មន្ត្រីអាជ្ញាធរមូលដ្ឋាន និងប្រជាសហគមន៍ការពារព្រៃ ឈើក្នុងស្រុកកោះញែក ខេត្តមណ្ឌលគិរី បានបញ្ជាក់ថានៅ ក្នុងបរិវេណដី សម្បទានសេដ្ឋកិច្ចក្រុមហ៊ុនម៉ាស្ទ័រ ខេសាន់ របស់មេឈ្មួញ សឹង សំអុល គ្មាននៅសល់ ឈើសម្រាប់កាប់ ធ្វើអាជីវកម្ម ទៀតឡើយ។ ឈើដែលមេឈ្មួញ សឹង សំអុល ដឹកជញ្ជូនតាមរថយន្តយីឌុបធំៗ ចេញពីស្រុកកោះ ញែក ខេត្តមណ្ឌល គិរី ចូលទៅស្រុកស្នួល ខេត្តក្រចេះ គឺជាឈើកាប់នៅ ក្នុងតំបន់ដែនជម្រក សត្វព្រៃភ្នំព្រេច ក៏ដូចជាព្រៃការពារនិងព្រៃអភិរក្សនៅក្នុងស្រុកកោះញែក ជាពិសេសក្នុងឃុំសុខសាន្ត។ ការដែលមេឈ្មួញ សឹង សំអុល អាចធ្វើអ្វីៗតាមអំពើចិត្តគឺមានការឃុបឃិតបើកដៃពីសំណាក់មន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធក្នុងខេត្តមណ្ឌលគិរី និងខេត្តក្រចេះ ដែលគិតតែពីរឿងប្រព្រឹត្តអំពើពុករលួយប្រមូលលុយចែកគ្នាធ្វើមានធ្វើបាន។
រយៈពេលប្រមាណ៣ខែកន្លងទៅនេះមេឈ្មួញ សឹង សំអុល បានកាប់ឈើនៅក្នុងស្រុកកោះញែក ខេត្តមណ្ឌលគិរី ហើយដឹកជញ្ជូនចេញទៅស្រុកយួនតាមច្រកត្រពាំងស្រែ ស្រុកស្នួល ខេត្តក្រចេះ យ៉ាងគគ្រឹកគគ្រេងហើយគ្មានមន្ត្រីជំនាញ និងសមត្ថកិច្ចពាក់ព័ន្ធណាចាត់វិធានការទប់ស្កាត់ឡើយ។ សូម្បីតែមន្ត្រីគណៈកម្មការទប់ស្កាត់និងបង្ក្រាបបទល្មើសព្រៃឈើក៏មិនហ៊ានប៉ះពាល់មេឈ្មួញ សឹង សំអុល នោះដែរហើយបណ្ដោយឲ្យឈ្មួញរូបនេះបន្តប្រព្រឹត្តបទល្មើសយ៉ាងក្រអឺតក្រទម។ បើទោះបីមេឈ្មួញ សឹង សំអុល មានឈ្មោះក្នុងបញ្ជីខ្មៅរបស់លោកនាយករដ្ឋមន្ត្រី ហ៊ុន សែន យ៉ាងណាក៏ដោយក៏រហូតមកដល់ពេលនេះមេឈ្មួញ សឹង សំអុល នៅតែគេចផុតពីសំណាញ់ច្បាប់យ៉ាងគឃ្លើន និងបន្តប្រព្រឹត្តបទល្មើសខ្លាំងជាងមុន។
ថ្មីៗកន្លងទៅនេះសមត្ថកិច្ចចម្រុះក្នុងស្រុកស្នួល ខេត្តក្រចេះ បានបង្ក្រាបរថយន្តដឹកអុសចំនួន២៥គ្រឿង ហើយមានថតរូបភាពផ្សព្វផ្សាយជាសាធារណៈដើម្បីយកស្នាដៃបង្ហាញថ្នាក់លើ ។ ចំណែកមេឈ្មួញ សឹង សំអុល ដែលដឹកជញ្ជូនឈើតាមរថយន្តយីឌុបធំៗចេញទៅស្រុកយួនតាមច្រកត្រពាំងស្រែ-វ៉ាលឺ ក្នុងស្រុកស្នួល ខេត្តក្រចេះ មួយខែៗរាប់សិបរថយន្តមិនដែលឃើញមានមន្ត្រីជំនាញ និងសមត្ថកិច្ចពាក់ព័ន្ធចាត់វិធានការបង្ក្រាបឡើយ បើទោះបីទង្វើរបស់មេឈ្មួញ សឹង សំអុល កំពុងធ្វើឲ្យព្រៃឈើក្នុងស្រុកកោះញែក ខេត្តមណ្ឌលគិរី ត្រូវប្រឈមនឹងសេចក្ដីវិនាសយ៉ាងណាក៏ដោយ។ ហេតុនេះលោក វេង សាខុន រដ្ឋមន្ត្រីក្រសួងកសិកម្ម ក៏ដូចជាគណៈកម្មការបង្ក្រាបនិងទប់ស្កាត់បទល្មើសព្រៃឈើ គួរពិនិត្យមើលបញ្ហាខាងលើនេះផង ៕
Recent Comments