ប្រភពព័ត៌មានពី ប្រជាពលរដ្ឋរស់នៅតំបន់ព្រំដែន ក្នុងស្រុកស្វាយចេក បានឲ្យដឹងថា មួយរយៈពេល កន្លងទៅនេះពួកគាត់ សង្កេតឃើញ សកម្មភាពនាំចូល ម៉ូតូទំនើបៗគេច ពន្ធពីទឹកដីសៀម ចូលទឹកដីខ្មែរតាម ច្រករបៀងចំការគ ស្រុកស្វាយចេក កើតឡើង កាន់តែច្រើនជាងមុនទៅទៀត ។ បើតាមមន្ត្រីយោធាក្នុងស្រុកស្វាយចេក បានឲ្យដឹងថា ច្រករបៀងចំការគ គឺជាតំបន់ដែលគ្រប់គ្រងដោយកងយោធាវរសេនាតូចថ្មើរជើងលេខ៥០៣ ដែលមានលោកឧត្តមសេនីយ៍ត្រី ឃួន ជឿន ជាមេបញ្ជាការ ហើយវរ៥០៣ស្ថិតនៅក្រោមចំណុះយោធភូមិភាគ៥ដែលមានលោក ប៊ុន សេង ជាមេបញ្ជាការ។ មជ្ឈដ្ឋាននានាសង្ស័យថា បើគ្មានការឃុបឃិតបើកដៃពីសំណាក់មន្ត្រីយោធាកងវរសេនាតូចថ្មើរជើងលេខ៥០៣ទេនោះ គឺលោក ខែម សោភ័ណ ដែលជាកូនប្រុសលោក អាត់ ខែម ស្នងការនគរបាលខេត្តបន្ទាយមានជ័យ មិនហ៊ាននាំចូលម៉ូតូគេចពន្ធទំនើបៗតាមអំពើចិត្តឡើយ។
មន្ត្រីនគរបាលនៃស្នងការដ្ឋាននគរបាលខេត្តបន្ទាយមានជ័យ មួយចំនួនបានឲ្យដឹងថា កូនប្រុសលោក អាត់ ខែម ស្នងការនគរបាលខេត្តបន្ទាយមានជ័យ គឺលោក ខែម សោភ័ណ ជាមេខ្លោងនាំចូលម៉ូតូគេចពន្ធពីស្រុកសៀម ដោយគ្មានសមត្ថកិច្ចពាក់ព័ន្ធណាហ៊ានចាត់វិធានការទប់ស្កាត់ឡើយ។ ជាងនេះទៅទៀតលោក ខែម សោភ័ណ ក៏មានជាប់ពាក់ព័ន្ធទៅនឹងការនាំចូលរថយន្តចង្កូតស្ដាំគេចពន្ធស៊េរីទំនើបៗពីទឹកដីសៀម ចូលទឹកដីខ្មែរយ៉ាងរលូនដែរដោយមានការឃុបឃិតពីសមត្ថកិច្ចជាច្រើនស្ថាប័ន។ សមត្ថកិច្ចដែលឃុបឃិតជាមួយលោក ខែម សោភ័ណ កូនប្រុសលោក អាត់ ខែម ស្នងការនគរបាលខេត្តបន្ទាយមានជ័យ មានដូចជាមន្ត្រីគយ សមត្ថកិច្ចតាមច្រករបៀង និងនគរបាលប្រឆាំងបទល្មើសសេដ្ឋកិច្ចជាដើម។
មន្ត្រីនគរបាលក្នុងខេត្តបន្ទាយមានជ័យ មួយចំនួនបានឲ្យដឹងថាលោក ខែម សោភ័ណ ជាប់ពាក់ព័ន្ធនឹងការនាំចូលម៉ូតូគេចពន្ធទំនើបៗ និងរថយន្តចង្កូតស្ដាំទំនើបៗជាច្រើនឆ្នាំមកហើយ មិនដែលមានសមត្ថកិច្ចណាហ៊ានប៉ះពាល់នោះទេ។ មន្ត្រីយោធាការពារព្រំដែនក៏ដូចជាមន្ត្រីនគរបាលការពារព្រំដែនក្នុងខេត្តបន្ទាយមានជ័យ មានការយោគយល់ដល់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ទើបបណ្ដោយឲ្យលោក ខែម សោភ័ណ ធ្វើអ្វីៗស្រេចតែអំពើចិត្ត។ ដូច្នេះថ្នាក់ដឹកនាំក្រសួងមហាផ្ទៃ និងលោក នេត សាវឿន អគ្គស្នងការនគរបាលជាតិ គួរពិនិត្យមើលភាពមិនប្រក្រតីខាងលើនេះផង ព្រោះករណីលោក ខែម សោភ័ណ ហ៊ាននាំចូលម៉ូតូគេចពន្ធទំនើបៗនិងរថយន្តចង្កូតស្ដាំទំនើបៗពីទឹកដីសៀម គឺដោយសារអាងមានឪពុករបស់ខ្លួនជាខ្នងបង្អែកយ៉ាងរឹងមាំ ៕
Recent Comments