ប្រភពពីមន្ត្រីនគរបាលខេត្តសៀមរាប បានឲ្យដឹងថា រថយន្តយីឌុបដឹកឈើទាំង២គ្រឿងនោះ ជារបស់លោក វណ្ណ សុផាណ្ណា អតីតនាយអធិការដ្ឋានរដ្ឋបាលព្រៃឈើខាងជើងបឹងទន្លេសាប ដែលល្បីល្បាញខាងប្រព្រឹត្តអំពើពុករលួយ។ សកម្មភាពដឹកឈើតាមរថយន្តយីឌុបធំៗ២គ្រឿងចេញពីខេត្តព្រះវិហារ ឆ្លងកាត់ខេត្តសៀមរាប ឆ្ពោះទៅខេត្តបន្ទាយមានជ័យ មានអ្នករត់ការដល់ទៅ៣នាក់ ទី១ឈ្មោះ ឆ័យ ទី២ឈ្មោះ វិសាល និងទី៣ ឈ្មោះ ម៉ែន វុទ្ធី ហៅធីឡយ ជាមន្ត្រីរដ្ឋបាលព្រៃឈើខេត្តសៀមរាប។ ដោយសារតែមានអ្នករត់ការបើកផ្លូវបែបនេះហើយទើបលោក វណ្ណ សុផាណ្ណា អាចដឹកជញ្ជូនឈើយ៉ាងរលូនក្នុងខណៈដែលគណៈកម្មការជាតិដើម្បីទប់ស្កាត់ និងបង្ក្រាបបទល្មើសព្រៃឈើ កំពុងចាត់វិធានការបង្ក្រាបបទល្មើសតាមបទបញ្ជារបស់លោក ហ៊ុន សែន។
ប្រតិបត្តិការរបស់គណៈកម្មការជាតិដើម្បីទប់ស្កាត់និង បង្ក្រាបបទល្មើសព្រៃឈើ កំពុងតែក្លាយទៅជារឿងឥតន័យ ព្រោះលោក វណ្ណ សុផាណ្ណា អតីតនាយអធិការដ្ឋានរដ្ឋបាលព្រៃឈើខាងជើងបឹងទន្លេសាប កំពុងក្លាយទៅជាឈ្មួញដឹកជញ្ជូនឈើ គ្មានសមត្ថកិច្ចណា ប៉ះពាល់ឡើយ។ ជាក់ស្តែងកាលពីថ្ងៃទី០៥ ខែមីនា ឆ្នាំ២០១៦ សមត្ថកិច្ចតាមផ្លូវជាតិលេខ៦ពីខេត្តសៀមរាប ទៅខេត្តបន្ទាយមានជ័យ បានឲ្យដឹងថា រថយន្តយីឌុបធំៗ២គ្រឿងដឹកឈើលើសចំណុះចេញពីខេត្តព្រះវិហារ ឆ្លងកាត់ខេត្តសៀមរាប ហួសទៅខេត្តបន្ទាយមានជ័យ តាមផ្លូវជាតិលេខ៦ដោយគ្មានការរំខានពីមន្ត្រីរដ្ឋបាលព្រៃឈើ និងសមត្ថកិច្ចពាក់ព័ន្ធផ្សេងទៀតនោះទេ។
លោក វណ្ណ សុផាណ្ណា នៅធ្វើជានាយអធិការដ្ឋានរដ្ឋបាលព្រៃឈើខាងជើងបឹងទន្លេសាប គឺបទល្មើសកាប់ឈើនិងដឹកជញ្ជូនឈើក្នុងខេត្តសៀមរាប ឧត្ដរមានជ័យ ព្រះវិហារ និងកំពង់ធំ កើនឡើងយ៉ាងពេញបន្ទុកដោយមានការបើកដៃពីលោក វណ្ណ សុផាណ្ណា តែម្តង។ ឥឡូវនេះទោះបីលោក វណ្ណ សុផាណ្ណា អស់តំណែងជានាយអធិការដ្ឋានរដ្ឋបាលព្រៃឈើខាងជើងបឹងទន្លេសាប យ៉ាងណាក៏ដោយ ក៏លោក វណ្ណ សុផាណ្ណា អាចក្លាយទៅជាឈ្មួញដឹកជញ្ជូនឈើពីខេត្តព្រះវិហារ ឆ្លងកាត់ខេត្តសៀមរាប ឆ្ពោះទៅខេត្តបន្ទាយមានជ័យយ៉ាងរលូន។ ភស្តុតាងជាក់ស្តែងមិនអាចប្រកែកបាន គឺកាលពីថ្ងៃទី០៥ ខែមីនា ឆ្នាំ២០១៦ សមត្ថកិច្ចនគរបាលលើដងផ្លូវជាតិលេខ៦ ពីខេត្តសៀមរាប ទៅខេត្តបន្ទាយមានជ័យ បានឲ្យដឹងថា រថយន្តយីឌុបដឹកឈើទាំង២គ្រឿងនោះ គឺជារបស់លោក វណ្ណ សុផាណ្ណា។ បញ្ហានេះលោក ឆេង គឹមសុន អគ្គនាយករដ្ឋបាលព្រៃឈើ និងលោក អ៊ុក រ៉ាប៊ុន រដ្ឋមន្ត្រីក្រសួងកសិកម្ម ត្រូវពិនិត្យមើលជាបន្ទាន់ ព្រោះករណីមន្ត្រីរដ្ឋបាលព្រៃឈើប្រព្រឹត្តបទល្មើសដឹកជញ្ជូនឈើ ខុសច្បាប់ ៕
Recent Comments