មន្ត្រីអង្គការក្រៅរដ្ឋាភិបាល និងសកម្មជនព្រៃឈើក្នុង ស្រុកលំផាត់ ខេត្តរតនគិរី បានឲ្យដឹងថាពាក្យសំដីរបស់ លោក នូ ថេរ កាល ពីថ្ងៃទី៣១ ខែសីហា ឆ្នាំ២០១៧ មានន័យថាលោក នូ ថេរ កំពុងបិទបាំងបទល្មើសបំផ្លាញ ព្រៃឈើយ៉ាង គឃ្លើនប្រហែល ជាអភិបាលស្រុកលំផាត់ រូបនេះទទួលបានផល ប្រយោជន៍ពីបទល្មើស។ ដូច្នេះលោក ថង សាវុន អភិបាល ខេត្តរតនគិរី គួរពិនិត្យមើលទង្វើ មិនប្រក្រតីរបស់លោក នូ ថេរ អភិបាលស្រុកលំផាត់ជាបន្ទាន់ ព្រោះបច្ចុប្បន្នបទល្មើសកាប់ព្រៃទន្ទ្រាន យកដីក្នុងតំបន់ដែនជម្រកសត្វ ព្រៃលំផាត់នៅតែបន្តកើតឡើង យ៉ាងអនាធិបតេយ្យ។ ជាងនេះទៅ ទៀតទង្វើរបស់លោក នូ ថេរ គឺជាចេតនាការពារក្រុមជន បំផ្លាញព្រៃឈើ ហើយគំរាមកំហែងនិងបំពានទៅលើសិទ្ធិរបស់ប្រជាពលរដ្ឋក្នុងការការពារធនធានធម្មជាតិដើម្បីផលប្រយោជន៍ក្នុងសហគមន៍ទៀតផង?។
លោក នូ ថេរ អភិបាលស្រុកលំផាត់ ត្រូវប្រជាសហគមន៍ភូមិសមុទ្រលើ ឃុំសេដា ស្រុកលំផាត់ ខេត្តរតនគិរី ដាក់ពាក្យប្ដឹងមួយករណីផ្សេងទៀតទាក់ទិនបទញុះញង់ធ្វើឲ្យប្រជាពលរដ្ឋមានការភ័យខ្លាចក្នុងការទប់ស្កាត់បទល្មើសបំផ្លាញព្រៃឈើ។ ជាមួយគ្នានេះតំណាងសហគមន៍ភូមិសមុទ្រលើ បានអំពាវនាវឲ្យអយ្យការអមសាលាដំបូងខេត្តរតនគិរី ការពារសុវត្ថិភាពនិងបញ្ឈប់សកម្មភាពគំរាមកំហែងរើសអើងលើពួកគាត់ពីសំណាក់អាជ្ញាធរភូមិ-ឃុំនិងស្រុក។ មន្ត្រីអង្គការក្រៅរដ្ឋាភិបាលដែលឃ្លាំមើលបទល្មើសកាប់ឈើនៅក្នុងតំបន់ដែនជម្រកសត្វព្រៃលំផាត់ បានលើកឡើងថាលោក នូ ថេរ អភិបាលស្រុកលំផាត់ មិនយកចិត្តទុកដាក់ទប់ស្កាត់បទល្មើសបំផ្លាញព្រៃឈើ ហើយបែរជាគំរាមកំហែងទៅលើតំណាងសហគមន៍ការពារព្រៃឈើយ៉ាងក្រអឺតក្រទមដោយគ្មានសេចក្ដីអៀនខ្មាសទាល់តែសោះ។
តាមប្រភពពីតំណាងប្រជាពលរដ្ឋសហគមន៍ភូមិសមុទ្រលើ បានឲ្យដឹងថាលោក នូ ថេរ អភិបាលស្រុកលំផាត់ បានប្រើប្រាស់វេទិកាសាធារណៈកាលពីថ្ងៃទី៣១ ខែសីហា ឆ្នាំ២០១៧ ចោទប្រកាន់ពួកគាត់ថាជាអ្នកគាំទ្រគណបក្សប្រឆាំង ប៉ុនប៉ងធ្វើអបគមន៍និងញុះញង់ឲ្យអ្នកភូមិប្ដឹងអាជ្ញាធរ។ ការចោទប្រកាន់ទាំងបំពានរបស់លោក នូ ថេរ បានកើតឡើងបន្ទាប់ពីប្រជាសហគមន៍ជាង៣០នាក់កាលពីខែមិថុនាកន្លងទៅ បានរកឃើញសកម្មភាពកាប់រានដីព្រៃក្នុងតំបន់ដែនជម្រកសត្វព្រៃលំផាត់ ហើយដាក់ពាក្យបណ្ដឹងទៅតុលាការដើម្បីប្ដឹងមន្ត្រីអាជ្ញាធរមូលដ្ឋាន និងមន្ត្រីអនុរក្សដែលជម្រកសត្វព្រៃពីបទមិនទប់ស្កាត់សកម្មភាពបំផ្លាញព្រៃឈើ។ នៅក្នុងវេទិកាសាធារណៈកាលពីថ្ងៃទី៣១ ខែសីហា ឆ្នាំ២០១៧ លោក នូ ថេរ អភិបាលស្រុកលំផាត់ បែរជាចោទប្រកាន់ពលរដ្ឋអ្នកការពារព្រៃឈើថាជាអ្នកប្រព្រឹត្តបទល្មើសព្រៃឈើទៅវិញ ហើយទង្វើបែបនេះជាការបំបាក់ស្មារតីប្រជាពលរដ្ឋ៕
Recent Comments