តាមប្រភពពីមន្ត្រីនៅច្រក ជ្រៃធំ ស្រុកកោះធំ ខេត្តកណ្ដាល បានឲ្យដឹងថាក្រុមហ៊ុនហង្ស របស់មេឈ្មួញ ឡៅ តុងហាន បានរក ស៊ីនាំចូលគ្រឿង សំណង់គេចពន្ធនិង បង់ពន្ធមិនគ្រប់ជា ច្រើនឆ្នាំមកហើយ ដូច្នេះឈ្មួញរូបនេះ ធ្វើឲ្យបាត់បង់ចំណូល ពន្ធរដ្ឋយ៉ាង ច្រើន។ ការដែលមេឈ្មួញ ឡៅ តុងហាន អាចបន្តនាំចូល គ្រឿងសំណង់គេចពន្ធ និងបង់ពន្ធមិនគ្រប់ តាមច្រកជ្រៃធំយ៉ាង ពេញបន្ទុកដូចសព្វថ្ងៃនេះ គឺដោយសារអាងមានខ្នងបង្អែករឹងមាំ ហើយសមត្ថកិច្ចនៅច្រកជ្រៃធំ គ្មានជម្រើសអ្វីក្រៅពីសម្របសម្រួលដើម្បីជាថ្នូរនឹងផលប្រយោជន៍នោះឡើយ។ ហេតុនេះហើយទើបមានការអំពាវនាវឲ្យលោក ឱម យ៉ិនទៀង បើកការស៊ើបអង្កេតទៅលើរឿងអាស្រូវពុករលួយរបស់លោកផ្កាយ២ ឡៅ តុងហាន ដែលជាម្ចាស់ក្រុមហ៊ុនហង្ស នាំចូលគ្រឿងសំណង់តាមច្រកជ្រៃធំឲ្យបានច្បាស់លាស់ផងដែរ ព្រោះឆ្នាំកន្លងទៅនេះមេឈ្មួញ ឡៅ តុងហាន ប្រើអំណាចឃុបឃិតជាមួយសមត្ថកិច្ចពុករលួយបំផ្លាញចំណូលពន្ធរដ្ឋ។
ប្រភពពីសមត្ថកិច្ចនៅច្រកជ្រៃធំ ស្រុកកោះធំ ខេត្តកណ្ដាល បានឲ្យដឹងថាមានឈ្មួញជាឧត្តមសេនីយ៍យោធា២នាក់កំពុងបន្តនាំចូលគ្រឿងសំណង់បង់ពន្ធមិនគ្រប់តាមច្រកជ្រៃធំ យ៉ាងពេញបន្ទុកដោយសារមានការឃុបឃិតជាមួយមន្ត្រីជំនាញ និងសមត្ថកិច្ចពុករលួយ។ ក្នុងចំណោមឧត្តមសេនីយ៍យោធាទាំង២នាក់នោះ គឺមេឈ្មួញ ឡៅ តុងហាន កំពុងធ្វើសកម្មភាពខ្លាំងក្លាជាងគេរហូតមានបង្កើតផែឯកជនសម្រាប់លើកដាក់ទំនិញដឹកជញ្ជូនចូលមករាជធានីភ្នំពេញយ៉ាងរលូនផងដែរ។ រថយន្តដឹកទំនិញធំៗរបស់មេឈ្មួញ ឡៅ តុងហាន បានធ្វើឲ្យផ្លូវជាតិលេខ២១បេ រងការខូចខាតនិងបាក់ស្ពានជាបន្តបន្ទាប់ ក៏ប៉ុន្តែមន្ត្រីអាជ្ញាធរខេត្តកណ្ដាល និងមន្ទីរពាក់ព័ន្ធក្នុងខេត្តកណ្ដាល មិនហ៊ានប៉ះពាល់មេឈ្មួញ ឡៅ តុងហាន ដែលជាឧត្តមសេនីយ៍យោធាក្នុងកងអង្គរក្សនោះទេ។
តាមសេចក្ដីរាយការណ៍ពីសមត្ថកិច្ចពាក់ព័ន្ធនៅច្រកជ្រៃធំបានឲ្យដឹងថា ទំនិញដែលមេឈ្មួញ ឡៅ តុងហាន នាំចូលពីស្រុកយួនមានដូចជា ដែក ឥដ្ឋការ៉ូ ស៊ីម៉ងត៍ ក្បឿង និងសម្ភារៈសំណង់ជាច្រើនប្រភេទ ហើយទំនិញទាំងនោះបង់ពន្ធប្រមាណ២០ទៅ៣០ភាគរយប៉ុណ្ណោះ។ ការដែលមេឈ្មួញ ឡៅ តុងហាន ឃុបឃិតជាមួយសមត្ថកិច្ចពាក់ព័ន្ធនាំចូលគ្រឿងសំណង់គេចពន្ធ និងបង់ពន្ធមិនគ្រប់បានធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ ក្នុងខណៈដែលលោក គុណ ញឹម ដែលជាអគ្គនាយកគយ កំពុងរក្សាភាពស្ងៀមស្ងាត់ធ្វើមិនដឹងមិនឮអ្វីទាំងអស់។ ហេតុនេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គួរពិនិត្យមើលសកម្មភាពរបស់មេឈ្មួញ ឡៅ តុងហាន និងសមត្ថកិច្ចច្រកជ្រៃធំ ក្នុងការបំផ្លាញចំណូលពន្ធរដ្ឋ៕
Recent Comments