សេចក្ដីរាយការណ៍ពី ប្រជាពលរដ្ឋក្នុងឃុំប្រាសាទ បានឲ្យដឹងថា រយៈពេល២ ខែកន្លងទៅនេះនៅក្នុងតំបន់ អតីតដែនឡូត៍នេ សាទលេខ៤ មានបទល្មើស ប្រើឧបករណ៍ខុសច្បាប់ពេញ ផ្ទៃដីតែម្តង ធ្វើឲ្យធនធានមច្ឆជាតិ កំពុងប្រឈមនឹងសេចក្ដី វិនាស។ តាមការបង្ហើប ពីក្រុមអ្នកប្រើឧបករណ៍ នេសាទខុសច្បាប់ប្រភេទលូស្បៃមុង បានឲ្យដឹងថាពួកគាត់បង់ លុយទៅមេខ្យល់ម្នាក់ ជាថ្នូរនឹងការ ប្រាប់ដំណឹងពេលដែលសមត្ថកិច្ចចុះ ទៅបង្ក្រាប។ ក្នុងឧបករណ៍ខុសច្បាប់មួយ កន្លែងត្រូវបង់លុយ ទៅឲ្យមន្ត្រីរដ្ឋបាលជលផលពី១០ម៉ឺនរៀលទៅ២០ម៉ឺនរៀល ទើបអាចចៀសផុតពីការបង្ក្រាបកម្ទេចឧបករណ៍នេសាទខុសច្បាប់ចោល។ លោក វ៉ិត ធារិទ្ធ នាយខណ្ឌរដ្ឋបាលជលផលខេត្តកណ្ដាល អាចទទួលផលប្រយោជន៍ពីបទល្មើសនេសាទប្រើឧបករណ៍ខុសច្បាប់នៅអតីតឡូត៍លេខ៤ ក្នុងស្រុកស្អាង ខេត្តកណ្ដាលនោះដែរ ទើបបណ្ដោយឲ្យមន្ត្រីក្រោមឱវាទធ្វើអ្វីៗតាមអំពើចិត្ត។
ប្រជាពលរដ្ឋរស់នៅស្រុកស្អាង ខេត្តកណ្ដាល បានឲ្យដឹងថានៅក្នុងរដូវបិទនេសាទនេះ បទល្មើសនេសាទប្រើឧបករណ៍ខុសច្បាប់កំពុងកើតឡើងយ៉ាងពេញបន្ទុក ប៉ុន្តែលោក វ៉ិត ធារិទ្ធ នាយខណ្ឌរដ្ឋបាលជលផលខេត្តកណ្ដាល និងមន្ត្រីក្រោមឱវាទមិនចាត់វិធានការទប់ស្កាត់ប្រកបដោយប្រសិទ្ធភាពនោះទេ។ ហេតុនេះហើយដែលធ្វើឲ្យប្រជាពលរដ្ឋសង្ស័យថា មន្ត្រីរដ្ឋបាលជលផលទទួលផលប្រយោជន៍ពីក្រុមជនល្មើសប្រើឧបករណ៍ខុសច្បាប់ទើបបណ្ដោយឲ្យបទល្មើសប្រើឧបករណ៍ខុសច្បាប់រាលដាលយ៉ាងអនាធិបតេយ្យ។ ដូច្នេះលោក អេង ជាសាន អគ្គនាយករដ្ឋបាលជលផល មិនគួរមើលរំលងភាពអសកម្មរបស់ក្រុមមន្ត្រីរដ្ឋបាលជលផលក្នុងខេត្តកណ្ដាលនោះទេ ព្រោះនៅក្នុងស្រុកស្អាង ក៏ដូចជាស្រុកកោះធំ ស្រុកលើកដែក ស្រុកមុខកំពូល ស្រុកពញាឭ និងស្រុកល្វាឯម បទល្មើសនេសាទប្រើឧបករណ៍ខុសច្បាប់នៅតែកើតមានយ៉ាងពេញបន្ទុក។
ប្រភពពីប្រជាពលរដ្ឋនៅក្នុងឃុំប្រាសាទ ស្រុកស្អាង ខេត្តកណ្ដាល បានឲ្យដឹងថាបទល្មើសប្រើឧបករណ៍ប្រភេទស្បៃមុង កំពុងកើតឡើងយ៉ាងរាលដាលនៅក្នុងអតីតឡូត៍នេសាទលេខ៤ ហើយមិនឃើញមន្ត្រីអាជ្ញាធរ មន្ត្រីរដ្ឋបាលជលផល និងសមត្ថកិច្ចពាក់ព័ន្ធចាត់វិធានការបង្ក្រាបតាមស្ថានភាពជាក់ស្ដែងនោះទេ។ ផ្ទុយទៅវិញលោក ឆន ចិន នាយសង្កាត់រដ្ឋបាលជលផលស្រុកស្អាង បានឆ្លើយយករួចខ្លួនថា ការចុះបង្ក្រាបឧបករណ៍នេសាទខុសច្បាប់ទាំងនោះតែងជួបឧបសគ្គ។ ប៉ុន្តែប្រជាពលរដ្ឋនៅក្នុងឃុំប្រាសាទ បានលើកឡើងថា ប្រសិនបើគ្មានការឃុបឃិតបើកដៃពីសំណាក់មន្ត្រីអាជ្ញាធរ មន្ត្រីជំនាញ និងសមត្ថកិច្ចពាក់ព័ន្ធទេនោះ គឺក្រុមជនល្មើសមិនហ៊ានធ្វើអ្វីៗស្រេចតែអំពើចិត្តឡើយ៕
Recent Comments