ប្រភពពីមន្ត្រីគយ នៅខេត្តរតនគិរីបានឲ្យដឹងថា លោក អន អង្គារ៉ា ហ៊ានធ្វើអ្វីៗ ស្រេចតែអំពើចិត្តគឺដោយ សារអាងមានខ្នង បង្អែក រឹងមាំនិងធំជាងលោក គុណ ញឹម ដែលជាអគ្គនាយក នៃអគ្គនាយកដ្ឋានគយ និងរដ្ឋាករទៅទៀត។ ហេតុនេះហើយទើប លោក អន អង្គារ៉ា ហ៊ានបើកដៃឲ្យឈ្មួញនាំ ចូលទំនិញគេចពន្ធ ទំនិញបង់ពន្ធ មិនគ្រប់ និងមានការបន្លំ ប្រភេទទំនិញដើម្បី ប្រមូលលុយដាក់ហោប៉ៅយ៉ាស្រួល ។ ហេតុនេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គួរពិនិត្យមើលបញ្ហាខាងលើនេះផង ព្រោះមួយរយៈពេលចុងក្រោយនេះលោក អន អង្គារ៉ា ឃុបឃិតឲ្យឈ្មួញនាំចូលទំនិញគេចពន្ធ និងទំនិញខុសច្បាប់កាន់តែច្រើនឡើងៗ ហើយក៏មានការឃុបឃិតឲ្យឈ្មួញនាំចេញឈើទៅស្រុកយួនកាន់តែច្រើនឡើងៗផងដែរ។ ទង្វើរបស់លោក អន អង្គារ៉ា ធ្វើឲ្យវិធានការកែទម្រង់ស៊ីជម្រៅក្នុងស្ថាប័នគយ គឺជារឿងឥតន័យព្រោះមន្ត្រីគយពុករលួយដូចជា លោក អន អង្គារ៉ា នៅតែប្រើអំណាចនិងតួនាទីប្រព្រឹត្តអំពើពុករលួយដដែល ។
រឿងអាស្រូវពុករលួយរបស់លោក អន អង្គារ៉ា ប្រធានការិយល័យគយច្រកទ្វារអន្តរជាតិអូរយ៉ាដាវ ស្រុកអូរយ៉ាដាវ ខេត្តរតនគិរី ក្នុងការបើកដៃឲ្យឈ្មួញនាំចូលរថយន្តអត់ពន្ធ ទំនិញគេចពន្ធនិងទំនិញបង់ពន្ធមិនគ្រប់តាមច្រកនេះ ត្រូវបានបើកកកាយជាបន្តបន្ទាប់។ ក៏ប៉ុន្តែរហូតមកដល់ពេលនេះលោក គុណ ញឹម ជាអគ្គនាយកគយ មិនទាន់ចាត់វិធានការទប់ស្កាត់អំពើពុករលួយយ៉ាងពេញបន្ទុករបស់លោក អន អង្គារ៉ា ប្រធានការិយាល័យគយច្រកអូរយ៉ាដាវនោះទេ។ ចំណែកលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏មិនទប់ស្កាត់អំពើពុករលួយរបស់លោក អន អង្គារ៉ា នោះដែរបើទោះបីការហូរចូលទំនិញគេចពន្ធ និងទំនិញបង់ពន្ធមិនគ្រប់តាមច្រកអូរយ៉ាដាវ ធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់ក៏ដោយ។
សមត្ថកិច្ចពាក់ព័ន្ធនិងមន្ត្រីមួយចំនួននៅច្រកទ្វារអន្តរជាតិអូរយ៉ាដាវ បានឲ្យដឹងថាក្រៅពីឃុបឃិតបើកដៃឲ្យឈ្មួញនាំចូលរថយន្តអត់ពន្ធ ទំនិញគេចពន្ធ និងទំនិញបង់ពន្ធមិនគ្រប់តាមច្រកអូរយ៉ាដាវ គឺលោក អន អង្គារ៉ា មានជាប់ពាក់ព័ន្ធករណីឈ្មួញដឹកជញ្ជូនឈើទៅលក់នៅស្រុកយួនផងដែរ។ ប្រភពបានឲ្យដឹងទៀតថា លោក អ៊ី ចំរើន មេនគរបាលអន្តោប្រវេសន៍ច្រកអូរយ៉ាដាវ និងលោក អន អង្គារ៉ា ជាមេគយប្រចាំច្រកនេះ ឃុបឃិតគ្នាបើកដៃឲ្យឈ្មួញដឹកជញ្ជូនឈើចូលស្រុកយួនក្នុងមួយថ្ងៃៗពី៣០០ទៅ៤០០ម៉ែត្រគូបដើម្បីប្រមូលលុយញាត់ហោប៉ៅយ៉ាងសុខស្រួល។ ដូច្នេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មិនគួរបណ្ដែតបណ្ដោយតទៅទៀតទេ ហើយត្រូវចាត់វិធានការស៊ើបអង្កេតទៅលើអំពើពុករលួយរបស់លោក អន អង្គារ៉ា មេគយច្រកអូរយ៉ាដាវជាបន្ទាន់៕
Recent Comments