ប្រភពពីពលរដ្ឋក្នុងភូមិចំការគ ឃុំស្លក្រាម បានឲ្យដឹងថាអ្នកមានញៀនល្បែងបញ្ជល់មាន់ ហើយមកលេងល្បែង ភាគច្រើនជាមន្ត្រីយោធានគរបាល អាវុធហត្ថ និងមន្ត្រីរាជការក្នុងខេត្តបន្ទាយមានជ័យ ។ ប្រការនេះកំពុងធ្វើឲ្យប៉ះពាល់ យ៉ាងខ្លាំងដល់សន្តិសុខសង្គម ព្រោះបច្ចុប្បន្នអំពើចោរកម្មនិង បទល្មើសផ្សេងៗ កំពុងរាលដាលយ៉ាងខ្លាំង នៅខេត្តឧត្ដរមានជ័យ។ ហេតុនេះថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ មិនគួរមើលរំលងភាពអសកម្មរបស់លោក សួន បវរ អភិបាលខេត្តបន្ទាយមានជ័យ និងលោក អាត់ ខែម ស្នងការនគរបាលខេត្តបន្ទាយមានជ័យនោះទេ។ បើបណ្ដែតបណ្ដោយតទៅទៀតល្បែងស៊ីសងច្រើនប្រភេទនឹងរាលដាលកាន់តែខ្លាំងនៅក្នុងស្រុកស្វាយចេក ក្រុងប៉ោយប៉ែត និងបណ្ដាស្រុកមួយចំនួនទៀតក្នុងខេត្តបន្ទាយមានជ័យ ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ដែលជាប់ពាក់ព័ន្ធទៅនឹងរឿងអាស្រូវច្រើនបែបច្រើនយ៉ាងនោះ ត្រូវបានមន្ត្រីរាជការនិងប្រជាពលរដ្ឋក្នុងខេត្តបន្ទាយមានជ័យរិះគន់ថា បណ្ដោយឲ្យល្បែងស៊ីសងច្រើនប្រភេទរាលដាលយ៉ាងពេញបន្ទុក។ ជាក់ស្ដែងនៅក្រុងប៉ោយប៉ែត មានល្បែងស៊ីសងជាច្រើនកន្លែងដូចជា ល្បែងបញ្ជល់មាន់ ល្បែងភ្នាល់តាមប្រព័ន្ធអនឡាញ និងកន្ទុយលេខជាដើម ហើយបនល្បែងខ្លះមានមន្ត្រីនគរបាល និងមន្ត្រីអាវុធហត្ថចេញមុខកាងយ៉ាងក្រអឺតក្រទម។ ប្រជាពលរដ្ឋបានរិះគន់ថាលោក អាត់ ខែម ប្រហែលទទួលបានផលប្រយោជន៍ពីល្បែងស៊ីសងដែលកើតឡើងយ៉ាងពេញបន្ទុក ទើបមិនចាត់វិធានការបង្ក្រាបល្បែងស៊ីសងទាំងនោះដើម្បីពង្រឹងសន្តិសុខសង្គមឲ្យស្របតាមគោលនយោបាយភូមិ-ឃុំ មានសុវត្ថិភាពទាំង៩ចំណុច។
ប្រភពពីពលរដ្ឋរស់នៅភូមិចំការគ ឃុំស្លក្រាម ស្រុកស្វាយជ័យ ខេត្តបន្ទាយមានជ័យ បានឲ្យដឹងថា នៅក្នុងមូលដ្ឋានពួកគាត់មានគេបើកសង្វៀនបញ្ជល់មាន់ដ៏ធំ ហើយដំណើរការយ៉ាងរលូនដោយមិនឃើញមានមន្ត្រីអាជ្ញាធរ និងសមត្ថកិច្ចក្នុងខេត្តបន្ទាយមានជ័យ ចាត់វិធានការទប់ស្កាត់នោះទេ។ អភិបាលស្រុកស្វាយចេក និងអធិការនគរបាលស្រុកស្វាយចេក បានរក្សាភាពស្ងៀមស្ងាត់ក្នុងខណៈដែលឈ្មោះ រដ្ឋា បើកសង្វៀនបញ្ជល់មាន់នៅក្នុងឃុំស្លក្រាម ដែលផ្ទុយពីគោលនយោបាយភូមិ-ឃុំមានសុវត្ថិភាពទាំង៩ចំណុច។ ជាងនេះទៅទៀតមន្ត្រីអាជ្ញាធរមូលដ្ឋានតូចតាចក្នុងឃុំស្លក្រាម បានបង្ហើបឲ្យដឹងថា មានមន្ត្រីអាវុធហត្ថមានឥទ្ធិពលម្នាក់ក្នុងខេត្តបន្ទាយមានជ័យ គឺជាអ្នកកាងសង្វៀនបញ្ជល់មាន់នោះតែម្តង។
តាមការអះអាងរបស់ពលរដ្ឋនិងមន្ត្រីអាជ្ញាធរមូលដ្ឋានក្នុងស្រុកស្វាយចេក បានឲ្យដឹងថា ទំនងឈ្មោះ រដ្ឋា មានខ្នងបង្អែករឹងមាំនៅក្នុងខេត្តបន្ទាយមានជ័យ ទើបអាចបើកសង្វៀនបញ្ជល់មាន់នៅភូមិចំការគ ឃុំស្លក្រាម ស្រុកស្វាយចេក យ៉ាងរលូន។ សមត្ថកិច្ចនៅក្នុងស្រុកស្វាយចេក បានឲ្យដឹងថា ពួកគាត់តែងឃើញឈ្មោះ រដ្ឋា បង្ហាញមុខនៅទីតាំងសង្វៀនបញ្ជល់មាន់ខាងលើ ហើយមិនឃើញមានសមត្ថកិច្ចណាហ៊ានប៉ះពាល់ឈ្មោះ ជា រដ្ឋា ទេ។ ហេតុនេះហើយទើបប្រជាពលរដ្ឋអស់ជំនឿលើមន្ត្រីអាជ្ញាធរ និងសមត្ថកិច្ចក្នុងខេត្តបន្ទាយមានជ័យ ក្នុងការបង្ក្រាបល្បែងស៊ីសង ហើយអំពាវនាវឲ្យថ្នាក់ដឹកនាំក្រសួងមហាផ្ទៃ និងអគ្គស្នងការនគរបាលជាតិ ចាត់វិធានការបង្ក្រាបល្បែងស៊ីសងក្នុងស្រុកស្វាយចេក ខេត្តបន្ទាយមានជ័យ អោយប្រសិទ្ធភាព៕
Recent Comments