉ាងច្រើនយកទៅចែកគ្នាធ្វើមានធ្វើបាន ។ សមត្ថកិច្ចពាក់ព័ន្ធមួយចំនួនបានឲ្យដឹងថា ក្រុមជនល្មើសដែលបង់លុយតាមការកំណត់របស់លោក ស្វាយ សំអាត តែងចៀសផុតពីការបង្ក្រាប ចំណែកប្រជានេសាទជាលក្ខណៈគ្រួសារប្រើឧបករណ៍ស្របច្បាប់សោះក៏ត្រូវប្រឈមនឹងការបង្ក្រាបយ៉ាងគឃ្លើនដែរ។ ប្រការនេះប្រសិនបើលោក អេង ជាសាន អគ្គនាយករដ្ឋបាលជលផល មិនជាប់ពាក់ព័ន្ធផលប្រយោជន៍ទេនោះ គួរចាត់វិធានការទប់ស្កាត់បទល្មើសនេសាទនៅក្នុងស្រុកក្រគរ និងស្រុកកណ្ដៀងខ្លះផង ព្រោះបទល្មើសនេសាទប្រើឧបករណ៍ខុសច្បាប់កំពុងរាលដាលកាន់តែខ្លាំងឡើងៗ។
លោក ភុំ វិមល នាយខណ្ឌរដ្ឋបាលជលផលខេត្តពោធិ៍សាត់ ត្រូវបានប្រជានេសាទក្នុងស្រុកកណ្ដៀង ស្រុកក្រគរ និងស្រុកបាកាន រិះគន់ថាកំពុងសប្បាយប្រមូលលុយពីបទល្មើសនេសាទប្រើឧបករណ៍ខុសច្បាប់ប្រមូលលុយបានរាប់ម៉ឺនដុល្លារក្នុងមួយខែៗ។ ទន្ទឹមនឹងនេះលោក ម៉ៅ ធនិន អភិបាលខេត្តពោធិ៍សាត់ បានរក្សាភាពស្ងៀមស្ងាត់ទុកឲ្យបទល្មើសប្រើឧបករណ៍នេសាទខុសច្បាប់ក្នុងតំបន់បឹងទន្លេសាប នៃស្រុកកណ្ដៀង ស្រុកក្រគរ និងស្រុកបាកាន កើតឡើងយ៉ាងពេញបន្ទុក។ ហេតុនេះលោក វេង សាខុន រដ្ឋមន្ត្រីក្រសួងកសិកម្ម និងលោក អេង ជាសាន អគ្គនាយករដ្ឋបាលជលផល គួរពិនិត្យឡើងវិញជាបន្ទាន់ចំពោះអំពើពុករលួយនិងភាពអសកម្មរបស់លោក ភុំ វិមល នាយខណ្ឌរដ្ឋបាលជលផលខេត្តពោធិ៍សាត់ ព្រមទាំងបក្ខពួកបរិវារខ្លះផង។
ប្រភពពីប្រជានេសាទនៅស្រុកកណ្ដៀង បានឲ្យដឹងថា បទល្មើសនេសាទប្រើឧបករណ៍ខុសច្បាប់ប្រភេទណរ៉ាវ និងប កំពុងរាលដាលយ៉ាងអនាធិបតេយ្យក្នុងផ្ទៃបឹងទន្លេសាប គឺមានរាប់ពាន់ខ្សែហើយមិនឃើញមន្ត្រីរដ្ឋបាលជលផល មន្ត្រីអាជ្ញាធរ និងសមត្ថកិច្ចពាក់ព័ន្ធចាត់វិធានការទប់ស្កាត់នោះទេ។ លោក ស្វាយ សំអាត នាយផ្នែកស្ដីទីនៃផ្នែករដ្ឋបាលជលផលក្រគរ ត្រូវបានប្រជានេសាទជាលក្ខណៈគ្រួសាររិះគន់ថា គឺជាអ្នកឃុបឃិតបើកដៃឲ្យជនល្មើសដែលជាជនជាតិខ្មែរនិងជនជាតិយួនជាច្រើននាក់ប្រើប្រាស់ឧបករណ៍ខុសច្បាប់ចាប់ត្រីយ៉ាងមហន្តរាយ។ ប្រភពពីមន្ត្រីរដ្ឋបាលជលផលតូចតាចក្នុងខេត្តកំពង់ឆ្នាំង មួយចំនួនបានបង្ហើបឲ្យដឹងថា ប្រសិនបើគ្មានការឃុបឃិតបើកដៃពីសំណាក់លោក ភុំ វិមល នាយខណ្ឌរដ្ឋបាលជលផលខេត្តពោធិ៍សាត់ ទេនោះគឺលោក ស្វាយ សំអាត និងមន្ត្រីរដ្ឋបាលជលផលដទៃទៀតមិនហ៊ានធ្វើអ្វីៗស្រេចតែអំពើចិត្តឡើយ។បឋម
Recent Comments