ថ្មីៗនេះប្រភពពីមន្ត្រី នៅច្រកអូររំដួល មួយចំនួនបានឲ្យ ដឹងថាលោក យ៉ែម ហេមរ៉ាត បានឃុបឃិតបើកដៃឲ្យ ឈ្មួញនាំចូលទំនិញ គេចពន្ធ ទំនិញបង់ពន្ធមិនគ្រប់ និងមានការបន្លំប្រភេទទំនិញ ដើម្បីប្រមូលលុយដាក់ហោប៉ៅ ដោយគ្មានញញើតអ្វីទាំងអស់។ សមត្ថកិច្ចតូចតាចប្រចាំ ច្រកអូររំដួល បានឲ្យដឹងថា ឈ្មួញមួយចំនួនបាននាំចូលទំនិញដូចជា គ្រឿងបន្លាស់រថយន្តម៉ូតូ ស្រា ស្រាបៀរ និងទំនិញជាច្រើនប្រភេទទៀតដែលត្រូវបង់ពន្ធក្នុងកម្រិតខ្ពស់ តែលោក យ៉ែម ហេមរ៉ាត បានឃុបឃិតជាមួយឈ្មួញដាក់ថាជាទំនិញចម្រុះទៅវិញដើម្បីឲ្យឈ្មួញបង់ពន្ធតិច ហើយមានការបង់លុយក្រៅផ្លូវការច្រើន។ ជាងនេះទៅទៀតបច្ចុប្បន្នឈ្មួញមួយចំនួនអាចនាំចូលហ្គាសគេចពន្ធនិងគ្រឿងចក្រពីទឹកដីសៀមចូលទឹកដីខ្មែរយ៉ាងស្រួលៗ ព្រោះមន្ត្រីគយក្រោមការគ្រប់គ្រងរបស់លោក យ៉ែម ហេមរ៉ាត គិតតែពីរឿងប្រមូលលុយដាក់ហោប៉ៅចែកគ្នាធ្វើមានធ្វើបានដោយមិនខ្វល់ពីវិធានការកែទម្រង់ស៊ីជម្រៅក្នុងស្ថាប័នគយនោះទេ។
ប្រភពពីសមត្ថកិច្ចតូចតាចនៅច្រកអូររំដួល ស្រុកភ្នំព្រឹក ខេត្តបាត់ដំបង បានឲ្យដឹងថារហូតបច្ចុប្បន្ននេះលោក យ៉ែម ហេមរ៉ាត ប្រធានការិយាល័យគយច្រកអូររំដួល នៅតែឃុបឃិតបើកដៃឲ្យឈ្មួញនាំចូលទំនិញគេចពន្ធនិងទំនិញបង់ពន្ធមិនគ្រប់យ៉ាងពេញបន្ទុកដដែល។ មន្ត្រីគយតូចតាចនៅក្នុងខេត្តបាត់ដំបង បានបង្ហើបឲ្យដឹងថា ការដែលលោក យ៉ែម ហេមរ៉ាត មេគយច្រកអូររំដួល ហ៊ានធ្វើអ្វីៗស្រេចតែអំពើចិត្តគឺដោយសារអាងខ្នងបង្អែកដែលមានអំណាចខ្លាំងជាងលោក គុណ ញឹម ដែលជាអគ្គនាយកនៃអគ្គនាយកដ្ឋានគយ និងរដ្ឋាករទៅទៀត។ អំពើពុករលួយរបស់លោក យ៉ែម ហេមរ៉ាត មេគយច្រកអូររំដួល បានធ្វើឲ្យបាត់បង់ចំណូលពន្ធរដ្ឋយ៉ាងច្រើនសន្ធឹកសន្ធាប់ក្នុងមួយខែៗ ហើយលុយទាំងនោះហូរចូលក្នុងហោប៉ៅឈ្មួញខិលខូចនិងមន្ត្រីពុករលួយ។
មន្ត្រីគយនៅក្នុងខេត្តបាត់ដំបង មួយចំនួនបានអះអាងថា កន្លងមកលោក យ៉ែម ហេមរ៉ាត ត្រូវបានថ្នាក់លើដកបញ្ឈរជើងមួយរយៈដោយសារតែជាប់ពាក់ព័ន្ធរឿងអាស្រូវពុករលួយឃុបឃិតឲ្យឈ្មួញនាំចូលទំនិញគេចពន្ធ ទំនិញខុសច្បាប់ និងទំនិញបង់ពន្ធមិនគ្រប់ដើម្បីផលប្រយោជន៍ផ្ទាល់ខ្លួន។ ប៉ុន្តែក្រោយពេលលោក យ៉ែម ហេមរ៉ាត រកបានខ្នងបង្អែកមានឥទ្ធិពលជាងលោក គុណ ញឹម ដែលជាអគ្គនាយកគយ ក៏អាចវិលត្រឡប់ទៅកន្លែងដើមកាន់តំណែងជាប្រធានការិយាល័យគយច្រកអូររំដួល ហើយប្រព្រឹត្តអំពើពុករលួយខ្លាំងជាងមុនទៅទៀត។ ប្រភពខ្លះបានឲ្យដឹងថា ទំនិញនាំចូលតាមច្រកអូររំដួល គឺបង់ពន្ធត្រឹមតែ២០ទៅ៣០ភាគរយប៉ុណ្ណោះ ក្រៅពីនេះមានការឃុបឃិតរវាងលោក យ៉ែម ហេមរ៉ាត និងឈ្មួញចែកផលប្រយោជន៍គ្នាយ៉ាងសុខស្រួល។ លោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មិនគួរមើលរំលងតទៅទៀតទេ ព្រោះអំពើពុករលួយរបស់លោក យ៉ែម ហេមរ៉ាត ប្រធានការិយាល័យគយច្រកអូររំដួល កំពុងបង្កើនសកម្មភាពពុករលួយបំផ្លាញចំណូលពន្ធរដ្ឋកាន់តែច្រើនឡើងៗ ៕
Recent Comments