ខេត្តកំពត ៖ មន្ត្រីនៅច្រកព្រំដែន ព្រែកចាក ក្នុងស្រុកកំពង់ត្រាច បានឲ្យដឹងថា បច្ចុប្បន្ននេះជំនាញគយ បានឃុបឃិត ឲ្យមេឈ្មួញធំៗ នាំចូលទំនិញគេចពន្ធ រាប់សិបឡាន ក្នុងមួយថ្ងៃៗ ដូចជាប្រេងឆា ទឹកត្រចៀកកាំ គ្រឿងឧបភោគ បរិភោគ និងទំនិញចម្រុះ ដោយមិនបានបង់ពន្ធ ត្រឹមត្រូវតាមច្បាប់ នោះទេ ។ ទំនិញគេចពន្ធ ដែលនាំចូលពីវៀតណាម តាមច្រកព្រែកចាក ត្រូវបានក្រុមឈ្មួញ ប្រើប្រាស់រ៉ឺម៉កធំៗ សម្រាប់ដឹកជញ្ជូន ឆ្លងកាត់ព្រំដែន ដើម្បីយកមកទម្លាក់ នៅទឹកដីខ្មែរ ចម្ងាយប្រមាណ ៥០ម៉ែត្រប៉ុណ្ណោះ ពីច្រកព្រំដែន ដោយគេដាក់គរ ពេញចិញ្ចើមផ្លូវ រង់ចាំរថយន្ត មកដឹកជញ្ជូន ចូលទីរួមខេត្តកំពត ដើម្បីលក់ចែកចាយតាម ខេត្តនានា។
តាំងពីពេលដែល លោក ហេង សំបូរ អតីតប្រធាន ការិយាល័យគយ និងរដ្ឋាករ តន់ហន់ ត្រូវបានតែងតាំង ជាមេគយ ខេត្តកំពត កាលពីរសៀល ថ្ងៃទី៥ ខែធ្នូ ឆ្នាំ២០១៦ គេសង្កេតឃើញ មន្ត្រីគយជាច្រើន មិនសប្បាយចិត្តនោះទេ ហើយរហូតដល់ម៉ោងនេះ គេមិនដែលឃើញ លោក ហេង សំបូរ ដឹកនាំបញ្ជា មន្ត្រីក្រោមឱវាទ ចុះស្រាវជ្រាវ និងបង្ក្រាប ការនាំចូល ទំនិញខុសច្បាប់ ជាពិសេសប្រេងសាំង និងទំនិញគេចពន្ធ របស់ឈ្មួញធំៗ ដើម្បីយកស្នាដៃ បង្អួតថ្នាក់លើ សូម្បីតែ ១ករណីសោះឡើយ។
ក្រុមអាជីវករ ដែលនាំទំនិញចេញចូល តាមច្រកព្រែកចាក បានត្អូញត្អែរ រអ៊ូររទាំ ចំពោះការកោសរូស យកលុយក្រៅប្រព័ន្ធ ច្រើនហួសហេតុ ពីសំណាក់មន្ត្រីគយ ទោះបីទំនិញមួយចំនួន បានបង់ពន្ធត្រឹមត្រួវ រួចហើយក៏ដោយ ក៏កូនចៅ លោក ហេង សំបូរ កោសរូសតម្រូវឲ្យបង់លុយ ក្រៅប្រព័ន្ធ ច្រើនជាង អត្រាបង់ពន្ធគយ ស្របច្បាប់ទៅទៀត ដូចជាទំនិញ ដឹកតាមរ៉ឺម៉កម៉ូតូ ត្រូវបង់ចំនួន ១០ម៉ឺនរៀល ក្នុងមួយជើង និងមួយរ៉ឺម៉ក។ រថយន្តកូរ៉េធុនតូច ត្រូវបង់ចំនួន ៣០ម៉ឺនរៀល ក្នុងមួយជើង និងមួយគ្រឿង។ រថយន្តធុនធំ ត្រូវបង់ចំនួន ១លានរៀល ក្នុងមួយជើង និងមួយគ្រឿង ដោយមិនទាន់គិត ដល់ការបង់ប្រាក់ប្រចាំខែផង។
ចំពោះការដឹកជញ្ជូន ប្រេងសាំង របស់ក្រុមឈ្មួញធំៗ ពីចំណុចកោះខ្យង និងកោះរ៉ុង ចូលមកស្រុកព្រៃនប់ និងបន្តយកមកចែកចាយ ទូទាំងខេត្តកំពត ជាពិសេសស កម្មភាពដឹកជញ្ជូន ប្រេងសាំងគេចពន្ធ តាមទូក ដែលមានមន្ត្រី ការពារព្រំដែនទឹកជាអ្នកកាង ធ្វើឲ្យខាតបង់ចំណូលថវិកាជាតិ ច្រើនសន្ធឹកសន្ធាប់ បែរជាជំនាញគយ ខេត្តកំពត សប្បាយប្រមូលលុយ យកទៅធ្វើមានធ្វើបានផ្ទាល់ខ្លួន ៕
Recent Comments