ប្រភពបានបញ្ជាក់ដោយមិនចំឈ្មោះថា សព្វថ្ងៃនេះមានឧកញ៉ា និងមន្ត្រីមានអំណាចខ្លះយកលុយនិងរបស់របរជំនួយសប្បុរសធម៌មួយចំនួនតូចទៅដើរចែកជនក្រីក្រ និងចាស់ជរាថាខ្លួនជាមនុស្សល្អ តែតាមពិតពួកគេលួចជាតិនាំចូលទំនិញគេចពន្ធ និងកិបកេងថវិកាជាតិយ៉ាងច្រើន។
ក្រុមហ៊ុនគ្រីស្តាល់រ៉ាយដែលទទួលបានអាជ្ញាប័ណ្ណពីរដ្ឋាភិបាលក្នុងការនាំចេញអង្ករកម្ពុជាទៅលក់នៅប្រទេសក្រៅតាមរយៈកំពង់ផែខេត្តកំពតនោះ ត្រូវបានប្រជាពលរដ្ឋខេត្តកំពត និងមន្ត្រីរាជការមួយចំនួនរិះគន់ថា កំពុងតែនាំចូលធ្យូងថ្មខុសច្បាប់។ ប្រភពដដែលបានបញ្ជាក់ទៀតថា កំពង់ផែខេត្តកំពតដែលមានមន្ត្រីគយនិងមន្ត្រីកាំកុងត្រូលប្រចាំការដែរនោះ ក៏អាចជាប់ពាក់ព័ន្ធនឹងករណីនាំចូលធ្យូងថ្មខុសច្បាប់ផងដែរ ព្រោះនៅទីនោះគេសង្កេតឃើញមន្ត្រីគយនិងមន្ត្រីកាំកុងត្រូលចេញចូលញឹកញាប់។
នៅសប្តាហ៍មុននេះមន្ត្រីក្រសួងបរិស្ថាន និងមន្ត្រីក្រសួងពាណិជ្ជកម្ម បានថ្លែងប្រាប់សារព័ត៌មានថា ក្រសួងនៅមិនទាន់បានដឹងច្បាស់ពីករណីនាំធ្យូងថ្មចូលប្រទេសកម្ពុជាតាមរយៈកំពង់ផែនាំអង្ករចេញនៅខេត្តកំពត នោះទេ។ ក្រុមមន្ត្រីដដែលបានបញ្ជាក់ថា បើមានការនាំចូលមែនគឺត្រូវតែមានការអនុញ្ញាតពីមន្ត្រីជំនាញនិងស្ថាប័នពាក់ព័ន្ធ ព្រោះការនាំចូលធ្យូងថ្មគឺប៉ះពាល់ខ្លាំងដល់បរិស្ថានបើគ្រប់គ្រងមិនបានត្រឹមត្រូវ ហើយក៏ធ្វើឲ្យខាតបង់ថវិកាជាតិផងដែរ បើសិនជាគ្មានការប្រមូលពន្ធឲ្យបានត្រឹមត្រូវតាមច្បាប់នោះ។
កម្មករបម្រើការងារនៅកំពង់ផែខេត្តកំពត បានបញ្ជាក់ថាកន្លងមកកំពង់ផែខាងលើភាគច្រើនប្រើប្រាស់សម្រាប់នាំចេញអង្ករកម្ពុជា និងផលិតផលផ្សេងៗប៉ុណ្ណោះ។ តែក្នុងរយៈពេលជិតមួយឆ្នាំមកនេះ គេសង្កេតឃើញមានករណីនាំចូលធ្យូងថ្មកាន់តែច្រើនឡើងៗដែលកប៉ាល់ធំចតនៅកណ្តាលសមុទ្រខេត្តកំពត ហើយគេប្រើកប៉ាល់ធុនមធ្យមសម្រាប់ផ្ទេរចូលមកដាក់ផែខេត្តកំពត។ ក្រុមកម្មករបានបង្ហើបថា ធ្យូងថ្មខាងលើទំនងគេនាំចូលសម្រាប់បម្រើឲ្យរោងចក្រថាមពលអគ្គិសនីដើរដោយធ្យូងថ្មដែលកំពុងដំណើរការនៅខេត្តព្រះសីហនុនិងតម្រូវការផ្សេងៗទៀត ហើយថាកាំនាំចូលធ្យូងថ្មនេះគឺអាចធ្វើដោយក្រុមម៉ៅការនាំចូលពីបរទេសដែលមានមន្ត្រីខ្មែរមានអំណាចនៅពីក្រោយផងដែរ។
គួរបញ្ជាក់ថាផលិតផលនាំចូលតាមកំពង់ផែសមុទ្រភាគច្រើនត្រូវអតីតមន្ត្រីគយចូលនិវត្តន៍បង្ហើបថាមិនបានបង់ពន្ធត្រឹមត្រូវជូនរដ្ឋទេ ពិសេសពេលកប៉ាល់ចូលផែនៅពេលយប់ ហើយការនាំចូលនោះតែងតែមានការឃុបឃិតរវាងមន្ត្រីខ្មែរពុករលួយនិងក្រុមហ៊ុនខិលខូចបរទេស ដែលបញ្ហានេះសូម្បីតែមន្ត្រីជំនាញតូចតាចធ្វើការនៅកំពង់ផែក៏មិនហ៊ានប៉ះពាល់ដែរ ៕
Recent Comments