សេចក្ដីរាយការណ៍ ពីមន្ត្រីរាជការនៅក្រុងពោធិ៍សាត់ បានឲ្យដឹងទៀតថា កន្លងមកភរិយាលោក ម៉ៅ ធនិន អភិបាលខេត្តពោធិ៍ សាត់ គឺជាអ្នកប្រើអំណាច ធ្វើសកម្មភាពបូមខ្សាច់ នៅតំបន់កោះថាស និងតំបន់ មួយចំនួនទៀតដោយគ្មាន ញញើតអ្វីឡើយ ។ ឥឡូវនេះអ្នកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ក៏ជាប់ពាក់ព័ន្ធទៅ នឹងសកម្មភាព បូមខ្សាច់បំផ្លាញរមណីយដ្ឋាន កោះថាសដែលជាតំបន់ប្រវត្តិសាស្ត្រនោះដែរ? ។ ដោយសារតែអ្នកប្រព្រឹត្តបទល្មើសមានខ្នង បង្អែកយ៉ាងរឹងមាំបែបនេះហើយ ទើបគ្មានមន្ត្រីអាជ្ញាធរឬមន្ត្រីមន្ទីរពាក់ព័ន្ធចាត់វិធានការទប់ស្កាត់បទល្មើសបូមខ្សាច់នៅតំបន់កោះថាស និងតំបន់ទំនប់ទឹកនោះទេ ហើយបណ្ដោយឲ្យបទល្មើសកើតឡើងកាន់តែខ្លាំងថែមទៀត។
ប្រភពពីមន្ត្រីរាជការនិងប្រជាពលរដ្ឋក្នុងក្រុងពោធិ៍សាត់ បានឲ្យដឹងថាសកម្មភាពបូមខ្សាច់នៅតំបន់កោះថាស ក្រុងពោធិ៍សាត់ មានជាប់ពាក់ព័ន្ធនឹងអ្នកស្រី ជា ខេង ភរិយាលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ផងដែរ។ ប្រភពបានឲ្យដឹងទៀតថា ដោយសារអាងមានខ្នងបង្អែកយ៉ាងរឹងមាំបែបនេះហើយ ទើបអ្នកស្រី ជា ខេង ហ៊ានប្រើអំណាចធ្វើអាជីវកម្មបូមខ្សាច់នៅតំបន់កោះថាស ដោយគ្មានញញើតអ្វីទាំងអស់។ ប្រធានមន្ទីររ៉ែ និងថាមពលខេត្តពោធិ៍សាត់ មិនហ៊ានទប់ស្កាត់សកម្មភាពបូមខ្សាច់នៅតំបន់កោះថាស ដែលជាតំបន់ទេសចរណ៍ប្រវត្តិសាស្ត្រនោះទេ ព្រោះខ្លាចអំណាចលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ដែលជាចៅហ្វាយនាយរបស់ខ្លួន។
ប្រជាពលរដ្ឋក្នុងក្រុងពោធិ៍សាត់ បានកត់សម្គាល់ថា នៅពេលឃោសនាបោះឆ្នោតម្តងៗអ្នកស្រី ជា ខេង ភរិយាលោក ស៊ុយ សែម តែងទិញសារុងក្រមា និងប៊ីចេងយកចែកប្រជាពលរដ្ឋដើម្បីបង្ហាញពីទឹកចិត្តល្អរបស់ខ្លួន។ តែតាមពិតអ្នកស្រី ជា ខេង មានជាប់ពាក់ព័ន្ធនឹងសកម្មភាពបូមខ្សាច់នៅតំបន់កោះថាស ប្រមូលលុយបានមិនតិចនោះទេដោយសារអាងប្ដីរបស់ខ្លួនជារដ្ឋមន្ត្រីក្រសួងរ៉ែ និងថាមពល។ បញ្ហានេះលោកនាយករដ្ឋមន្ត្រី ហ៊ុន សែន គួរពិនិត្យមើលឡើងវិញខ្លះផង ព្រោះអ្នកស្រី ជា ខេង អាងមានប្ដីជាខ្នងបង្អែកកំពុងបំផ្លាញធនធានធម្មជាតិក្នុងខេត្តពោធិ៍សាត់ យ៉ាងមហន្តរាយ៕
Recent Comments