នាយឧត្តមសេនីយ៍ នេត សាវឿន អគ្គស្នងការនគរបាលជាតិ ចាត់វិធានការបង្ក្រាបសង្វៀនបញ្ជល់មាន់ក្នុងឃុំក្រាំងធ្នង់ ស្រុកបាទី ខេត្តតាកែវ ជាបន្ទាន់ដើម្បីឲ្យស្របទៅតាមគោលនយោបាយភូមិ-ឃុំមានសុវត្ថិភាពទាំង៩ចំណុច។ ប្រភពខ្លះបានឲ្យដឹងថា ម្ចាស់សង្វៀនបញ្ជល់មាន់ទំនងមានអំណាចធំជាងអធិការនគរបាលស្រុកបាទី និងមន្ត្រីអាជ្ញាធរខេត្តតាកែវ ទើបមន្ត្រីអាជ្ញាធរនិងសមត្ថកិច្ចខេត្តតាកែវ មិនហ៊ានទប់ស្កាត់ហើយសង្វៀនបញ្ជល់មាន់នោះបើកសម្ពោធនៅថ្ងៃទី២៧ ខែកញ្ញា នេះតែម្តង។ ដូច្នេះមានតែថ្នាក់ដឹកនាំក្រសួងមហាផ្ទៃ និងនាយឧត្តមសេនីយ៍ នេត សាវឿន អគ្គស្នងការនគរបាលជាតិ ប៉ុណ្ណោះដែលអាចទប់ស្កាត់ល្បែងស៊ីសងខុសច្បាប់នៅឃុំក្រាំងធ្នង់ ស្រុកបាទី ខេត្តតាកែវ ប្រកបដោយប្រសិទ្ធភាព ។
គម្រោងបើកសម្ពោធសង្វៀនបញ្ជល់មាន់ដ៏ធំមួយកន្លែងចំណាយលុយរាប់ម៉ឺនដុល្លារក្នុងភូមិត្រពាំងលើក ឃុំក្រាំងធ្នង់ ស្រុកបាទី ខេត្តតាកែវ នៅថ្ងៃទី២៧ ខែកញ្ញា ឆ្នាំ២០១៧ ធ្វើឲ្យប្រជាពលរដ្ឋក្នុងមូលដ្ឋានបញ្ចេញប្រតិកម្មយ៉ាងខ្លាំង។ ជាមួយគ្នានេះលោក ង៉ាន់ សារី អធិការនគរបាលស្រុកបាទី មិនហ៊ានបកស្រាយជាមួយអ្នកសារព័ត៌មានទៀតទេ នៅពេលគម្រោងសម្ពោធសង្វៀនបញ្ជល់មាន់ត្រូវបានបែកធ្លាយជាសាធារណៈ។ ទន្ទឹមនឹងនេះប្រជាពលរដ្ឋបានអំពាវនាវឲ្យលោក ឡាយ វណ្ណៈ អភិបាលខេត្តតាកែវ ក៏ដូចជាស្នងការនគរបាលខេត្តតាកែវ ទប់ស្កាត់កុំឲ្យមានសង្វៀនបញ្ជល់មាន់នៅក្នុងឃុំក្រាំងធ្នង់ ស្រុកបាទី ខេត្តតាកែវ ព្រោះអាចធ្វើឲ្យប៉ះពាល់ដល់សន្តិសុខសង្គម។
ប្រជាពលរដ្ឋក្នុងភូមិត្រពាំងលើក ឃុំក្រាំងធ្នង់ ស្រុកបាទី ខេត្តតាកែវ បានឲ្យដឹងថានៅក្នុងគម្រោងបើកសម្ពោធសង្វៀនបញ្ជល់មាន់នោះ គឺមានការអញ្ជើញមន្ត្រីអាជ្ញាធរ សមត្ថកិច្ច អ្នកមានលុយ អ្នកមានអំណាច ចូលរួមផងដែរ។ ហេតុនេះហើយទើបប្រជាពលរដ្ឋមានសេចក្ដីព្រួយបារម្ភយ៉ាងខ្លាំងអំពីបញ្ហាអសន្តិសុខសង្គម ព្រោះភាគច្រើននៃអំពើហិង្សាក្នុងគ្រួសារ អំពើចោរកម្ម លួចប្លន់ និងបទល្មើសជាច្រើនទៀតតែងតែចេញពីល្បែងស៊ីសងដែលកំពុងកើតឡើងយ៉ាងរាលដាលនៅពេលបច្ចុប្បន្ន។ គម្រោងសម្ពោធសង្វៀនបញ្ជល់មាន់នៅស្រុកបាទី ខេត្តតាកែវ គឺមានកម្មវិធីផឹកស៊ីជប់លៀងតាំងពីថ្ងៃទី២៦ ខែកញ្ញា ឆ្នាំ២០១៧ ហើយប្រជាពលរដ្ឋក៏បានរាយការណ៍ឲ្យអ្នកសារព័ត៌មានបានដឹងនិងចុះផ្សាយជាសាធារណៈ។
Recent Comments