ប្រជាពលរដ្ឋមូលដ្ឋានបាននិយាយ ថា ចែដែត បាននាំចូលទំនិញគេចពន្ធពី ប្រទេសយួនចូលប្រទេស កម្ពុជាស្ទើរតែរាល់ ថ្ងៃ តែសមត្ថកិច្ច នៅច្រកទ្វារព្រំដែនដា មិនបានចាត់វិធានការទប់ ស្កាត់ឲ្យមានប្រសិទ្ធភាព ស្របតាមគោលការណ៍ ច្បាប់នោះទេ។ ប្រភព ដដែលបានបញ្ជាក់ថា រថយន្តដឹកទំនិញគេចពន្ធសុទ្ធតែបានឆ្លងកាត់តំបន់ត្រួតពិនិត្យរបស់មន្ត្រីគយនិងមន្ត្រីកាំកុងត្រូលជាដើម ដូច្នេះមិនគួរណាថាទំនិញគេចពន្ធអាចឆ្លងកាត់ការត្រួតពិនិត្យរបស់មន្ត្រីជំនាញទាំងនោះដោយរលូនបានទេ។
ថ្មីៗនេះមន្ត្រីគយនិងមន្ត្រីកាំកុងត្រូលប្រចាំការនៅច្រកដា ស្រុកមេមត់ ខេត្តត្បូងឃ្មុំ កំពុងរងការរិះគន់ខ្លាំងៗក្នុងករណីឃុបឃិតជាមួយឈ្មួញមានឥទ្ធិពលឈ្មោះ ចែដែត ដែលគេល្បីថានាំចូលទំនិញគេចពន្ធច្រើនប្រភេទនិងមានបរិមាណច្រើនផងដែរ។ ប្រជាពលរដ្ឋបានរិះគន់ថា បើមន្ត្រីគយនៅតែពុករលួយដូចសព្វថ្ងៃនេះឈ្មួញពុករលួយនឹងនៅតែមានកាន់តែច្រើនព្រោះមានសមត្ថកិច្ចខិលខូចជាខ្នងបង្អែករបស់ពួកគេ។
គួរបញ្ជាក់ថាច្រកទ្វារព្រំដែនដា ស្ថិតនៅក្នុងស្រុកមេមត់ ខេត្តត្បូងឃ្មុំ មានរឿងអាស្រូវច្រើនករណីហើយក្នុងនោះរួមទាំងមានករណីនាំចេញឈើខុសច្បាប់និងការនាំចូលទំនិញខូចគុណភាពដូចជាប្រេងឆា និងមីខ្លាឃ្មុំក្រហម។ តែរហូតមកដល់ពេលនេះអាជ្ញាធរខេត្តត្បូងឃ្មុំ មិនបានចាត់វិធានការទប់ស្កាត់ឬដោះស្រាយតាមច្បាប់នោះទេ តែបែរជាមានរឿងអាស្រូវថ្មីទៀតគឺឈ្មួញឈ្មោះ ចែដែត នាំចូលទំនិញគេចពន្ធយ៉ាងពេញបន្ទុក។
ប្រជាពលរដ្ឋនៅស្រុកមេមត់ ខេត្តត្បូងឃ្មុំ បានស្នើដល់អាជ្ញាធរខេត្តត្បូងឃ្មុំជួយត្រួតពិនិត្យការបំពេញការងាររបស់មន្ត្រីជំនាញនិងសមត្ថកិច្ចនៅតំបន់ខាងលើផងព្រោះបើបណ្តែតបណ្តោយបន្តទៀតអ្នករងគ្រោះគឺប្រជាពលរដ្ឋនិងសង្គមជាតិ។ បឋម
Recent Comments