ខេត្តបន្ទាយមានជ័យ៖ប្រភពពីភ្នាក់ងារគយតូចតាចក្នុងខេត្តបន្ទាយមានជ័យ បានឲ្យដឹងថា ចាប់តាំងពីលោក ឆែ សុធា មកកាន់តំណែងជាប្រធានសាខាគយខេត្តនេះ គឺករណីឈ្មួញនាំចូលទំនិញគេចពន្ធ និងទំនិញបង់ពន្ធមិនគ្រប់នៅតែកើតឡើងយ៉ាងពេញបន្ទុក មិនខុសពីពេលដែលលោក ថោង សុខាំភូ នៅធ្វើជាប្រធានសាខាគយខេត្តបន្ទាយមានជ័យនោះទេ។ ប្រភពបានឲ្យដឹងទៀតថា លោក ឆែ សុធា បើកដៃឲ្យកូនចៅជិតស្និទ្ធជាមួយខ្លួនមួយចំនួន ជំរិតយកលុយពីឈ្មួញ និងអាជីវករបើទោះបីឈ្មួញនិងអាជីវករទាំងនោះបង់ពន្ធត្រឹមត្រូវនៅច្រកព្រំដែនយ៉ាងណាក៏ដោយ។រឿងអាស្រូវរបស់លោក ឆែ សុធា ក្នុងការបណ្ដោយឲ្យកូនចៅបង្កើតកុងត្រូលជជុះជំរិតយកលុយពីអ្នកបើកបររថយន្តតាក់ស៊ីដឹកទំនិញយ៉ាងអនាធិបតេយ្យ ត្រូវបានលាតត្រដាងជាបន្តបន្ទាប់។ ក៏ប៉ុន្តែរហូតមកដល់ពេលនេះ លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករ មិនទាន់មានវិធានការអ្វីលើលើ ឆែ សុធា នៅឡើយទេ។ បច្ចុប្បន្នប៉ុស្ដិ៍ជជុះរបស់គយនៅផ្លូវជាតិលេខ៥ ចន្លោះពីក្រុងប៉ោយប៉ែត មកទីរួមខេត្តបន្ទាយមានជ័យ កំពុងធ្វើឲ្យឈ្មួញតូចតាចនិងអាជីវករជួបការលំបាកយ៉ាងខ្លាំង ព្រោះមន្ត្រីគយឈរជើងនៅប៉ុស្ដិ៍ជជុះទាំងនោះ ប្រើអំណាចគាបយកលុយពីពួកគាត់ដោយគ្មានការយោគយល់ឡើយ។ ផ្ទុយទៅវិញលោក ឆែ សុធា និងបក្ខពួកបានឃុបឃិតឲ្យឈ្មួញធំៗនាំចូលទំនិញគេចពន្ធ និងទំនិញបង់ពន្ធមិនគ្រប់កាន់តែច្រើនឡើងៗដើម្បីជាថ្នូរនឹងផលប្រយោជន៍ ហើយធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ប្រភពដែលស្និទ្ធនឹងលោក ឆែ សុធា បានឲ្យដឹងថា ការដែលមេគយខេត្តបន្ទាយមានជ័យរូបនេះ ហ៊ានធ្វើអ្វីៗតាមអំពើចិត្ត ជាពិសេសការឃុបឃិតបើកដៃឲ្យឈ្មួញនាំចូលទំនិញគេចពន្ធ និងទំនិញខុសច្បាប់ គឺដោយសារអាងមានលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករ ជាខ្នងបង្អែកដ៏រឹងមាំ។ ហេតុនេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គួរពិនិត្យមើលទង្វើមិនប្រក្រតីរបស់លោក ឆែ សុធា ប្រធានសាខាគយខេត្តបន្ទាយមានជ័យ ព្រមទាំងបក្ខពួកខ្លះផង។ ដោយហេតុថា បច្ចុប្បន្នទំនិញគេចពន្ធ ទំនិញបង់ពន្ធមិនគ្រប់ដូចជា ប្រេងសាំង ទំនិញចាប់ហួយ ភេសជ្ជៈជាដើម។ ត្រូវបានឈ្មួញនាំចូលយ៉ាងគគ្រឹកគគ្រេង ហើយលោក ឆែ សុធា និងបក្ខពួកបែរជាគាបសង្កត់ទៅលើឈ្មួញនិងអាជីវករតូចតាច ក៏ដូចជាក្រុមអ្នករត់តាក់ស៊ីដឹកជញ្ជូនទំនិញបន្តិចបន្តួចដើម្បីបានប្រាក់ចំណូលដោះស្រាយជីវភាពទៅវិញ។សារពត៌មានយើងរង់ចាំបកស្រាយរាល់ម៉ោងធើ្វការបើមានប្រតិកម្ម៕
Recent Comments