ប្រជានេសាទជាលក្ខណៈ គ្រួសារតាមភូមិមួយចំនួន នៃឃុំអំពិលទឹក ស្រុកកំពង់ត្រឡាច បានឲ្យដឹងថាពួកគាត់បាន ឃើញជនល្មើស ប្រើរបាំងសាច់អួន និងរបាំងស្បៃមុង រាប់រយកន្លែងដែលមាន ប្រវែងបណ្ដោយមិនតិច ជាង១០០ម៉ែត្រត្រូវ គេដាក់ដើម្បី ចាប់ត្រីទាំងតូច ទាំងធំក្នុងឃុំអំពិលទឹក និងឃុំកំពង់ត្រឡាច ស្រុកកំពង់ត្រឡាច។ ប្រភពបានឲ្យដឹងទៀតថា កូនត្រីល្អិតៗ រាប់រយគីឡូក្រាម ដែលគេចាប់បានក្នុង មួយថ្ងៃៗត្រូវគេយក ធ្វើជាចំណីត្រីឆ្ដោតាម ស្រះក្នុងឃុំអំពិលទឹក និងឃុំកំពង់ ត្រឡាច ហើយគ្មានមន្ត្រីជំនាញឬសមត្ថកិច្ចពាក់ព័ន្ធណាចាត់វិធានការទប់ស្កាត់នោះទេ។ ប្រជានេសាទជាលក្ខណៈគ្រួសារបានឲ្យដឹងថា ពេលឃើញបទល្មើសកើតឡើងពួកគាត់តែងរាយការណ៍ទៅមន្ត្រីរដ្ឋបាលជលផល មន្ត្រីអាជ្ញាធរ និងសមត្ថកិច្ចពាក់ព័ន្ធ ប៉ុន្តែគេមិនចាត់វិធានការទប់ស្កាត់បទល្មើសតាមស្ថានភាពជាក់ស្ដែងនោះឡើយ ។
ប្រជាពលរដ្ឋនៅឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង បានអំពាវនាវឲ្យលោក អេង ជាសាន អគ្គនាយករដ្ឋបាលជលផល ចាត់វិធានការទប់ស្កាត់បទល្មើសនេសាទដែលកើតឡើងយ៉ាងរាលដាលនៅក្នុងមូលដ្ឋានរបស់ពួកគាត់។ ប្រជានេសាទក្នុងឃុំអំពិលទឹក បានរិះគន់ថា មន្ត្រីរដ្ឋបាលជលផល និងមន្ត្រីអាជ្ញាធរ ក៏ដូចជាសមត្ថកិច្ចពាក់ព័ន្ធ មិនបង្ក្រាបឧបករណ៍ខុសច្បាប់ប្រភេទរបាំងសាច់អួននិងស្បៃមុងដែលកំពុងតែកើតឡើងក្នុងរដូវបិទនេសាទនោះទេ។ ចំណែកលោក សោម ភារុណ នាយខណ្ឌរដ្ឋបាលជលផលខេត្តកំពង់ឆ្នាំង ដែលល្បីល្បាញខាងប្រព្រឹត្តអំពើពុករលួយនោះ កំពុងតែរក្សាភាពស្ងៀមស្ងាត់ក្នុងខណៈដែលបទល្មើសនេសាទកើតឡើងយ៉ាងអនាធិបតេយ្យនៅស្រុកកំពង់ត្រឡាច។
ប្រជានេសាទក្នុងឃុំអំពិលទឹក និងឃុំកំពង់ត្រឡាច បានសម្ដែងសេចក្ដីព្រួយបារម្ភយ៉ាងខ្លាំងចំពោះការបំផ្លាញធនធានមច្ឆជាតិយ៉ាងពេញបន្ទុកក្នុងរដូវបិទនេសាទ ហើយលោក ងិន ហ៊ុន ប្រធានមន្ទីរកសិកម្មខេត្តកំពង់ឆ្នាំង និងលោក សោម ភារុណ នាយខណ្ឌរដ្ឋបាលជលផលខេត្តកំពង់ឆ្នាំង មិនចាត់វិធានការបង្ក្រាបឡើយ។ ចំណែកប្រជាពលរដ្ឋរស់នៅស្រុកបរិបូរណ៍ និងស្រុកកំពង់លែង ខេត្តកំពង់ឆ្នាំង ក៏បានរាយការណ៍អំពីករណីបទល្មើសនេសាទប្រើឧបករណ៍នេសាទខុសច្បាប់កើតឡើងយ៉ាងរាលដាលក្នុងមូលដ្ឋានពួកគាត់ផងដែរ ព្រោះមន្ត្រីរដ្ឋបាលជលផលនិងសមត្ថកិច្ចពាក់ព័ន្ធមិនបង្ក្រាបបទល្មើសទ្រង់ទ្រាយធំដែលកំពុងកើតឡើងយ៉ាងពេញបន្ទុកនោះទេ។ ប្រជានេសាទបានរិះគន់ថា មន្ត្រីជំនាញនិងសមត្ថកិច្ចពាក់ព័ន្ធ ព្រមទាំងមន្ត្រីអាជ្ញាធរ បង្ក្រាបតែបទល្មើសតូចតាច ចំណែកបទល្មើសធំៗនៅតែកើតមានយ៉ាងអនាធិបតេយ្យ ៕
Recent Comments