ប្រភពពីពលរដ្ឋរស់ នៅក្បែរតំបន់ច្រកម៉ឺនជ័យ ស្រុកកំចាយមារ ខេត្តព្រៃវែង បានឲ្យដឹងថានៅ ច្រកនេះឈ្មួញអាច នាំចូលទំនិញ ខុសច្បាប់ដូចខាងលើ ស្រេចតែអំពើចិត្តឲ្យតែពួក គេបង់លុយតាមការកំ ណត់របស់សមត្ថកិច្ចប្រចាំ ច្រកព្រំដែន។ កន្លងមកមានការរិះគន់ចំៗថា សមត្ថកិច្ចច្រកម៉ឺនជ័យច្រើនស្ថាប័នគិតតែពីរឿងប្រមូលលុយតាមរបៀបពុករលួយ ហើយការដែលពួកគេហ៊ានធ្វើអ្វីៗស្រេចតែអំពើចិត្តគឺមានការឃុបឃិតបើកដៃពីសំណាក់ចៅហ្វាយនាយរបស់ពួកគេផងដែរ។ ប្រធានច្រកទ្វេភាគីម៉ឺនជ័យ ក៏ដូចជាមន្ត្រីកាំកុងត្រូលប្រចាំច្រកនេះព្រមទាំងសមត្ថកិច្ចចម្រុះដទៃទៀត កំពុងសប្បាយប្រមូលលុយពីការបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងក្រអឺតក្រទមគ្មានញញើតអ្វីទាំងអស់។
តាមសេចក្ដីរាយការណ៍ពីមន្ត្រីអាជ្ញាធរ និងសមត្ថកិច្ចមូលដ្ឋានក្នុងស្រុកកំចាយមារ ខេត្តព្រៃវែង បានឲ្យដឹងថានៅច្រកម៉ឺនជ័យ សព្វថ្ងៃនេះសមត្ថកិច្ចប្រចាំច្រកព្រំដែនយ៉ាងតិច៣ស្ថាប័នបានឃុបឃិតឲ្យឈ្មួញនាំចូលទំនិញគេចពន្ធ ទំនិញខុសច្បាប់ និងគ្រឿងឧបភោគបរិភោគ ដែលមានផ្ទុកសារធាតុគីមីពីស្រុកយួនចូលស្រុកខ្មែរតាមអំពើចិត្ត។ មន្ត្រីកាំកុងត្រូលប្រចាំច្រកម៉ឺនជ័យ និងសមត្ថកិច្ចពាក់ព័ន្ធដទៃទៀតគិតតែពីរឿងប្រមូលលុយដាក់ហោប៉ៅ ហើយបណ្ដោយឲ្យឈ្មួញនាំចូលឈើមាន់រាប់តោន ព្រមទាំងមាន់រស់ និងជ្រូកក្រហម មកបំផ្លាញសុខភាពពលរដ្ឋខ្មែរយ៉ាងកំរោល។ បញ្ហានេះលោក ជា សុមេធី អភិបាលខេត្តព្រៃវែង និងប្រធានសាខាកាំកុងត្រូលខេត្តព្រៃវែង ក៏ដូចជាប្រធានពេទ្យសត្វខេត្តព្រៃវែង មិនគួរបណ្ដែតបណ្ដោយឲ្យសមត្ថកិច្ចនៅច្រកព្រំដែន ឬច្រករបៀងធ្វើអ្វីៗតាមអំពើចិត្តទៀតឡើយ។
ទាក់ទងបញ្ហាខាងលើនេះកាលពីរសៀលថ្ងៃទី១២ ខែតុលា ឆ្នាំ២០១៧ កម្លាំងអាវុធហត្ថខេត្តព្រៃវែង សហការជាមួយកម្លាំងមូលដ្ឋានអាវុធហត្ថស្រុកកំចាយមារ បានបង្ក្រាបករណីនាំចូលចំណីអាហារខូចគុណភាព១លើកនៅចំណុចភូមិជោរទី២ ឃុំគ្រញូង ស្រុកកំចាយមារ ខេត្តព្រៃវែង។ នៅក្នុងការបង្ក្រាបនោះសមត្ថកិច្ចឃាត់រថយន្ត១គ្រឿងម៉ាកហ៊ីយ៉ាន់ដាវ ពណ៌ស ពាក់ស្លាកលេខភ្នំពេញ3C-5488 មាន់រស់១៦០០ក្បាល ជើងមាន់ចំនួន៤០០កេស ដែលមានទម្ងន់៧០៥០គីឡូក្រាម។ វត្ថុតាងទាំងនោះត្រូវបានកម្លាំងអាវុធហត្ថកសាងសំណុំរឿងដើម្បីចាត់ការតាមនីតិវិធី ហើយមជ្ឈដ្ឋាននានាកំពុងតាមដានដោយយកចិត្តទុកដាក់ទៅលើចំណាត់ការរបស់សមត្ថកិច្ច។បឋម
Recent Comments