ក្រុមឈ្មួញនិង អាជីវករដែលរងការគាប សង្កត់ពីសំណាក់លោក សេង សារឿន អនុប្រធានសាខា គយរាជធានីភ្នំពេញ និងបក្ខ ពួក បានអំពាវនាវឲ្យលោក អូន ព័ន្ធមុនីរ័ត្ន រដ្ឋមន្ត្រីក្រសួង សេដ្ឋកិច្ច និងហិរញ្ញវត្ថុ ក៏ដូចជាលោក គុណ ញឹម ដែលជាមេគយធំ ចាត់វិធានការទប់ស្កាត់ ទង្វើមិនប្រក្រតី របស់លោក សេង សារឿន ខ្លះផង។ ឈ្មួញនិងក្រុ មអាជីវករបានបញ្ជាក់ ថា ពួកគាត់ ដឹកជញ្ជូនទំនិញស្របច្បាប់មានឯកសារ ត្រឹមត្រូវ មានបង់ពន្ធជូនរដ្ឋតាម ច្រកព្រំដែនត្រឹមត្រូវក៏នៅ តែលោក សេង សារឿន និងបក្ខពួកគាបសង្កត់យកលុយដែរ ។ អំពើពុករលួយរបស់លោក សេង សារឿន កំពុងធ្វើឲ្យប៉ះពាល់យ៉ាងខ្លាំងដល់វិធានការកែទម្រង់ស៊ីជម្រៅរបស់ស្ថាប័នគយ ។
រឿងអាស្រូវពុករលួយរបស់លោក សេង សារឿន អនុប្រធានសាខាគយរាជធានីភ្នំពេញ ដែលល្បីល្បាញខាងប្រព្រឹត្តអំពើពុករលួយគាបយកលុយពីឈ្មួញនិងអាជីវករដែលដឹកជញ្ជូនទំនិញចូលរាជធានីភ្នំពេញ ត្រូវបានបើកកកាយជាបន្តបន្ទាប់។ ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងលោក គុណ ញឹម ដែលជាអគ្គនាយកគយមិនគួរបណ្ដោយឲ្យលោក សេង សារឿន និងបក្ខពួកធ្វើអ្វីៗតាមអំពើចិត្តទៀតឡើយ។ ជាងនេះទៅទៀតលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរបើកការស៊ើបអង្កេតទៅលើរឿងអាស្រូវពុករលួយរបស់លោក សេង សារឿន អនុប្រធានសាខាគយរាជធានីភ្នំពេញជាបន្ទាន់ ដើម្បីកុំឲ្យមន្ត្រីគយរូបនេះធ្វើអ្វីៗស្រេចតែអំពើចិត្តរបស់ខ្លួន។
ថ្មីៗនេះឈ្មួញអាជីវករដែលរកស៊ីដឹកជញ្ជូនទំនិញចូលរាជធានីភ្នំពេញបានឲ្យដឹងថាលោក សេង សារឿន អនុប្រធានសាខាគយរាជធានីភ្នំពេញ កំពុងប្រើវិធី៤យ៉ាងដើម្បីជំរិតយកលុយពីពួកគាត់តាមរបៀបពុករលួយដោយគ្មានចេញវិក្កយបត្របង់ពន្ធចូលរដ្ឋត្រឹមត្រូវនោះទេ។ បញ្ហានេះជារឿងដែលលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា មិនគួរបណ្ដែតបណ្ដោយឲ្យលោក សេង សារឿន ធ្វើអ្វីៗតាមអំពើចិត្តតទៅទៀតទេ។ តាមការបង្ហើបពីមន្ត្រីគយតូចតាចមួយចំនួនក្នុងរាជធានីភ្នំពេញបានបង្ហើបឲ្យដឹងថា ពេលខ្លះលោក សេង សារឿន ក្នុងនាមជាអនុប្រធានសាខាគយរាជធានីភ្នំពេញ ប្រើអំណាចហួសហេតុក្នុងការជំរិតយកលុយពីឈ្មួញនិងអាជីវករ។ ប្រភពបានឲ្យដឹងទៀតថា ពេលខ្លះលោក សេង សារឿន កំពុងផឹកស៊ីសប្បាយស្រាប់តែនាំគ្នាចេញមកចាប់ឃាត់រថយន្តដឹកទំនិញសម្លុតគំរាមកំហែងលើកហេតុផលផ្សេងៗ ហើយតម្រូវឲ្យម្ចាស់ទំនិញបង់លុយម្តងៗ៥០០ដុល្លារ។ មិនតែប៉ុណ្ណោះពេលក្រុមរបស់លោក សេង សារឿន ចេញមកជំរិតយកលុយពីឈ្មួញនិងអាជីវករដឹកទំនិញ គឺគ្មានឯកសណ្ឋានច្បាស់លាស់ ហើយមានទាំងយកកាំភ្លើងមកភ្ជង់គំរាមអ្នករកស៊ីដឹកជញ្ជូនទំនិញយ៉ាងព្រៃផ្សៃថែមទៀត។
ប្រភពពីមន្ត្រីគយក្នុងរាជធានីភ្នំពេញ បានឲ្យដឹងទៀតថា ឈ្មួញមួយចំនួនដែលនាំចូលទំនិញតាមច្រកបាវិត ច្រកចាំយាម ច្រកត្រពាំងស្រែ ច្រកត្រពាំងផ្លុង និងច្រកព្រំដែនក្នុងខេត្តបាត់ដំបងជាដើម គឺលោក សេង សារឿន មិនហ៊ានប៉ះពាល់ឈ្មួញទាំងនោះឡើយ។ ប៉ុន្តែសម្រាប់ឈ្មួញតូចតាចដែលដឹកជញ្ជូនទំនិញចូលរាជធានីភ្នំពេញតាមច្រកមួយចំនួនផ្សេងទៀត តែងត្រូវលោក សេង សារឿន ប្រើអំណាចគាបសង្កត់ជំរិតយកលុយតាមរបៀបពុករលួយដោយគ្មានញញើតអ្វីទាំងអស់។ បញ្ហានេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរចាត់វិធានការស៊ើបអង្កេតជាបន្ទាន់ផងដែរ ព្រោះមួយរយៈពេលចុងក្រោយនេះលោក សេង សារឿន ប្រព្រឹត្តអំពើពុករលួយកាន់តែខ្លាំងរហូតឈ្មួញនិងអាជីវករមួយចំនួនអត់ទ្រាំតទៅទៀតលែងបាន ក៏បើកកកាយរឿងអាស្រូវរបស់លោក សេង សារឿន ជាសាធារណៈ៕
Recent Comments