លោក​ គង់​ ភៀច​ ប្រធាននាយ​កដ្ឋានក​សិ-ឧស្សា​ហកម្មម​ន្ត្រីរាជកា​របន្តរិះ​គន់យ៉ាងខ្លាំង

លោក គង់ ភៀច ប្រធាននាយកដ្ឋានកសិ-ឧស្សាហកម្មមន្ត្រីរាជការបន្តរិះគន់យ៉ាងខ្លាំង

May 5, 2017 -

រាជធានីភ្នំពេញ ៖មន្ត្រីរាជការ បាននិយាយថានាយកដ្ឋាន ជំនាញមួយនេះអាចនិយាយថា ជាមុខមាត់របស់ក្រសួង កសិកម្ម ព្រោះថា បើនាយកដ្ឋានមួយនេះ មិនមានការរីកចំរើននោះទេ ក្រសួងក៏មិនមានមុខមាត់ នោះដែរ ។
មន្ត្រីរាជការ ទាំងនោះបានបញ្ជាក់ថា លោក គង់ ភៀច បានប្រើយុទ្ធវិធី ដកការងារពីការិយាល័យ ជំនាញមួយចំនួន ដែលគេគិតថា មានផលប្រយោជន៍ យកទៅឲ្យមន្ត្រីនៅ ការិយាល័យផ្សេងទៀតធ្វើទាំងខុសជំនាញ ខណដែលមន្ត្រី ទាំងនោះ ជាមនុស្ស ជិតស្និទ្ធជា មួយលោក ។ ផ្តើមពីនោះ បង្កលក្ខណៈងាយស្រួល ដល់លោកក្នុងការ ប្រមែប្រមូលផលប្រយោជន៍ ។ ទន្ទឹមនោះចាប់តាំងពីលោក គង់ ភៀច ឡើងកាន់តំណែងជាប្រធាននាយកដ្ឋាន គឺតាមការិយាល័យជំនាញនីមួយៗ ពុំមានសម្ភារៈប្រើប្រាស់សម្រាប់សកម្មភាពការងារប្រចាំថ្ងៃនោះទេ ហើយមិនដឹងលោកប្រធានយកលុយរបបទាំងនោះទៅណាដែរ ។
មន្ត្រីរាជការមួយក្រុម ដែលអះអាងថា កំពុងបម្រើការងារនៅនាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទបានបន្តរិះគន់រាល់ចំណាត់ការមិនប្រក្រតីរបស់លោក គង់ ភៀច ប្រធាននាយកដ្ឋាន ដែលកំពុងបង្កការថ្នាំងថ្នាក់ពីមន្ត្រីថ្នាក់ក្រោម ។
មន្ត្រីរាជការបានទម្លាយព័ត៌មានបន្តបន្ទាប់ថា បើទោះបីជាលោក គង់ ភៀច ទើបទទួលតំណែងប្រធាននាយកដ្ឋាននាពាក់កណ្តាលឆ្នាំ២០១៦មក ប៉ុន្តែបើប្រៀបធៀបការងារក្នុងនាយកដ្ឋានគឺពុំមានអ្វីរីកចំរើនគួរឲ្យកត់សម្គាល់នោះឡើយ ហើយអាចប្រៀបធៀបថា អន់ជាងប្រធាននាយកដ្ឋានមុនទៅទៀត ដោយសារតែអសមត្ថភាពរបស់លោកប្រធាន ឬលោកប្រធានគិតគូរតែរឿងផលប្រយោជន៍ច្រើនជាង ។
ពាក់ព័ន្ធនឹងភាពមិនប្រក្រតី នៃការងារ លោក គង់ ភៀច បានរង់នូវការចោទថា បានយករថយន្តរដ្ឋចំនួន៣គ្រឿងទៅប្រើប្រាស់ជាបុគ្គល ឬក្នុងគ្រួសាររបស់លោក ក្នុងពេលដែលថ្នាក់ដឹកនាំ និងមន្ត្រីជំនាញផ្សេងទៀត មិនមានមធ្យោបាយ ដើម្បីប្រើប្រាស់បំពេញការងារ សំខាន់ការងារចុះតាមបណ្តាខេត្ត ។ រឿងដែលធ្វើឲ្យមន្ត្រីរាជការក្នុងនាយកដ្ឋានហួសចិត្តជាងនេះទៅទៀតនោះ គឺលោក គង់ ភៀច បានឃុបឃិតជាមួយមន្ត្រីជិតស្និទធ្វើលិខិតបេសកកម្មឲ្យតែបក្សពួកខ្លួន ដើម្បីដកលុយមកចាយវាយតាមអំពើចិត្ត ក្នុងនោះក៏មានលិខិតបេសកកម្ម ខ្យល់ ( មិនមានបេសកកម្មចុះធ្វើការតាមខេត្ត តែមាន P ដើម្បីដកលុយ រាប់លាន? ) ។
មន្ត្រីរាជការក្នុងនាយកដ្ឋានបានបង្ហាញនូវការមិនពេញចិត្តចំពោះឥរិយាបថលោក គង់ ភៀច ប្រធាននាយកដ្ឋានកសិ-ឧស្សាហកម្មនោះទេ ហើយបានអំពាវនាវឲ្យថ្នាក់លើជួយកែតម្រង់ការងារលោកប្រធាន ឬ ប្រសិនបើអាចគួរដកតំណែងលោកប្រធានតែម្តង ព្រោះថា បន្តរក្សាទុកលោកប្រធានដែលបំពេញការងារបែបនេះ នាយកដ្ឋានកសិ-ឧស្សាកម្ម និងមិនរីកចម្រើននោះឡើយ ។
ពាក់ព័ន្ធនឹងព័ត៌មានខាងលើនេះព្យាយាមសុំការបំភ្លឺពីលោក គង់ ភៀច ប្រធាននាយកដ្ឋានកសិ-ឧស្សាហកម្ម នៃក្រសួងកសិកម្មរុក្ខាប្រមាញ់ និងនេសាទផងដែរ ប៉ុន្តែមិនទាន់អាចទំនាក់ទំនងសុំការបំភ្លឺបាននៅឡើយ៕