ខេត្តបន្ទាយមានជ័យ ៖ប្រភពបានទម្លាយ ឲ្យដឹងដែរថា ប៉ុស្ដិ៍ជជុះរបស់មន្ត្រីគយ ខេត្តបន្ទាយមានជ័យ នៅភូមិកូនដំរី សង្កាត់ និមិត្ត ក្រុងប៉ោយប៉ែត ក្បែរផ្លូវលេខ៥០ កំពុងប្រើអំណាច ជំរិតយកលុយ ពីអ្នករត់តាក់ស៊ី អ្នកបើករថយន្ត ឈ្នួល ដឹក ជញ្ជូនទំនិញ និងពីឈ្មួញ តូចតាច ដោយគ្មាន ចេញវិក្កយបត្រ ត្រឹមត្រូវឡើយ។ ចំណែកប៉ុស្ដិ៍ជជុះ របស់មន្ត្រីគយ នៅចំណុច សាលាក្រហម ផ្លូវជាតិលេខ៥ ឃុំសុភី ស្រុកអូរជ្រៅ ខេត្តបន្ទាយមានជ័យ ក៏កំពុងធ្វើសកម្មភាព មិនខុសពីប៉ុស្ដិ៍ជជុះ នៅក្នុងភូមិ កូនដំរីនោះទេ។ រីឯប៉ុស្ដិ៍ជជុះរបស់មន្ត្រីគយ នៅចំណុចជិតកន្លែង លក់នំក្រឡាន ផ្លូវជាតិលេខ៥ ឃុំគោកទន្លាប់ ស្រុកមង្គលបុរី ខេត្តបន្ទាយមានជ័យ គឺជាទីតាំងបិទច្រក មិនឲ្យឈ្មួញគេចវេះបានឡើយ ហើយឈ្មួញ និងអ្នករត់តាក់ស៊ី អ្នកបើករថយន្តឈ្នួល ដឹកជញ្ជូនទំនិញ ត្រូវតែបង់លុយឲ្យមន្ត្រីគយ ប្រចាំកុងត្រូលជជុះ ទាំង ៣កន្លែងខាងលើនេះ។
មន្ត្រីគយតូចតាច បានឲ្យដឹងថា មួយរយៈពេលកន្លងទៅនេះ លោក ឆែ សុធា ប្រធានសាខាគយ ខេត្តបន្ទាយមានជ័យ ដែលមានខ្នងបង្អែករឹងមាំ កំពុងប្រមូលលុយ តាមរបៀបពុករលួយ ដោយគ្មានញញើតអ្វីទាំងអស់។ ជាក់ស្ដែងលោក ឆែ សុធា បានបើកដៃ ឲ្យមន្ត្រីក្រោមឱវាទ បង្កើតកុងត្រូលជជុះ ៣កន្លែង នៅផ្លូវលេខ៥០ និងផ្លូវជាតិលេខ៥ ដើម្បីជំរិតយកលុយ ពីអ្នករត់តាក់ស៊ី ពីអ្នកបើករថយន្តឈ្នួល ដឹកជញ្ជូនទំនិញ ក៏ដូចជាជំរិតយកលុយ ពីក្រុមឈ្មួញធំៗ ដឹកជញ្ជូនទំនិញ ពីព្រំដែនឆ្លងកាត់ ខេត្តបន្ទាយមានជ័យ។
ប្រភពដែលស្និទ្ធនឹងលោក ឆែ សុធា ប្រធានសាខាគយ ខេត្តបន្ទាយមានជ័យ បានឲ្យដឹងថា ប្រសិនបើគ្មានការបើកដៃពីលោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករ ទេនោះ គឺលោក ឆែ សុធា មិនអាចធ្វើអ្វីៗ តាមអំពើចិត្តបានឡើយ។ ដោយសារតែលោក ឆែ សុធា មានឧកញ៉ា លី យ៉ុងផាត់ និងលោក គុណ ញឹម ជាខ្នងបង្អែក ទើបហ៊ានបង្កើតកុងត្រូលជជុះ ដល់ទៅ ៣កន្លែង ដើម្បីប្រមូលលុយតាមរបៀបពុករលួយដូចនេះទេ ។ ឈ្មួញដែលដឹកជញ្ជូនទំនិញ ឆ្លងកាត់ផ្លូវជាតិលេខ៥០ និងផ្លូវជាតិលេខ៥ ក្នុងខេត្តបន្ទាយមានជ័យ បើទោះប្បីបង់ពន្ធជូនរដ្ឋត្រឹមត្រូវ និងជាទំនិញស្របច្បាប់យ៉ាងណាក៏ដោយ ក៏ចៀសមិនផុត ពីបង់លុយ ក្បាលរថយន្ត ឲ្យមន្ត្រីគយ ប្រចាំប៉ុស្ដិ៍ជជុះ ទាំង ៣កន្លែងដើម្បីចៀសផុត ឡើយ។
ប្រភពបានឲ្យដឹងទៀតថា កន្លងមកគយចល័ត ក្នុងខេត្តបន្ទាយមានជ័យ ធ្លាប់បង្ក្រាបរថយន្តក្រុង ដឹកអ្នកដំណើរ ដែលមានបង្កប់ ទំនិញគេចពន្ធ និងទំនិញខុសច្បាប់ ពីច្រកព្រំដែនប៉ោយប៉ែត និងពីច្រកព្រំដែននានា ក្នុងខេត្តបន្ទាយមានជ័យ។ ក៏ប៉ុន្តែក្រោយពេល មានការសម្របសម្រួល បង់លុយឲ្យក្រុមគយពុករលួយ ចាប់ពី រាប់រយដល់ រាប់ពាន់ដុល្លារ ក្នុង ១ខែ ទើបគ្មានការបង្ក្រាប រថយន្តក្រុង បង្កប់ទំនិញគេចពន្ធ ដូចកាលពីមុនទៀតទេ៕
Recent Comments