មេបាតុកម្មប្រឆាំងរដ្ឋាភិបាលថៃស្នើអោយព្រះមហាក្សត្រតែងតាំងនាយករដ្ឋមន្ត្រីថ្មី

December 5, 2013 -

មេដឹកនាំគណបក្សភឿថៃ លោកចារូពង់ រឿងស៊ូវ៉ាន បានអះអាងថា សំណើរបស់មេដឹកនាំការប្រឆាំងតវ៉ា លោកស៊ូថេប ធឿកស៊ូបាន សំរាប់នាយករដ្ឋមន្ត្រីម្នាក់ដែលតែងតាំងដោយស្តេច មិនអាចធ្វើទៅបានទេ ។លោកចារូពង់ ដែលក៏ជារដ្ឋមន្ត្រីមហាផ្ទៃ បាននិយាយថាវគ្គទី៧នៃរដ្ឋធម្មនុញ្ញមិនអាចយកមកប្រើ តាមសំណើរបស់ប្រធានគណៈកម្មាធិការកំណែទំរង់ប្រជាធិបតេយ្យរបស់ប្រជាជន(PDRC)លោកស៊ូថេប ពីព្រោះនាយករដ្ឋមន្ត្រី យីងឡាក់ ស៊ីណាវ៉ាត្រានៅកាន់មុខតំណែង និងក៏មិនបានធ្វើអ្វីខុស។លោកបានបញ្ជាក់ថា ដូចរដ្ឋធម្មនុញ្ញបានចែង រដ្ឋាភិបាលគ្រាន់តែអាចរំលាយសភានិងកោះធ្វើការបោះឆ្នោតមុនកាលកំណត់មួយ។ ប្រធានបក្សកាន់អំណាចរូបនេះបានបន្តថា ការតស៊ូនយោបាយត្រូវតែដោះស្រាយតាមរយៈគោលនយោបាយ ស្នាដៃអនុវត្តន៍ការងារ គោលការណ៍និងហេតុផល។”អ្នកចាញ់ឆ្នោតមិនអាចមិនទទួលស្គាល់លទ្ធផល។សភាគួរត្រូវបានប្រើជាវេទិកាសំរាប់កិច្ចពិភាក្សា។ការខ្វែងគំនិតគ្នាត្រូវដោះស្រាយតាមសន្លឹកឆ្នោត។ខ្ញុំចង់អោយក្រុមប្រឆាំងនិងលោកស៊ូថេបចូលមកពិភាក្សាតែពួកគេគួរស្តាប់សម្លេងភាគច្រើន បើមិនដូច្នេះទេនឹងមានការឈ្លោះប្រកែកគ្នា”។

“ពួកគេគួរមានស្មារតីល្អដើម្បីទទួលមតិផ្សេងគ្នារបស់តំណាងប្រជាជន។យើងត្រូវស្តាប់ប្រជាជន។មតិខុសគ្នាត្រូវសំរេចដោយសម្លេងឆ្នោត។សម្លេងភាគតិចត្រូវទទួលយកការពិតនេះ”។

ចំណែកឧបនាយករដ្ឋមន្ត្រីនិងជារដ្ឋមន្ត្រីការបរទេស លោកស៊ូរ៉ាពង់ តូវិចាឆៃគុល បាននិយាយថាការទាមទាររបស់ស៊ូថេបអោយមាននាយករដ្ឋមន្ត្រីតែងតាំងដោយស្តេច វាមិនត្រឹមត្រូវតាមរដ្ឋធម្មនុញ្ញ។”សំណើរបស់ស៊ូថេបជាការស្រមៃមួយ។គាត់ឈឺនិងគួរទៅរកគ្រូពេទ្យ។គាត់អាចស្ថិតក្រោមសម្ពាធខ្លាំងពេកពីបណ្តឹងនិងដីកាចាប់ខ្លួន ជាហេតុនាំអោយគាត់គិតគូរមិនធម្មតា”។

តែ ស៊ូរិយ៉ា កាតាសិឡា អតីតមេដឹកនាំក្រុមអាវលឿងម្នាក់ បាននិយាយថា លោកជឿថា សំណើរបស់ស៊ូថេបអាចកាត់បន្ថយការប្រឈមអំពីការផ្ទុះសង្គ្រាមស៊ីវិលនៅក្នុងប្រទេសនិងបានព្រមានលោកស្រីយីងឡាក់កុំអោយអូសបន្លាយ”ល្បែងនយោបាយ”បច្ចុប្បន្ន ៕