ខេត្ដព្រះវិហារ ៖ ទីតាំងសិប្បកម្មឈើមួយកន្លែងដែលឋិតនៅខាងក្រោយសាលាស្រុករវៀងប្រមាណជិត២០០ម៉ែត្រ ត្រូវបានគេដឹងថា ម្ចាស់សិប្បកម្មខាង លើនេះបានប្រមូលទិញឈើប្រណីតពី ឈ្មួញអនាធិបតេយ្យ ភាគច្រើនពីស្រុក ជ័យសែន និងស្រុកឆែប យកមកកែច្នៃ ក៏ដូចជាស្ដុកទុកដឹកជញ្ជូនមកចែកចាយ នៅរាជធានីភ្នំពេញ ។
សិប្បកម្មឈើខាងលើនេះ ត្រូវបានគេដឹងថា ជាកម្មសិទ្ធិរបស់លោក គង់ រុន នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដែលបានឃុបឃិតគ្នា ជាមួយអាជ្ញាធរ ជំនាញរដ្ឋបាលព្រៃឈើ ហើយស្របពេលដែលលោក គង់ រុន នេះជានគរបាលប្រឆាំងបទល្មើសសេដ្ឋកិច្ចក្រសួង ប្រចាំការទិសខេត្ដព្រះវិហារផង នោះ កាន់តែគឃ្លើនក្នុងការប្រមូលទិញ ឈើខុសច្បាប់ និងគ្មានអ្នកប៉ះពាល់ ។
សមត្ថកិច្ចបានរិះគន់ថា លោក គង់ រុន គឺនាយនគរបាលមួយរូប មានលិខិត បេសកកម្មចុះស៊ើបអង្កេតស្រាវជ្រាវ និង បង្ក្រាបបទល្មើសព្រៃឈើប្រចាំទិសខេត្ដ ព្រះវិហារ ប៉ុន្ដែគាត់បានក្លាយទៅជាអ្នក ជួញឈើខុសច្បាប់ដ៏ធំនៅស្រុករវៀង ខេត្ដព្រះវិហារ តាមរយៈយកអំណាច និង តួនាទីគំរាមកំហែងទៅលើសមត្ថកិច្ច អាជ្ញាធរ និងឃុបឃិតគ្នាជាមួយរដ្ឋបាលព្រៃឈើ ផ្ទុយពីគោលការណ៍របស់អគ្គ ស្នងការនគរបាលជាតិ ។ ជាពិសេស លោក គង់ រុន បានបំពានយ៉ាងធ្ងន់ធ្ងរ ទៅនឹងបទបញ្ជាលេខ០១របស់រាជរដ្ឋាភិបាល ស្ដីពីការបង្ការបង្ក្រាបបទល្មើស ព្រៃឈើ ។
ទីតាំងសិប្បកម្មឈើដ៏ធំរបស់លោក គង់ រុន យ៉ាងហោចណាស់ក៏ប្រើប្រាស់ កម្មករជាជាតិវៀតណាមជាង២០នាក់ ហើយក៏ជាកន្លែងលាក់ទុកឈើប្រណីត សម្រាប់ដឹកចេញមករាជធានីភ្នំពេញ ។
មន្ដ្រីសាលាស្រុករវៀងបាននិយាយថា បើទោះជាទីតាំងសិប្បកម្មនៅមិនដល់ ២០០ម៉ែត្រពីសាលាស្រុកនោះក៏ដោយ កុំថាឡើយតែប្រជាពលរដ្ឋរស់នៅជិតរង នូវសំឡេងម៉ាស៊ីនរំខានដល់ការដេកពួន សូម្បីតែមន្ដ្រីសាលាស្រុកក៏ធុញទ្រាន់ ក្នុងករណីនេះដែរ ប៉ុន្ដែអាជ្ញាធរស្រុកមិន ចាប់អារម្មណ៍ទេ ដោយសារតែមេការ របស់លោក គង់ រុន ជាញឹកញាប់បានគិតគូរសម្រាប់ប្រយោជន៍ណាមួយដល់ អាជ្ញាធរស្រុករវៀង ។
ពាក់ព័ន្ធករណីនេះ លោក ឯ សារូ អភិបាលនៃគណៈអភិបាលស្រុករវៀងប្រហែលជាមានការឃុបឃិតគ្នាជាមួយលោក គង់ រុនប្រព្រឹត្តអំពើពុករលួយដែរហើយមើលទៅ?។ ដោយឡែក លោក គង់ រុន ដែលជានគរ បាលសេដ្ឋកិច្ចក្រសួងមហាផ្ទៃ ហើយ បង្កើតមុខជំនួញឈើខុសច្បាប់យើង មិនអាចទាក់ទងបានទេ ដោយមិនមានលេខទូរស័ព្ទ ។
លោក អ៊ិត ភូម្រា នាយខណ្ឌរដ្ឋបាល ព្រៃឈើខេត្ដព្រះវិហារ មិនអាចទាក់ទង បានទេដោយមិនមានលេខទូរស័ព្ទ ប៉ុន្ដែកន្លងទៅនាយខណ្ឌរូបនេះធ្លាប់បានប្រាប់ថាទីតាំងសិប្បកម្ម ខាងលើ បើតាមលោកដឹងប្រហែលជា មានច្បាប់បានជាគេហ៊ានដំណើរអាជីវកម្ម។
នគរបាលប្រឆាំងបទល្មើសសេដ្ឋកិច្ច ក្រសួងមហាផ្ទៃ បានឱ្យដឹងថា ក្រៅពីមុខរបរប្រមូលទិញឈើប្រណីតខុសច្បាប់ យកមកគរទុកនៅសិប្បកម្មរបស់ខ្លួន ឯស្រុករវៀង លោក គង់ រុន ក៏មានតួនាទីដ៏សំខាន់ផងដែរក្នុងការប្រមូលប្រាក់ពី ក្រុមឈ្មួញឈើខុសច្បាប់ដើម្បីផលប្រយោជន៍បុគ្គល និងដើម្បីបង់ជូនថ្នាក់លើ ។
លោក គង់ រុន កំពុងតែលាតសន្ធឹងអំណាចរបស់ខ្លួន ធ្វើឱ្យប៉ះពាល់ទៅនឹងកិត្ដិយសសេចក្ដីថ្លៃថ្នូររបស់សមត្ថកិច្ច ជាពិសេសបំពានទៅនឹងគោលការណ៍ របស់អគ្គស្នងការនគរបាលជាតិ ខណៈគាត់បានពាក់ព័ន្ធទៅនឹងអំពើពុករលួយ ប្រមូលប្រាក់ពីឈ្មួញឈើខុសច្បាប់ ប្រមូលទិញឈើសម្រាប់អាជីវកម្ម សិប្បកម្មរបស់ខ្លួននេះជាដើម ៕
Recent Comments