កាលពីព្រលប់ថ្ងៃទី១០ ខែតុលា ឆ្នាំ២០១៧ សមត្ថកិច្ចចម្រុះបានស្ទាក់ ចាប់រថយន្តដឹកឈើខុស ច្បាប់១គ្រឿងដែល គេស្គាល់ថា ជាកម្មសិទ្ធិរបស់ លោក សេង កុសល មេបញ្ជាការរងកង រាជអាវុធហត្ថស្រុកអូរយ៉ាដាវ ក្នុងខណៈដែលរថយន្ត នោះដឹកឈើ ចេញទៅស្រុកយួន ។ កម្លាំងយោធាខេត្តរតនគិរី និងមន្ត្រីរដ្ឋបាលព្រៃឈើផ្នែក បរកែវ បានប្រដេញចាប់រ ថយន្តកាមរីបាឡែន ពាក់ស្លាកលេខភ្នំពេញ2I-8827 ដែលដឹកឈើធ្នង់នៅចំណុចក្បែរស្នាក់ការនគរបាលវរការពារព្រំដែនលេខ៦២៣។ សមត្ថកិច្ចបានបញ្ជាក់ថាលោក សេង កុសល ប្រកបរបរដឹកជញ្ជូនឈើទៅស្រុកយួនច្រើនឆ្នាំមកហើយ ទើបតែប្រឈមនឹងការបង្ក្រាបកាលពីថ្ងៃទី១០ ខែតុលា ឆ្នាំ២០១៧ ហើយសកម្មភាពនេះធ្វើឲ្យមានការចាប់អារម្មណ៍យ៉ាងខ្លាំង។
មន្ត្រីអាជ្ញាធរមូលដ្ឋាននិងសមត្ថកិច្ចក្នុងឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី បានឲ្យដឹងថាមួយរយៈកន្លងទៅនេះឈ្មួញជាច្រើននាក់កំពុងសម្រុកដឹកឈើចេញទៅស្រុកយួនតាមច្រករបៀងភ្នំក្រហម និងច្រករបៀងមួយចំនួនទៀត ហើយក្នុងចំណោមឈ្មួញទាំងនោះក៏មានលោក សេង កុសល មេបញ្ជាការរងកងរាជអាវុធហត្ថស្រុកអូរយ៉ាដាវផងដែរ។ ប្រជាពលរដ្ឋបានលើកឡើងថា មន្ត្រីជំនាញ និងសមត្ថកិច្ចពាក់ព័ន្ធគិតតែពីរឿងប្រមូលលុយចែកគ្នាធ្វើមានធ្វើបានយ៉ាងរំភើយ ហើយឈ្មួញយួននិងឈ្មួញខ្មែរនៅតែបន្តសកម្មភាពដឹកជញ្ជូនឈើចេញតាមច្រកទ្វារអន្តរជាតិអូរយ៉ាដាវ យ៉ាងរលូន។ សូម្បីតែលោក គឹម រស្មី មេបញ្ជាការកងរាជអាវុធហត្ថខេត្តរតនគិរី ក៏ត្រូវគេសង្ស័យថាជាប់ពាក់ព័ន្ធផលប្រយជន៍ពីបទល្មើសដឹកជញ្ជូនឈើចេញទៅស្រុកយួនដែរ។
ជុំវិញបញ្ហាខាងលើនេះប្រជាពលរដ្ឋសង្ស័យថាការដែលលោក សេង កុសល មេបញ្ជាការរងកងរាជអាវុធហត្ថស្រុកអូរយ៉ាដាវ ហ៊ានធ្វើអ្វីៗស្រេចតែអំពើចិត្តគឺអាចមានការឃុបឃិតបើកដៃពីសំណាក់លោក គឹម រស្មី មេបញ្ជាការកងរាជអាវុធហត្ថខេត្តរតនគិរីផងដែរ។ ជាក់ស្ដែងក្រោយពេលសមត្ថកិច្ចបង្ក្រាបរថយន្តដឹកឈើរបស់លោក សេង កុសល កាលពីព្រលប់ថ្ងៃទី១០ ខែតុលា ឆ្នាំ២០១៧ គឺលោក គឹម រស្មី មិនចាត់វិធានការដាក់វិន័យលោក សេង កុសល នោះទេដោយអះអាងថាលោកស្ដីបន្ទោសឲ្យលោក សេង កុសល យ៉ាងច្រើន។ ប្រភពខ្លះបានឲ្យដឹងថា ទំនងជាលោក សេង កុសល ចង់គេចវេះមិនបង់លុយឲ្យសមត្ថកិច្ចពាក់ព័ន្ធដទៃទៀតទើបត្រូវប្រឈមនឹងការបង្ក្រាបយកស្នាដៃ ក្នុងខណៈដែលឈ្មួញដទៃទៀតនៅតែអាចដឹកជញ្ជូនឈើចេញទៅស្រុកយួនដោយគ្មានឧបសគ្គ ៕
Recent Comments