សេចក្ដីរាយការណ៍ពីមន្ត្រីអាជ្ញាធរមូលដ្ឋានក្នុងឃុំសេសាន ស្រុកអូរយ៉ាដាវ បានឲ្យដឹងថា បច្ចុប្បន្នឈ្មួញជាច្រើននាក់នៅតែបន្តសកម្មភាពដឹកជញ្ជូនឈើប្រណីតនិងឈើលេខ១ចេញទៅស្រុកយួនតាមច្រករបៀងភូមិភិទាំងយប់ទាំងថ្ងៃ ហើយមិនឃើញលោក សេក ឌុល នាយប៉ុស្ដិ៍នគរបាលការពារព្រំដែនគោកលេខ៥០៩ ច្រករបៀងភូមិភិ ចាត់វិធានការទប់ស្កាត់នោះទេ។ ប៉ុន្តែនៅពេលជនជាតិដើមភាគតិចចារ៉ាយគ្រាន់តែដឹកឈើស្រឡៅបន្តិចបន្តួចតាមម៉ូតូ បែរជាលោក សេក ឌុល ចាត់វិធានការបង្ក្រាបរឹបអូសយកទៅលក់ឲ្យឈ្មួញយួនដើម្បីផលប្រយោជន៍ផ្ទាល់ខ្លួនយ៉ាងកំរោលតែម្តង។ ដូច្នេះហើយទើបប្រជាពលរដ្ឋក្នុងឃុំសេសាន ស្រុកអូរយ៉ាដាវ អំពាវនាវឲ្យលោក ងួន គឿន ស្នងការនគរបាលខេត្តរតនគិរី និងលោក ថង សាវុន អភិបាលខេត្តរតនគិរី ពិនិត្យមើលសកម្មភាពមិនប្រក្រតីរបស់លោក សេក ឌុល ខ្លះផងព្រោះមេប៉ុស្ដិ៍ច្រករបៀងភូមិភិរូបនេះ កំពុងប្រើប្រាស់តួនាទីនិងអំណាចរបស់ខ្លួនធ្វើបាបប្រជាពលរដ្ឋ។
លោក សេក ឌុល នាយប៉ុស្ដិ៍នគរបាលការពារព្រំដែនគោកលេខ៥០៩(ច្រករបៀងភូមិភិ) ឃុំសេសាន ស្រុកអូរយ៉ាដាវ ខេត្តរតនគិរី កំពុងត្រូវប្រជាពលរដ្ឋរិះគន់ពីរឿងចាប់ឈើពួកគាត់យកទៅលក់ឲ្យឈ្មួញយួនយកលុយខ្លួនឯងយ៉ាងគឃ្លើន។ ហេតុនេះហើយទើបជនជាតិដើមភាគតិចចារ៉ាយនៅភូមិភិ កាប់ឈើជាច្រើនដើមរាំងផ្លូវចេញពីភូមិភិ ដោយសារតែពួកគាត់ខឹងនឹងលោក សេក ឌុល មេប៉ុស្ដិ៍ច្រករបៀងភូមិភិ ចាប់ឈើពីពួកគាត់យកទៅលក់ឲ្យឈ្មួញយួន។ បញ្ហានេះលោក ងួន គឿន ស្នងការនគរបាលខេត្តរតនគិរី មិនត្រូវបណ្ដែតបណ្ដោយតទៅទៀតទេ ព្រោះលោក សេក ឌុល កំពុងតែប្រព្រឹត្តបទល្មើសដោយគ្មានញញើតអ្វីទាំងអស់។
ជនជាតិដើមភាគតិចចារ៉ាយរស់នៅភូមិភិ ឃុំសេសាន ស្រុកអូរយ៉ាដាវ បានឲ្យដឹងថា នៅពេលដែលពួកគាត់ដឹកឈើស្រឡៅបន្តិចបន្តួចយកទៅលក់ដើម្បីបានលុយទិញអង្ករច្រកឆ្នាំងត្រូវលោក សេក ឌុល ចាប់រឹបអូសពីពួកគាត់យកទៅលក់ឲ្យឈ្មួញយួនយ៉ាងទទឹងទទែង។ ជនជាតិដើមភាគតិចក្នុងភូមិភិ បានរិះគន់ថា នៅពេលក្រុមឈ្មួញដឹកជញ្ជូនឈើតាមរថយន្តទាំងខ្សែៗមិនដែលឃើញលោក សេក ឌុល ចាត់វិធានការបង្ក្រាបឬទប់ស្កាត់ម្តងណាឡើយ ប៉ុន្តែនៅពេលពួកគាត់ដឹកឈើបន្តិចបន្តួចតាមម៉ូតូ បែរជាត្រូវលោក សេក ឌុល ចាប់រឹបអូសយកទៅលក់ឲ្យឈ្មួញយួនតាមអំពើចិត្ត។ អាចនិយាយបានថា លោក សេក ឌុល កំពុងធ្វើបាបជនជាតិដើមភាគតិចចារ៉ាយនៅភូមិភិ ឃុំសេសាន ស្រុកអូរយ៉ាដាវ ដើម្បីផលប្រយោជន៍ផ្ទាល់ខ្លួន៕
Recent Comments