លោក ឱម យ៉ិនទៀង ប្រធានអង្គភាពប្រឆាំង អំពើពុករលួយ មិនគួរមើល រំលងតទៅទៀតទេ ហើយត្រូវបើកការ ស៊ើបអង្កេតជុំវិញ រឿងអាស្រូវ ពុករលួយរបស់លោក យ៉ែម ហេមរ៉ាត ជាបន្ទាន់ព្រោះរយៈ ពេលប្រមាណ២ខែកន្លងទៅនេះ លោក យ៉ែម ហេមរ៉ាត ប្រើអំណាច ប្រព្រឹត្តអំពើពុករលួយ បំផ្លាញចំណូលពន្ធរដ្ឋ ដោយគ្មានញញើតអ្វីទាំងអស់។
មន្ត្រីគយនៅក្នុងខេត្តបាត់ដំបង បានឲ្យដឹងថាលោក យ៉ែម ហេមរ៉ាត ប្រធានការិយាល័យគយច្រកអូររំដួល ស្រុកភ្នំព្រឹក ខេត្តបាត់ដំបង កំពុងប្រើអំណាចប្រមូលលុយតាមរបៀបពុករលួយដោយគ្មានញញើតអ្វីទាំងអស់ ព្រោះអាងមានខ្នងបង្អែករឹងមាំធំជាងលោក គុណ ញឹម ដែលជាអគ្គនាយកគយទៅទៀត។ ដោយសារតែអាងមានខ្នងបង្អែករឹងមាំបែបនេះហើយ ទើបលោក យ៉ែម ហេមរ៉ាត ហ៊ានបើកច្រកឲ្យឈ្មួញនាំចូលទំនិញគេចពន្ធ និងទំនិញខុសច្បាប់ទាំងយប់ខុសម៉ោងរដ្ឋបាល ដើម្បីជាថ្នូរនឹងផលប្រយោជន៍ ។ ភាពមិនប្រក្រតីនេះគឺជារឿងដែលលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មិនគួរមើលរំលងតទៅទៀតទេ។
តាមប្រភពពីសមត្ថកិច្ចពាក់ព័ន្ធនៅច្រកអូររំដួល បានឲ្យដឹងថាលោក យ៉ែម ហេមរ៉ាត ត្រូវបានថ្នាក់លើដកបញ្ឈរជើងមួយរយៈដោយសារតែរឿងអាស្រូវពុករលួយបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ស្រេចតែអំពើចិត្ត។ ក៏ប៉ុន្តែដោយសារលោក យ៉ែម ហេមរ៉ាត មានខ្នងបង្អែកធំជាងលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករ ទើបអាចវិលត្រឡប់មកកាន់តំណែងជាប្រធានការិយាល័យគយច្រកអូររំដួល ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង យ៉ាងក្រអឺតក្រទមហើយប្រព្រឹត្តអំពើពុករលួយខ្លាំងជាងមុនទៅទៀត។ ប្រភពបានឲ្យដឹងទៀតថា បច្ចុប្បន្ននេះទំនិញនាំចូលតាមច្រកអូររំដួល បង់ពន្ធត្រឹមតែ៣០ទៅ៤០ភាគរយប៉ុណ្ណោះ ក្រៅពីនេះគឺមានការបែងចែកផលប្រយោជន៍រវាងឈ្មួញខិលខូចនិងលោក យ៉ែម ហេមរ៉ាត ប្រធានការិយាល័យគយច្រកអូររំដួល យ៉ាងរលូនតែម្តង។
ប្រភពពីប្រជាពលរដ្ឋដែលចេញចូលតាមច្រកអូររំដួលបានឲ្យដឹងថា ក្នុងមួយថ្ងៃៗមានឈ្មួញនាំចូលទំនិញតាមច្រកនេះរាប់រយតោន ដូច្នេះលោក យ៉ែម ហេមរ៉ាត ប្រធានការិយាល័យគយច្រកអូររំដួល ប្រមូលលុយបានយ៉ាងច្រើនយកទៅធ្វើមានធ្វើបានផ្ទាល់ខ្លួនយ៉ាងសុខស្រួល។ ក្រៅពីឃុបឃិតបើកដៃឲ្យឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់ គឺលោក យ៉ែម ហេមរ៉ាត បានឃុបឃិតឲ្យមានបទល្មើសនាំចូលគ្រឿងចក្រ ដើម្បីជាថ្នូរនឹងផលប្រយោជន៍ដោយមិនខ្វល់ពីការរិះគន់អ្វីទាំងអស់ ៕
Recent Comments