ប្រភពបានឲ្យដឹងថា តាមពិតក្រុមផលិតផ្ដល់ប័ណ្ណធានារ៉ាប់រង សុខភាពរបស់ប្រជាពលរដ្ឋក្រីក្រ នៅក្នុងស្រុកអង្គរជុំ ស្រុកពួក និង ស្រុកវ៉ារិន គឺមាន លោក ម៉ក់ សំអឿន ជាម្ចាស់ភាគហ៊ុននិងជា ប្រធានការិយាល័យសុខាភិបាល ស្រុកប្រតិបត្តិអង្គរជុំ ប្រមូល លុយយកទៅធ្វើមានធ្វើបាន ផ្ទាល់ខ្លួនយ៉ាងសប្បាយ ។ ដូច្នេះលោក ម៉ម ប៊ុនហេង រដ្ឋមន្ត្រីក្រសួងសុខា ភិបាល មិនគួរបណ្ដែតបណ្ដោយ តទៅទៀតទេ ហើយត្រូវចាត់វិធានការទប់ស្កាត់ អំពើពុករលួយរបស់លោក ម៉ក់ សំអឿន ជា បន្ទាន់ កុំអោយបុគ្គលនេះជិះសេះលែងដៃ។
ប្រជាពលរដ្ឋម្ចាស់ឆ្នោតរស់នៅក្នុងស្រុកអង្គរជុំ ស្រុកពួក និងស្រុកវ៉ារិន ព្រមទាំងមន្ត្រីសុខាភិបាលកំពុងបម្រើការងារក្រោមការគ្រប់គ្រងរបស់លោក ម៉ក់ សំអឿន បានបើកកកាយទង្វើមិនប្រក្រតីរបស់មន្ត្រីរូបនេះដើម្បីឲ្យថ្នាក់លើចាត់វិធានការដោះស្រាយ។ បញ្ហានេះលោក ម៉ម ប៊ុនហេង រដ្ឋមន្ត្រីក្រសួងសុខាភិបាល មិនគួរមើលរំលងតទៅទៀតទេ ព្រោះកន្លងមកប្រធានមន្ទីរសុខាភិបាលខេត្តសៀមរាប មិនចាត់វិធានការទប់ស្កាត់ទង្វើមិនប្រក្រតីនិងអំពើពុករលួយរបស់លោក ម៉ក់ សំអឿន ទាល់តែសោះ។ លោក ម៉ក់ សំអឿន ដែលជាប្រធានការិយាល័យសុខាភិបាលស្រុកប្រតិបត្តិអង្គរជុំ ដែលគ្របដណ្ដប់លើវិស័យសុខាភិបាលចំនួន៣ស្រុក គឺស្រុកអង្គរជុំ ស្រុកពួក និងស្រុកវ៉ារិន កំពុងធ្វើអ្វីៗស្រេចតែអំពើចិត្តរបស់ខ្លួនដោយមិនខ្វល់ពីការរិះគន់អ្វីទាំងអស់។
លិខិតមួយចុះថ្ងៃទី០៧ ខែសីហា ឆ្នាំ២០១៧ ពលរដ្ឋម្ចាស់ឆ្នោតនិងមន្ត្រីសុខាភិបាលក្នុងស្រុកទាំង៣ខាងលើ បានលើកឡើងថា កន្លងមកលោក ម៉ក់ សំអឿន ពុំមានដំណោះស្រាយលើកម្លាំងពលកម្មការងារ(មិនបានផ្ដល់ប្រាក់ហិរញ្ញប្បទានដល់បុគ្គលិក) សម្រាប់មន្ត្រីសុខាភិបាលសាធារណៈក្រោមឱវាទក្នុងក្រមខ័ណ្ឌជាបុគ្គលិកមណ្ឌលសុខភាពនិងមន្ទីរពេទ្យក្នុងស្រុកអង្គរជុំ ស្រុកពួក និងស្រុកវ៉ារិន។ នៅក្នុងលិខិតនោះបានបញ្ជាក់ថា ចាប់តាំងពីខែកញ្ញា ឆ្នាំ២០១៥ ដល់ខែកុម្ភៈ ឆ្នាំ២០១៦ លោក ម៉ក់ សំអឿន និងបក្ខពួកបានកេងយកផលប្រយោជន៍ផ្ទាល់ខ្លួនពីអង្គភាពសុខាភិបាលសាធារណៈនិងប្រជាពលរដ្ឋជាមួយអាជ្ញាធរមូលដ្ឋានដែលបានបង្កើតជាប័ណ្ណធានារ៉ាប់រងសុខភាពរបស់ប្រជាពលរដ្ឋទាំង៣ស្រុក។ ក្នុងការធ្វើប័ណ្ណនោះប្រជាពលរដ្ឋបង់ប្រាក់មុនក្នុងម្នាក់ៗ១ម៉ឺនរៀលជាថ្នូរនឹងការទទួលបានកាតសម្រាប់ប្រើប្រាស់នៅពេលមានជំងឺក្នុងរយៈពេល១ឆ្នាំដើម្បីមកទទួលការផ្ដល់សេវាសុខាភិបាលនៅមណ្ឌលសុខភាព និងមន្ទីរពេទ្យដោយឥតគិតថ្លៃក្នុងតំបន់គ្រប់គ្រងរបស់ការិយាល័យសុខាភិបាលស្រុកប្រតិបត្តិអង្គរជុំ។
នៅក្នុងលិខិតចុះថ្ងៃទី០៧ ខែសីហា ឆ្នាំ២០១៧ បានបញ្ជាក់ទៀតថា ថវិកាទាំងនោះមិនត្រូវបានលោក ម៉ក់ សំអឿន យកទៅទូទាត់តាមកិច្ចសន្យាឡើយដែលជាហេតុធ្វើឲ្យប្រជាពលរដ្ឋមានការខកចិត្តយ៉ាងខ្លាំង ជាពិសេសបុគ្គលិកសុខាភិបាលនៅក្នុងតំបន់ដាច់ស្រយាលទាំង៣ស្រុក។ គួររំលឹកដែរថាកាលពីដើមឆ្នាំ២០១៦កន្លងទៅ អង្គភាពប្រឆាំងអំពើពុករលួយ បានស្ដាប់ការបកស្រាយរបស់លោកវេជ្ជបណ្ឌិត ម៉ក់ សំអឿន ម្តងរួចមកហើយប៉ុន្តែការបំភ្លឺនោះផ្ទុយពីការពិតទាំងស្រុង ហើយបច្ចុប្បន្នលោក ម៉ក់ សំអឿន និងបក្ខពួកនៅតែធ្វើអ្វីៗតាមអំពើចិត្តដដែល៕បឋម
Recent Comments