ប្រភពពីប្រជាពលរដ្ឋ រស់នៅក្នុងភូមិដងទង់ សង្កាត់កូនក្រៀល ក្រុងសំរោង ខេត្តឧត្ដរមានជ័យ បានឲ្យដឹងថា ក្រុមឈ្មួញដែល កំពុងបន្តសកម្មភាព ប្រមូលទិញឈើគ្រញូងតាម ព្រំដែនបច្ចុប្បន្នភាគច្រើន ជាមន្ត្រីយោធា និង ជាមន្ត្រីនគរបាល។ ការដែល ឈ្មួញទាំងអស់ នោះអាចធ្វើអ្វីៗបាន តាមអំពើចិត្ត គឺដោយ សារមេរដ្ឋបាលព្រៃឈើ ខេត្តឧត្ដរមានជ័យ លោក អ៊ឹម សាវរិទ្ធ និងអភិបាលខេត្តឧត្ដរ មានជ័យ លោក ស ថាវី មិនចាត់វិធានការបង្ក្រាប ឲ្យស្របទៅតាមបទបញ្ជា លេខ០០២ របស់រដ្ឋាភិបាល ។ មជ្ឈដ្ឋានខ្លះសង្ស័យថាលោក ស ថាវី ជាអភិបាលខេត្ត និងលោក អ៊ឹម សាវរិទ្ធ ជានាយខណ្ឌរដ្ឋបាល ព្រៃឈើខេត្តឧត្ដរមានជ័យ ទំនងជាទទួលបានផលប្រយោជន៍ ពីក្រុមឈ្មួញជួញដូរ ឈើគ្រញូងទើបបណ្ដោយឲ្យ បទល្មើសបន្តរាល ដាល យ៉ាងពេញបន្ទុកដូចសព្វថ្ងៃនេះ។
តាមប្រភពពីប្រជាពលរដ្ឋរស់នៅតាមបណ្ដាភូមិមួយចំនួនក្នុងសង្កាត់កូនក្រៀល ក្រុងសំរោង ខេត្តឧត្ដរមានជ័យ បានឲ្យដឹងថាលោក រស់ ជុក ជានាយទាហាននៅអង្គភាពកងពលតូចលេខ៤២ គឺជាឈ្មួញឈើល្បីល្បាញយូរមកហើយ។ សកម្មភាពប្រមូលទិញឈើគ្រញូងរបស់លោក រស់ ជុក ពីពលរដ្ឋខ្មែរដែលចូលកាប់ឈើគ្រញូងលើទឹកដីសៀម ត្រង់ចំណុចបង្គោលឡាក់លេខ១២ លេខ១១ និងលេខ១៣ លើផ្លូវយុទ្ធសាស្ត្រក្រវាត់ព្រំដែនតែងតែប្រព្រឹត្តទៅដោយរលូន។ លោក អ៊ឹម សាវរិទ្ធ នាយខណ្ឌរដ្ឋបាលព្រៃឈើខេត្តឧត្ដរមានជ័យ និងលោក ស ថាវី អភិបាលខេត្តឧត្ដរមានជ័យ មិនទាន់ចាត់វិធានការលើមន្ត្រីយោធាឈ្មោះ រស់ ជុក ដែលឈ្មួញឈើគ្រញូងដ៏ល្បីក្នុងក្រុងសំរោង ខេត្តឧត្ដរមានជ័យ ។
ប្រភពពីមន្ត្រីយោធាក្នុងកងពលតូចលេខ៤២មួយចំនួនបានឲ្យដឹងថា មន្ត្រីជំនាញនិងសមត្ថកិច្ចពាក់ព័ន្ធប្រហែលទទួលបានផលប្រយោជន៍ពីលោក រស់ ជុក ជាប្រចាំទើបមិនចាត់វិធានការទប់ស្កាត់បទឧក្រិដ្ឋជួញដូរឈើគ្រញូងខុសច្បាប់។ ប្រភពបានឲ្យដឹងទៀតថា ក្រៅពីលោក រស់ ជុក ដែលបន្តសកម្មភាពប្រមូលទិញឈើយ៉ាងសុខស្រួល គឺមានឈ្មោះ ភោគ ផន ជាមន្ត្រីយោធាតំបន់ប្រតិបត្តិការសឹករងស្រុកអន្លង់វែង ក៏ជាឈ្មួញប្រមូលទិញឈើគ្រញូងនៅចំណុចបង្គោលឡាក់លេខ១១ ជាយូរមកហើយផងដែរ។ ប្រភពបានបញ្ជាក់ថា មន្ត្រីយោធាឈ្មោះ ភោគ ផន តែងតែជំរិតពលរដ្ឋប្រមាណ១០នាក់ឆ្លងដែនចូលកាប់ឈើគ្រញូងលើទឹកដីសៀមយកមកលក់ឲ្យខ្លួនតម្លៃទាប ហើយបើពលរដ្ឋណាមិនលក់ឈើគ្រញូងឲ្យខ្លួនទេ គឺឈ្មោះ ភោគ ផន នឹងចាត់វិធានការបង្ក្រាបភ្លាមតែម្តង៕
Recent Comments