ប្រឡាយអូរអាគុជ និងប្រឡាយទួលសំពៅ នៅក្នុងខណ្ឌសែនសុខ ត្រូវបានប្រជាពលរដ្ឋបញ្ជាក់ថា មិនត្រឹមតែមានតួ នាទីរំដោះ ជំនន់ទឹកភ្លៀងពីខណ្ឌសែនសុខ នោះទេ តែក៏អាចរំដោះជំនន់ ទឹកភ្លៀងចេញពីខណ្ឌទួល គោកផងដែរ។ ប្រភពដដែលបាន បញ្ជាក់ថា ដើមឡើយប្រឡាយទាំងពីរ មានទំហំធំណាស់ដែល កន្លែងខ្លះមានទទឹងរហូត ដល់ទៅ៣០ម៉ែត្រ និងមានបណ្តោយ រាប់គីឡូម៉ែត្រ តែបច្ចុប្បន្ននេះប្រឡាយរួមតូច និងកំពុងគោករាក់យ៉ាងខ្លាំងដែលធ្វើឲ្យជំនន់ទឹកភ្លៀងម្តងៗហៀរលិចដងផ្លូវរាប់ម៉ោងទើបស្រកអស់។
ប្រជាពលរដ្ឋរស់នៅខណ្ឌសែនសុខ បានស្តីបន្ទោសអាជ្ញាធរខណ្ឌសែនសុខ ថាបណ្តែតបណ្តោយឲ្យឈ្មួញខិលខូចនិងប្រជាពលរដ្ឋមួយចំនួនតូចបន្តសកម្មភាពចាក់ដីរំលោភប្រឡាយអូរអាគុជនិងប្រឡាយទួលសំពៅ នៅក្នុងខណ្ឌសែនសុខដែលជាមូលហេតុធំមួយធ្វើឲ្យសង្កាត់ខ្លះក្នុងខណ្ឌសែនសុខ ត្រូវលិចទឹកនៅពេលមានភ្លៀងធ្លាក់ខ្លាំងម្តងៗ។ ប្រភពដដែលបានបញ្ជាក់ថា ជាទម្លាប់របស់មន្ត្រីជំនាញខ្មែរ គឺទាល់តែមានបញ្ហាធ្ងន់ធ្ងរឬមានការតវ៉ាខ្លាំងពីប្រជាពលរដ្ឋរងគ្រោះទើបមន្ត្រីជំនាញចុះទៅដោះស្រាយ ។
ប្រជាពលរដ្ឋដែលរស់នៅអមប្រឡាយបានត្អូញត្អែរថាផ្ទះសម្បែងរបស់ពួកគាត់ក៏លិចទឹកដែរនៅពេលមានភ្លៀងធ្លាក់ខ្លាំងម្តងៗ ព្រោះទឹកប្រឡាយហូរមិនទាន់ក៏ហៀរឡើងមកលើមាត់ប្រឡាយហូរចូលដីធ្លី និងផ្ទះសម្តែងរបស់ពួកគាត់។ ប្រភពដដែលបានរៀបរាប់ថា មានប្រជាពលរដ្ឋខ្លះបានចាក់ដីឬសង់ផ្ទះរំលោភប្រឡាយតែមន្ត្រីមូលដ្ឋានដូចជាមន្ត្រីអាជ្ញាធរសង្កាត់មិនបានចាត់វិធានការដោះស្រាយឲ្យទាន់ពេលទេ។
មន្ត្រីសាលាខណ្ឌសែនសុខ ម្នាក់បានបង្ហើបថាបឹងទំនប់កប់ស្រូវនៅខណ្ឌព្រែកព្នៅមានតួនាទីសំខាន់ណាស់សម្រាប់រដោះទឹកកុំឲ្យជន់លិចរាជធានីភ្នំពេញ។ តែបញ្ហានៅត្រង់ថាប្រឡាយជាច្រើនដែលមានតួនាទីនាំទឹកចាក់ចូលទៅបឹងទំនប់កប់ស្រូវត្រូវបានគេរំលោភបំពានដែលមានដូចជាប្រឡាយអូរអាគុជ និងប្រឡាយទួលសំពៅនេះជាដើម ៕
Recent Comments