មន្ត្រីបម្រើការងារក្នុងអង្គភាពសាខាពន្ធដារខេត្តសៀមរាប បានឲ្យដឹងថា ការប្រព្រឹត្តអំពើពុករលួយរបស់លោក ខូយ ឈឺន និងបក្ខពួកកំពុងកើតឡើងយ៉ាងពេញបន្ទុក ធ្វើឲ្យពលរដ្ឋដែលជាអ្នកត្រូវបង់ពន្ធលើការផ្ទេរកម្មសិទ្ធដីធ្លីចំណាយលុយយ៉ាងច្រើនទៅឲ្យលោក អាំង រ៉ាស៊ី ប្រធានការិយាល័យចុះបញ្ជី ដែលជាមនុស្សជំនិតរបស់លោក ខូយ ឈឺន។ កន្លងមករឿងអាស្រូវពុករលួយរបស់លោក ខូយ ឈឺន និងបក្ខពួកត្រូវបានលាតត្រដាងជាសាធារណៈ ហើយអង្គភាពប្រឆាំងអំពើពុករលួយ ក៏បើកការស៊ើបអង្កេតផងដែរ ក៏ប៉ុន្តែមកដល់ពេលនេះលោក ខូយ ឈឺន នៅបន្តកាន់តំណែងជាប្រធានសាខាពន្ធដារខេត្តសៀមរាប ហើយបន្តប្រព្រឹត្តអំពើពុករលួយខ្លាំងជាងមុនទៅទៀត។ លោក ខូយ ឈឺន ក្នុងនាមជាប្រធានសាខាពន្ធដារខេត្តសៀមរាប បានបណ្ដោយឲ្យលោក អាំង រ៉ាស៊ី ប្រធានការិយាល័យចុះបញ្ជីធ្វើអ្វីៗតាមអំពើចិត្ត ។
មន្ត្រីបម្រើការងារក្នុងអង្គភាពសាខាពន្ធដារខេត្តសៀមរាប មួយចំនួនបានអំពាវនាវឲ្យលោក គង់ វិបុល អគ្គនាយកនៃអគ្គនាយកដ្ឋានពន្ធដារ ក្រសួងសេដ្ឋកិច្ចនិងហិរញ្ញវត្ថុ ចាត់វិធានការលើលោក ខូយ ឈឺន ប្រធានសាខាខេត្តសៀមរាប និងបក្ខពួកឈ្មោះ អាំង រ៉ាស៊ី ជាបន្ទាន់។ ដោយហេតុថា មកដល់ពេលនេះលោក ខូយ ឈឺន និងបក្ខពួកឈ្មោះ អាំង រ៉ាស៊ី កំពុងធ្វើអ្វីៗតាមអំពើចិត្តដើម្បីប្រមូលលុយចែកគ្នាធ្វើមានធ្វើបាន ដែលជាហេតុធ្វើឲ្យប្រជាពលរដ្ឋជួបការលំបាកយ៉ាងខ្លាំងក្នុងការបង់ពន្ធពេលផ្ទេរកម្មសិទ្ធដីធ្លី។ ដូច្នេះលោក គង់ វិបុល មិនត្រូវបណ្ដែតបណ្ដោយតទៅទៀតទេ ព្រោះរឿងអាស្រូវពុករលួយក្នុងអង្គភាពសាខាពន្ធដារខេត្តសៀមរាប ។
ពលរដ្ឋក្នុងក្រុងសៀមរាប ដែលផ្ទេរកម្មសិទ្ធិដីធ្លីហើយឆ្លងកាត់សាខាពន្ធដារខេត្តសៀមរាប គឺម្នាក់ៗត្រូវចំណាយលុយពីរាប់រយដុល្លារទៅរាប់ពាន់ដុល្លារ?បង់ឲ្យលោក អាំង រ៉ាស៊ី ដែលជាប្រធានការិយាល័យចុះបញ្ជី។ ប្រសិនបើពលរដ្ឋណាយកឯកសារទៅបង់ពន្ធលើការផ្ទេរកម្មសិទ្ធិដីធ្លី ហើយមិនបង់សេវាក្រោមតុឲ្យលោក អាំង រ៉ាស៊ី ទេនោះគឺត្រូវលោក អាំង រ៉ាស៊ី ទុកចោលមិនបញ្ជូនឲ្យលោក ខូយ ឈឺន ស៊ីញ៉េបោះត្រាសម្រេចឡើយ។ ជាងនេះទៅទៀតលោក អាំង រ៉ាស៊ី អាចប្រើលេសថាឯកសារបំពេញមិនត្រឹមត្រូវ ប៉ុន្តែបើពលរដ្ឋហ៊ានចំណាយលុយក្រោមតុឲ្យលោក អាំង រ៉ាស៊ី គឺរហ័សទាន់ចិត្តជាមិនខាន។ បញ្ហានេះលោក គង់ វិបុល អគ្គនាយកនៃអគ្គនាយកដ្ឋានពន្ធដារ ក៏ដូចជាលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរពិនិត្យឡើងវិញជាបន្ទាន់ ៕
Recent Comments