ប្រភពពីមន្ត្រីអាជ្ញាធរមូលដ្ឋាន ក្នុងស្រុកឆែប និងស្រុកជ័យសែន ខេត្តព្រះវិហារ បានឲ្យដឹងថា ក្រុមហ៊ុនសំអឿនសុវណ្ណ មានអាជ្ញាប័ណ្ណ ប្រមូលទិញឈើពី ក្រុមហ៊ុនដីសម្បទាន សេដ្ឋកិច្ចដែលមានទំហំជាង ៤០០០ហិកតានៅស្រុកឆែប និងស្រុកជ័យសែន ។ ក៏ប៉ុន្តែជាក់ស្ដែងក្រុមហ៊ុនសំអឿនសុវណ្ណ ប្រមូលទិញឈើដែលជនល្មើស និងឈ្មួញមួយចំនួនកាប់ដឹកចេញ ពីព្រៃព្រះរកា ហើយប្រើប្រាស់អាជ្ញាប័ណ្ណរបស់ខ្លួនឲ្យក្លាយជាឈើស្របច្បាប់ រួចដឹកជញ្ជូនធ្វើអាជីវកម្មដោយគ្មានមន្ត្រីជំនាញឬសមត្ថកិច្ចពាក់ព័ន្ធណាទប់ស្កាត់ឡើយ។ ការដែលក្រុមហ៊ុនសំអឿនសុវណ្ណ អាចធ្វើអ្វីៗតាមអំពើចិត្តគឺមានការឃុបឃិតជាមួយមន្ត្រីជំនាញនិងសមត្ថកិច្ចពាក់ព័ន្ធមួយចំនួនដែលគិតតែពីរឿងប្រមូលលុយដាក់ហោប៉ៅ ហើយប្រធានមន្ទីរបរិស្ថានខេត្តព្រះវិហារ ក៏អាចទទួលផលប្រយោជន៍ពីបទល្មើសបំផ្លាញព្រៃព្រះរកាដែរ។
មន្ត្រីរាជការ មន្ត្រីអង្គការក្រៅរដ្ឋាភិបាល ប្រជាសហគមន៍ការពារព្រៃឈើនិងសកម្មជនព្រៃឈើក្នុងខេត្តព្រះវិហារ បានអំពាវនាវឲ្យលោក សាយ សំអាល់ រដ្ឋមន្ត្រីក្រសួងបរិស្ថាន និងលោក អ៊ុន ចាន់ដា អភិបាលខេត្តព្រះវិហារ ចាត់វិធានការលុបបំបាត់សិប្បកម្មកែច្នៃឈើនិងដេប៉ូទិញឈើក្នុងខេត្តព្រះវិហារជាបន្ទាន់។ ប្រជាសហគមន៍ការពារព្រៃព្រះរកា បានឲ្យដឹងថា បច្ចុប្បន្នក្រុមហ៊ុនសំអឿនសុវណ្ណ កំពុងប្រមូលទិញឈើដែលប្រជាពលរដ្ឋចូលកាប់ក្នុងព្រៃព្រះរកា យ៉ាងរលូនដែលជាហេតុធ្វើឲ្យបទល្មើសកាប់ឈើក្នុងព្រៃព្រះរកា កើតឡើងកាន់តែខ្លាំងជាងមុនទៅទៀត។ ប្រសិនបើក្រសួងនិងស្ថាប័នពាក់ព័ន្ធមិនចាត់វិធានការទប់ស្កាត់ឲ្យបានទាន់ពេលវេលាទេនោះ គឺព្រៃព្រះរកាត្រូវវិនាសហិនហោចដោយសារស្នាដៃក្រុមហ៊ុនសំអឿនសុវណ្ណ ក្នុងពេលឆាប់ៗជាមិនខាន។
តាមការអះអាងពីប្រជាសហគមន៍ការពារព្រៃឈើក្នុងស្រុកឆែប និងស្រុកជ័យសែន បានឲ្យដឹងថារោងសិប្បកម្មកែច្នៃឈើនិងដេប៉ូទិញលក់ឈើក្នុងខេត្តព្រះវិហារ គឺជាប្រភពដែលនាំឲ្យមានបទល្មើសកាប់ឈើនិងដឹកជញ្ជូនឈើចេញពីតំបន់ព្រៃព្រះរកាយ៉ាងអនាធិបតេយ្យ។ ទាក់ទងនឹងបញ្ហានេះលោក សាយ សំអាល់ រដ្ឋមន្ត្រីក្រសួងបរិស្ថាន មិនគួរបណ្ដែតបណ្ដោយតទៅទៀតទេ ព្រោះប្រធានមន្ទីរបរិស្ថានខេត្តព្រះវិហារ និងមន្ត្រីបរិស្ថានប្រចាំតំបន់ព្រៃព្រះរកា ត្រូវបានគេដឹងថាជាអ្នកឃុបឃិតឲ្យឈ្មួញនិងក្រុមជនល្មើសចូលកាប់ឈើដឹកជញ្ជូនយកទៅលក់ឲ្យក្រុមហ៊ុនសំអឿនសុវណ្ណ យ៉ាងពេញបន្ទុក។ មន្ត្រីអង្គការក្រៅរដ្ឋាភិបាលបានកត់សម្គាល់ថា នៅពេលពលរដ្ឋក្នុងមូលដ្ឋានកាប់ឈើបន្តិចបន្តួចយកទៅជួសជុលផ្ទះសម្បែង ត្រូវមន្ត្រីបរិស្ថាន និងមន្ត្រីរដ្ឋបាលព្រៃឈើ ព្រមទាំងសមត្ថកិច្ចពាក់ព័ន្ធដទៃទៀត ចាត់វិធានការបង្ក្រាបយ៉ាងចាស់ដៃដើម្បីយកស្នាដៃ ។បឋម
Recent Comments