តាមមន្ត្រីរាជការនៅក្នុងខេត្តបន្ទាយមានជ័យ បានឲ្យដឹងថា នគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានដាក់កម្លាំងឈរជើង៥ទីតាំងដើម្បីជំរិតយកលុយពីឈ្មួញនិងអាជីវករ ដឹកជញ្ជូនទំនិញ ហើយសូម្បីតែអ្នករត់តាក់ស៊ីដឹកជញ្ជូនបន្លែផ្លែឈើបន្តិចបន្តួចក៏ត្រូវ ប្រឈមនឹងការជំរិតយកលុយដែរ។ ទីតាំងឈរជើងរបស់នគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ មាននៅចំណុចសាលាក្រហម នៅតាមផ្លូវជាតិលេខ០៦ ពីទីរួមខេត្តបន្ទាយមានជ័យ ទៅខេត្តសៀមរាប នៅច្រកព្រំដែនស្រុកម៉ាឡៃ នៅច្រកព្រំដែនបឹងក្រកួន និងនៅច្រកអន្តរជាតិប៉ោយប៉ែត។
នគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាល ខេត្តបន្ទាយមានជ័យ កំពុងធ្វើឲ្យឈ្មួញ អាជីវករ និងប្រជាពលរដ្ឋរិះគន់យ៉ាងខ្លាំងដោយសារតែពួកគេមិនបំពេញតួនាទី របស់ខ្លួនឲ្យបានត្រឹមត្រូវក្នុងការបង្ក្រាបបទល្មើសសេដ្ឋកិច្ច។ ផ្ទុយទៅវិញពួកគេបែរជាប្រើប្រាស់អំណាចនិងតួនាទីដើម្បីជំរិតយកលុយពី ឈ្មួញ អាជីវករ និងប្រជាពលរដ្ឋស្រេចតែអំពើចិត្ត ព្រមទាំងបង្កើតកុងត្រូលជជុះជាច្រើនកន្លែងបំពានទៅលើបទបញ្ជារបស់លោក នាយករដ្ឋមន្ត្រី ហ៊ុន សែន យ៉ាងគឃ្លើនទៀតផង។
ប្រភពពីឈ្មួញនិងអាជីវកររកស៊ីដឹកជញ្ជូនទំនិញក្នុង ខេត្តបន្ទាយមានជ័យ បានឲ្យដឹងថា ចាប់តាំងពីលោក ឆេង សុវត្ថិ ឡើងធ្វើជានាយការិយាល័យនគរបាលប្រឆាំងបទល្មើសសេដ្ឋកិច្ច ខេត្តបន្ទាយមានជ័យរួចមក បានបណ្ដោយឲ្យកូនចៅក្រោមឱវាទជំរិតយកលុយពីពួកគាត់តាមរបៀបពុករលួយ កាន់តែខ្លាំងឡើងៗ។ ក្នុងនោះលោក ចាប សុផារិទ្ធ អតីតនាយការិយាល័យនគរបាលប្រឆាំងបទល្មើសសេដ្ឋកិច្ច ក៏នៅតែមានអំណាចធំធេងក្នុងកិច្ចសហការជាមួយលោក ឆេង សុវត្ថិ ក្នុងការជំរិតយកលុយពីឈ្មួញនិងអាជីវករដឹកជញ្ជូនទំនិញ ។ លោក អាត់ ខែម ស្នងការនគរបាលខេត្តបន្ទាយមានជ័យ ត្រូវបានគេដឹងថា ជាអ្នកបើកដៃឲ្យលោក ឆេង សុវត្ថិ និងលោក ចាប សុផារិទ្ធធ្វើអ្វីៗតាមអំពើចិត្ត ដើម្បីប្រមូលលុយចែកគ្នាធ្វើមានធ្វើបានយ៉ាងសុខស្រួលក្នុងខណៈដែល បទល្មើសសេដ្ឋកិច្ចកើតឡើងយ៉ាងរាលដាលនៅក្នុងខេត្តបន្ទាយមានជ័យ។
មានការរិះគន់ថា ដោយសារមានការបើកដៃពីលោក អាត់ ខែម ស្នងការនគរបាលខេត្តបន្ទាយមានជ័យ ទើបលោក ឆេង សុវត្ថិ និងលោក ចាប សុផារិទ្ធ គិតតែពីរឿងប្រមូលលុយដាក់ហោប៉ៅដោយមិនខ្វល់ពីការរិះគន់អ្វី ទាំងអស់។ ក្រុមឈ្មួញមួយចំនួនអាចដឹកជញ្ជូនទំនិញគេចពន្ធ ទំនិញខុសច្បាប់តាមអំពើចិត្ត ដោយសារគេមានទំនាក់ទំនងជាមួយនគរបាលប្រឆាំងបទល្មើសសេដ្ឋកិច្ច ខេត្តបន្ទាយមានជ័យ ក្រោមការគ្រប់គ្រងរបស់លោក ឆេង សុវត្ថិ។ ដូច្នេះលោក ចាន់ វ៉ាន់ធឿន ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ គួរពិនិត្យមើលទង្វើមិនប្រក្រតីរបស់លោក ឆេង សុវត្ថិ នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ និងបក្ខពួកជាបន្ទាន់ ៕
Recent Comments